1 Koreto 10 - La Bible en Otetela (Bible K'Ekila) 1991

Daku Uma lu Akambu wʼEdjedja wa Isariyele

¹ Anyasu, dimi nangaka nyu mbeya nyati: Watshesu tshe waki la tshina dia dingi, vo tshe waketi lʼatei wʼuduwa.

² Vo tshe wakabatizama le Mose lu dingi la lʼuduwa.

³ Vo tshe wakalekaka mbu ya nde ya nyuma kame.

⁴ Vo tshe wakanokaka diango dia no dia nyuma kame, ne dia vo wakanokaka uma lu Dive dia nyuma diakawayeli. Dive diako diaki Kristu.

⁵ Keli Unyashungu kongenangena le amotshi wuleki efula, ne dia vo wakalembiama lʼusui.

⁶ Akambu aso wakayala le su dia ntewula, diaha shu ndjala la saki yʼakambu wa kolo uku akiwo la saki.

⁷ Ntu, tanyuyalaki atemodi wa dikishi uku aki amotshi; uku ambufundama ati: Antu wakadjase ne dia nde la no, wakunela ne dia nkenya.

⁸ Ntu, tatunanaki uku akatshi amotshi, ku wakavu nunu satu akumi ahendi la satu lushi lame.

⁹ Ntu, tatuhimbaki Khumadiondjo uku akatshi amotshi, ku wakavu lʼelui.

¹⁰ Ntu, tanyungunangunaki uku akangunanguna amotshi, ku wakavu lʼanya wʼUnanyishi.

¹¹ Akambu aso wakayala le wo dia mbaewula. Vo wambufundama dia ntewula lʼekumelu ka tena diaya le su.

¹² Okone untu lakana ati: Dimi lambemala, ewo, atukoko.

¹³ Nduku uhimba waya le nyu, waheyi antu memba. Keli Unyashungu eko la kolamelu; ndi hetawo dia nyu mpimbama uleki wulu anyu. Keli lamʼayuya ehimba, ndi ayunyutshela mbuka ka nyu mpanda dia nyu ndjala la wulu wa nshikikala.

“Nyulawo Otemwelo wa Dikishi”

¹⁴ Okone, elangimi ami, nyulawo otemwelo wa dikishi.

¹⁵ Dimi lamboteketa uku le akanga a yimba; nyediki nyame aui watami.

¹⁶ Dikoho diʼotshoko diatshokolasu, dio kema uku ekesanelu kasu lu dikila dia Kristu? Ukama watulasu, vo kema uku ekesanelu kasu lu dimba dia Kristu?

¹⁷ Ne dia shu, antu efula, teko ukama wame, la dimba diame, ne dia shu tshe tatosaka uma lʼukama otoi.

¹⁸ Nyendi Isariyele lu akambu awo wa dimba. Wane watolekaka diango diʼediakelu, vo hawekesanela lʼediakelu?

¹⁹ Ya ukundi atami na? nti: Ma diatuwulambulaka dikishi mbeli dikambu, kana ekishi keli dikambu?

²⁰ Kema, dimi lambuta nti: Elambu watulambulaka asi wedja, edienge mbatuwalambulaka, aha Unyashungu. Dimi halangi nyu mbekesanela la edienge.

²¹ Nyu hanyeyi no dikoho dia Khumadiondjo, ndu dikoho diʼedienge. Nyu hanyeyi nde uma lu mesa wa Khumadiondjo, ndu umalu mesa wʼedienge.

²² Khumadiondjo kutshasu kandjema uka? Wulu mbulekisu?

Tawulanyaki Ndjadjasela ka Kristu

²³ Wulu a ntsha akambu tshe weko, keli aha akambu tshe mbusunganyi. Wulu wa ntsha akambu tshe weko, keli aha akambu tshe mbatudia.

²⁴ Untu tayayangelaki ololo andi, keli untu lʼuntu ayangeli ukina ololo.

²⁵ Nyuli engo tshe kasundjawo lu kituka, tanyumbwanaki embula ne dia khumʼutema,

²⁶ ne dia kete yeko ya Khumadiondjo, ndu diango tshe dieli loko.

²⁷ Naka untu lahetawo ayunyeta, la nyu nangaka ntsho, kanyuli engo tshe kayuwunyukitshiya, tanyumbwanaki embula dia khumʼutema.

²⁸ Keli naka untu ayukutela ati: Engo kene kakawakimwela ekishi, tanyolekaki, ne dia untu lakakewudi, la dia khumʼutema.

²⁹ Dimi halati dia khumʼutema kaye, keli dia khumʼutema ka ukina. Okoko wana wukuki ndjadjasela kami numbuyama le khumʼutema kekina?

³⁰ Naka Himi lale, luka lusaka, okoko wana wukukimi ntendama lu diango diakamuki lusaka?

³¹ Okone kana nyayole, kana nyayono, kana dikambu tshe diayunyutsha, nyutshi dia lutumbu la Unyashungu.

³² Tanyuyalaki uku utamba a ntakanya: le asi Juda kana le asi Ngirika, kana le ekelizia wa Unyashungu,

³³ uku ndu dimi latongenyangenyaka antu tshe lu akambu tshe. Dimi hayayangela waho, keli latuyangelaka antu efula waho dia vo nshimbamela.