1 Koreto 1 - La Bible en Otetela (Bible K'Ekila) 1991

Paulu Ambatumela Moyo

¹ Dimi Paulu, laketama uma lu lulanpi la Unyashungu dia ndjala utumami a Jesu Kristu, la onengesu Sosetene,

² Le ekelizia wa Unyashungu wa la Koreto, le wane wakakidiama le Kristu Jesu, waketama dia ndjala ekilami, kame la wane tshe watetaka lukumbu la Khumesu Jesu Kristu lu ahuli tshe, Khumewo ndu Khumesu:

³ Ngandji ka mamba kayali la nyu, ndu ki kʼuma le Unyashungu Shesu, la uma le Khumadiondjo Jesu Kristu!

Ambuka Unyashungu Lusaka

⁴ Dimi latukaka Unyashungu ami lusaka dikambu dianyu, ne dia ngandji ka mamba ka Unyashungu kakawanyusha le Kristu Jesu.

⁵ Ndi akanyongonya lu akambu tshe, ndu lu aui tshe, ndu lu bewu tshe —

⁶ uku okone akashikimala diui dia Kristu le nyu —

⁷ okone nyu hanyuhandja nduku ushasha lamʼalungamelanyu enelo ka Khumesu Jesu Kristu.

⁸ Ndi ayunyushikike edja ndu lʼekumelu, dia nyu ndjala aha la unungu lu lushi la Khumesu Jesu Kristu.

⁹ Unyashungu lakanyeti lu diekesanelu dia Onʼandi Kristu Khumesu, eko la kolamelu.

Ambasengasenga Dia Vo Ndjala Kame

¹⁰ Anyasu, dimi lambunyosengasenga lu lukumbu la Khumesu Jesu Kristu, dia nyu tshe mvuta diui otoi, diaha nyu mbatana, keli dia nyu nduwanyema lu yimba ndu lu tukanyi kame.

¹¹ Anyami, asika Koloe, wakamvutela akambu anyu vati: Tamu teko lʼatei anyu.

¹² Diako mbatami nti: Nyu nyatutaka untu lʼuntu ati: Dimi usika Paulu; Dimi usika Apolo; Dimi usika Kefasi; Dimi usika Kristu.

¹³ Kristu ambatana uka? Paulu kakanyuvwela lu utamba a mpeketanya? Nyu nyakabatizama lu lukumbu la Paulu?

¹⁴ Dimi lambuka Unyashungu lusaka, ne dia dimi kumbatiza nduku usikanyu, paka Kirispo la Ngayo;

¹⁵ ne dia untu atukuta ati: Dimi lakabatizama lu lukumbu la Paulu.

¹⁶ (Dimi lakabatiza ndu khumbu ka Stefana. Ladiku dia aso, dimi haluho nti: Lakabatiza untu ukina.)

¹⁷ Ne dia Kristu kuntumami dia mbatiza, keli ne dia nsambisha lukumu lʼololo aha la yimba yʼaui, ne dia utamba a mpeketanya a Kristu atukuyala uyalayala.

“Kristu Wulu a Unyashungu, Ndu Yimba ya Unyashungu”

¹⁸ Ne dia diui dia utamba a mpeketanya dieli dikambu diʼenginya le wane wakashisho, keli le su, shu wane wakashimbamela, dio dieko wulu a Unyashungu.

¹⁹ Ne dia akafundama ati: Dimi layulanya yimba yʼakanga a yimba, Layunya lononga lʼakanga a lononga.

²⁰ Lendʼeli kanga yimba na? Lendʼeli ufundji? Lendʼeli kanga tamu lʼetena kene? Unyashungu kunkadimula yimba ya kete nye, yayali enginya uka?

²¹ Ne dia tambena yimba ya Unyashungu shati: Antu kumbeya Unyashungu uma lu yimba yawo, okone Unyashungu akasonola dinginya dia nsambisha diui diandi, ne dia nshimbela wane wawetawo.

²² Tambena shati: Asi Juda watolombaka tulimbitelu, asi Ngirika watuyangaka tumba,

²³ keli shu tatusambishaka dia Kristu, lakawadiaki lʼutamba a mpeketanya, leli uku utamba a ntakanya le asi Juda, leli uku enginya le wedja.

²⁴ Keli le wane waketama, ndu asi Juda ndu asi Ngirika, Kristu eko wulu a Unyashungu, ndu yimba ya Unyashungu.

²⁵ Ne dia enginya ka Unyashungu kambuleka yimba yʼantu, la wodu a Unyashungu ambuleka wulu wʼantu.

Unyashungu Akasonola Akanga a Dinginya wa la Kete

²⁶ Anyasu, nyukani dia leta lanyu! Aha akanga a yimba yʼalimba efula, kuyanga akanga a wulu efula, kuyanga eshilambu efula mbaketama,

²⁷ keli Unyashungu akasonola akanga a dinginya wa la kete, dia ndi mbutsha akanga a yimba sonyi. Unyashungu akasonola wane weli wodu wa la kete, dia ndi mbutsha akanga a wulu sonyi.

²⁸ Unyashungu akasonola ndu diango diukitshikitshi ndu dionywama dia la kete, ndu diango dieli kemako, dia ndi nkadimula diango dieko, diayali kemako,

²⁹ ne dia untu atukuyatumbula la ntundu ka Unyashungu.

³⁰ Keli nyu nyeli antu andi le Kristu Jesu, lako lakayala uku yimba yasu uma le Unyashungu, ndu ololo asu, ndu ekidiamelu, la etshungwamelu kasu;

³¹ uku akafundama ati: Untu layatumbula, ayatumbuli le Khumadiondjo.