1 Joani 4 - La Bible en Otetela (Bible K'Ekila) 1991

“Nyuma ka Akambu wa Mete, la Nyuma ka Kashi”

¹ Elangimi ami, tanyetawoki nyuma tshe, keli nyuhimbi nyuma, kana yo yeko ya Unyashungu; ne dia amvutshi

² Dia dikambu ne mbeyasu Nyuma ka Unyashungu. Nyuma tshe ketawo ati: Jesu Kristu akayi lu dimba diʼuntu, to keli ka Unyashungu.

³ Nyuma tshe kahetawo Jesu, to kema ka Unyashungu. To keli nyuma ka utunyi a Kristu, uku akanyuki ati: To kayayi; to keko la kete kakiane.

⁴ Anʼami wa tshitshe wa Unyashungu mbenyu. Nyu nyakaleki wulu, ne dia one leli lu etema anyu ndeka one leli la kete wulu.

⁵ Antu wa la kete mbewo, diako mbatuwutaka akambu wa la kete, ku wa la kete watuwaukelaka.

⁶ Shu teko wa Unyashungu. Untu leya Unyashungu, atutukelaka, keli one laha la Unyashungu, hatukela. Dia akambu ane mbeyasu nyuma kʼakambu wa mete, la nyuma ka enganyelu.

Unyashungu Eli Ngandji

⁷ Elangimi ami, tukani ngandji; ne dia ngandji keli uma le Unyashungu; untu tshe latulangaka akina, ambuto uma le Unyashungu, ndu mbeyaka Unyashungu.

⁸ Untu lahalangi akina, heyi Unyashungu; ne dia Unyashungu eli ngandji.

⁹ Dia dikambu ne mbakenama ngandji ka Unyashungu le su, ne dia Unyashungu akatumi Onʼandi etoi la kete, dia shu ndjala la lumu uma le ndi.

¹⁰ Dia dikambu ne mbeli ngandji, aha ne dia shu takalangi Unyashungu, keli ne dia ndi akatulangi. Ndi akatumi Onʼandi dia ndjala ulambu ne dia kolo yasu.

¹¹ Elangimi ami, naka Unyashungu akatuki ngandji okone, dieli la su ndu shu mbukana ngandji.

¹² Nduku untu lakenyi Unyashungu etena kemotshi. Naka shu tatukanaka ngandji, Unyashungu atuyalaka lʼetema asu, ku ngandji kandi kambuluwana lʼetema asu.

Untu Latuyalaka lu Ngandji, Atuyalaka lʼUtema a Unyashungu

¹³ Dia dikambu ne mbeyasu shati: Shu tatuyalaka lʼutema andi, la ndi lʼetema asu, ne dia ndi akatusha Nyuma kandi.

¹⁴ Shu takenyi la shu tatutaka shati: Papa akatumi Onʼandi, ne dia ndi ndjala Ushimbedi a wa la kete.

¹⁵ Untu tshe letawo ati: Jesu eko Onʼa Unyashungu, Unyashungu atuyalaka lʼutema andi, la ndi lʼutema a Unyashungu.

¹⁶ Okone shu mbeyaka, ndu tambetawo ngandji ka Unyashungu le su. Unyashungu eko ngandji: untu latuyalaka lu ngandji, atuyalaka lʼutema a Unyashungu, la Unyashungu atuyalaka lʼutema andi.

¹⁷ Dia dikambu ne mbambuluwanyema ngandji le su, ne dia shu ndjala la dihunga lu lushi lʼelumbwelu; ne dia uku wendi, mbesu lu kete nye.

¹⁸ Kema woma lamʼeli ngandji keli ngandji kuluwanyi atunyeka woma, ne dia woma eko la asui. Untu latukaka woma, hatuluwanyemaka lu ngandji.

¹⁹ Shu tatulangaka, ne dia ndi akatulangi ntundu.

²⁰ Naka untu ayuta ati: Dimi latulangaka Unyashungu, ku ndi mpetshaka unyandi, keti kanga kashi kendi. Ne dia untu lahalangi unyandi lenandi, ndi heyi nanga Unyashungu lahandenyi.

²¹ Olembe one mbakandatudjela ati: Untu tshe latulangaka Unyashungu, ndi alangi ndu unyandi.