1 Joani 3 - La Bible en Otetela (Bible K'Ekila) 1991

Taketama Dia Ndjala Ana wa Unyashungu

¹ Nyendi wuhu wa ngandji kakatuki Shesu dia shu mbetama ana wa Unyashungu; osoku mbesu. Dia dikambu ne mbahateyi wa la kete, ne dia vo kumbeya.

² Elangimi ami, kakiane ana a Unyashungu mbesu, diatenama okone ayutuyala. Shu mbeyaka shati: Naka ndi ayene, shu tayuyala uku ndi, ne dia shu tayuwena uku wendi.

³ Untu tshe leli la elungamelu kene lʼutema andi, atuyaediaka uku wendi pudipudi.

Ana wa Unyashungu la Ana wa Uhimbanyi Menamaka

⁴ Untu tshe latutshaka kolo, atudiakaka elembe, ne dia kolo eli undjaki wʼelembe.

⁵ Nyu mbeyaka nyati: Ndi akenama ne dia minya kolo yasu, ndi taki la kolo lu utema andi.

⁶ Untu tshe latuyalaka lʼutema andi, hatutshaka kolo. Untu tshe latutshaka kolo, ndi atawenyi, ataweyi.

⁷ Anʼami wa tshitshe, untu tanyunganyiaki. Untu latutshaka ololo, eko ololo uku wendi ololo.

⁸ Untu latutshaka kolo, eko untu a uhimbanyi, ne dia uhimbanyi akatshaka kolo uma lʼetatelu. Dia dikambu diako, mbakenama Onʼa Unyashungu, dia ndjulanya elimu wa uhimbanyi.

⁹ Untu tshe lambuto le Unyashungu hatshi kolo, ne dia wuhu wa Unyashungu watuyalaka lʼutema andi. Ndi heyi ntsha kolo, ne dia ndi ambuto le Unyashungu.

¹⁰ Dia dikambu ne, ana wa Unyashungu la ana wa uhimbanyi wateyamaka. Untu lahatshi ololo, kema untu a Unyashungu, ndu one lahalangi unyandi.

“Tukani Ngandji lu Ditshelu la lu Akambu wa Mete”

¹¹ Diui ne mbakanyukaka uma lʼetatelu ati: Dieli la su dia mbukana ngandji.

¹² Tanyuyalaki uku Kena, kanga kolo, lakadiaki onangu. Ukundi akandudiaki? Ne dia akambu andi waki kolo, la wa onangu waki ololo.

¹³ Anyasu, tanyambaki naka wa la kete wambunyuhetsha.

¹⁴ Shu mbeyaka shati: Shu takatumbi uma lu nyoi utsha lu lumu, ne dia shu tatulangaka anyasu. Untu lahalangi unyandi eki lu nyoi.

¹⁵ Untu tshe latuhetshaka unyandi, eko undjakanyi. Nyu mbeyaka nyati: Nduku undjakanyi leli la lumu la pundju lʼutema andi.

¹⁶ Dia dikambu ne, mbeyasu ngandji, ne dia ndi akatukimwela lumu. Ku dieli la su dia nkimwela anyasu lumu.

¹⁷ Keli naka untu eko la diango dia la kete, la ndi mendaka unyandi ahumba, ku ndi ambukikitsha utema, ukundi eli ngandji ka Unyashungu lʼutema andi?

¹⁸ Anʼami wa tshitshe, tatukanaki ngandji lu aui atu la lu nimi, keli tukani ngandji lu ditshelu la lu akambu wa mete.

¹⁹ Dia akambu ane mbeyasu shati: Wa mete mbesu, tayushikike etema asu la ntundu kandi.

²⁰ Ne dia naka etema asu wambutamia, Unyashungu ndeka etema asu wuki. Ndi mbeyaka akambu tshe.

²¹ Elangimi ami, naka etema asu hawutamia, ku shu tayuyala la dihunga la ntundu ka Unyashungu.

²² Shu tatulungulaka kene tshe kalombasu, ne dia shu tatulamaka elembe andi, ndu tatutshaka akambu watongenyangenyaka.

²³ Olembe andi one ati: Tetawo lukumbu la Onʼandi Jesu Kristu, ndu tukani ngandji, uku akandatudjela olembe.

²⁴ Untu latulamaka elembe a Unyashungu, atuyalaka lʼutema andi, ndu Unyashungu atuyalaka lu utema wʼuntu ako. Dia dikambu ne mbeyasu shati: Ndi atuyalaka lʼetema asu, uma le Nyuma kakandatusha.