1 Ekondo 29 - La Bible en Otetela (Bible K'Ekila) 1991

¹ Khumʼekanga Davidi akatela ului tshe ati: Onʼami Solomona lakasonola Unyashungu, ndame, eki dikenda, ateyi akambu efula, la ulimu weko efula, ne dia luudu lone kema luudu lʼuntu. Lo leli la Unyashungu, Latuyalaka.

² Dimi lakayakimo la wulu ami tshe dia motsha diango dia luudu la Unyashungu ami: paunyi, dia ntsha diango dia paunyi; fesa, dia ntsha diango dia fesa; ohotela, dia ntsha diango diʼehotela; mbulu, dia ntsha diango dia mbulu; la etamba, dia ntsha diango dia etamba. Dimi lakamotsha ndu mboko yʼave ya pesopeso, mboko yʼave ya mpake, mboko yʼave ya nsome, mboko ya ngaingai, ndu ya wehu wehu, wehu tshe wa mboko yʼushinga a wulu, ndu ave efula wʼawadi awadi.

³ Ntu, lambuleka mbuka luudu la Unyashungu ami ngandji, diako mbamumukimo paunyi la fesa yami hita dikambu dia luudu la Unyashungu ami, ladiku dia diango tshe diakamamotshi dikambu dia luudu lʼekila:

⁴ paunyi yediko ya talata nunu satu, paunyi yʼuma lʼOfira, fesa ya pudipudi yediko ya talata nunu esambeli, dia nkumba peli dia mvudu;

⁵ paunyi, ne dia diango tshe dia paunyi; fesa, ne dia diango tshe dia fesa, la wehu tshe wa diango diayutsha etshudi wa tokomba. Untu akona ntu alanga nkimo elambu andi wa lulangu elo le Latuyalaka?

⁶ Ku ete wa khumbu ya washewo, ewandji a wauhu wa Isariyele, elombodi wʼantu nunu nunu la wʼantu kama kama la elohe wa khumʼekanga wakalambula elambu wa lulangu.

⁷ Vo wakakimo paunyi yediko ya talata nunu tanu, la darika nunu dikumi, fesa yediko ya talata nunu dikumi, ohotela yediko ya talata nunu dikumi la enanei, ndu mbulu yediko ya talata nunu lukama lʼulimu wa luudu la Unyashungu.

⁸ Waku tshe waki la mboko yʼushinga a wulu, wakayikimo lu anya wa Jehiyele, usi Ngareshona, lu dikambu ne dia eumbelu ka luudu la Latuyalaka.

⁹ Ku antu wakangenangena dia elambu awo wa lulangu, ne dia vo wakakimo elambu awo le Latuyalaka lʼutema otoi, ndu khumʼekanga Davidi akangenangena utamanya.

¹⁰ Okone Davidi akatumbula Latuyalaka la ntundu kʼului tshe wʼantu, akati ati: Latuyalaka li, we Unyashungu a shesu Isariyele, utumbwami pundju, pundju!

¹¹ Latuyalaka li, we kukanga wuki, wulu, lutumbu, elembielo, la nemo! ne dia diango tshe dia lʼulungu ndu dia la kete, diaye mbedio. Latuyalaka li, we kukanga diulelu, we ambediama ladiku dia tshe!

¹² Ongonyi la lutumbu watuyakaka uma le ye, ne dia we kuledi tshe; we keli la wulu la khudu; we keli la wulu wa mpamia la nkikitsha tshe.

¹³ Okone, we Unyashungu asu, kakiane shu tambukuka lusaka, tambandula lukumbu laye la lutumbu.

¹⁴ Keli dimi leli na, la wudja ami weli na dia shu mbeya nkulambula elambu ene la lulangu? Ne dia uma lʼanya aye katutulungulaka kene kakulambulasu.

¹⁵ Shu teli angendangenda la amengodi la ntundu kaye uku aki washesu tshe. Nshi yasu lu kete yeli uku dedi, kema shikaa.

¹⁶ Latuyalaka li, we Unyashungu asu, diango ne tshe diambutolongosola dia nkuhikela luudu dikambu dia lukumbu laye lʼekila, diatuyakaka uma lu lunya laye, dio tshe diaye mbedio.

¹⁷ Unyashungu ami, dimi mbeyaka nti: We atukembaka utema, we atulangaka akambu wʼusimbwi. Dimi lambukulambula elambu ene tshe la lulangu ndu lʼutema wʼusimbwi. Kakiane dimi lambongenangena dia mena antu aye weli lane wakulambula elambu la lulangu.

¹⁸ Latuyalaka li, we Unyashungu a washesu Abarahama, Isaka, la Isariyele, ulamaki sangweyu la tukanyi tʼetema wʼantu aye, la ushikike etema awo le ye pundju.

¹⁹ Usha onʼami Solomona utema wʼololo wa ndi namaka elembe aye, aui aye la adjangu aye, dia ndi ntsha akambu ane tshe, la dia mpika luudu lone lambumomotsha diango.

²⁰ Davidi akatela ului tshe wʼantu ati: Kakiane nyutumbuli Latuyalaka, Unyashungu anyu! Ku ului tshe wʼantu wakatumbula Latuyalaka, Unyashungu a washewo, wakakole ete, waka nusaraa la ntundu ka Latuyalaka, ndu ka khumʼekanga.

²¹ La wedi a pindju wa lushi lako, vo wakalambula Latuyalaka esongo wa ngombe kinunu, ekoko a waumi kinunu, la esongo wʼekoko kinunu, ulambu la ulambu wa lutshumba, kame la elambu wa lutela ndu elambu ekina efula efula, ne dia Isariyele tshe.

²² Vo wakali, wakano lushi lako la ntundu ka Latuyalaka lʼongenongeno a wuki. Vo wakadji Solomona, onʼa Davidi, khumʼekanga etena ka hendi, wakukiti iso dia ndjala uwandji wa Latuyalaka, ndu Zadoka, dia ndi ndjala olombedi.

²³ Ku Solomona akadjase lu kiti ka diulelu dia Latuyalaka, uku khumʼekanga lu dihuli dia Davidi shi. Ku ndi akangone; Isariyele tshe wakukitanyiaka.

²⁴ Ewandji tshe, apami wa dihunga la ana apami tshe wa khumʼekanga Davidi wakayala lʼokongo wa khumʼekanga Solomona.

²⁵ Latuyalaka akasha Solomona lukumu la wuki lu ashu wa Isariyele tshe. Ndi akolemia otekoya wuhu waki nkonemiama nduku khumʼekanga kaki la ntundu kandi lu Isariyele.

Nyoi ka Davidi

²⁶ Davidi, onʼa Jese, akulela Isariyele tshe.

²⁷ Ndi akulela Isariyele deku akumi anei. Deku esambeli mbakandulela lu Heberona, la deku akumi asatu la satu mbakandulela la Jerusalema.

²⁸ Ndi akavu aya usumbi wa lukusumbi, akunduya andja. Ndi aki la ongonyi efula ndu la nemo efula. Ku onʼandi Solomona akulela lu dihuli diandi.

²⁹ Enda, etsha wa khumʼekanga Davidi, wa ntundu ndu wa lʼokongo, wambufundama lu ekondo wa Samuele, omenyi wʼakambu wahatayi, lu ekondo wa Natana, ndu lu ekondo wa Ngada, omenyi wʼakambu wahatayi,

³⁰ kame la ekondo wa diulelu diandi tshe, la wulu andi la akambu wakayakaka le ndi, le Isariyele, ndu le waulelu tshe wa kete kina.