1 Ekondo 27 - La Bible en Otetela (Bible K'Ekila) 1991

Elohe wa lu Diulelu

¹ Lanʼeli kumbu yʼasi Isariyele, ete wa khumbu ya washewo, ewandji wʼantu nunu nunu la wʼantu kama kama ndu elohe awo. Vo wakakambelaka khumʼekanga ulimu wa mendaka eunelu la ekalwelu kʼelui wʼalimbi wa la ngondo la ngondo, lʼatei a ngondo tshe ya lʼeleku. Antu nunu akumi ahendi la nei waki lʼului lʼului.

² Jashobeme, onʼa Zabidiyele, aki olombodi wa ului wa ntundu wa lu ngondo ka ntundu. Antu nunu akumi ahendi la nei waki lʼului andi.

³ Ndi aki usika Pereze, ndu ndi kakalombolaka elombodi wa elui wʼalimbi wa lu ngondo ka ntundu.

⁴ Dodai, usi Ahoa, aki olombodi wa ului wa lu ngondo ka hendi. Antu nunu akumi ahendi la nei waki lʼului andi.

⁵ Benaya, onʼa Jehoyada, olombedi wa ladiku, aki olombodi wa ului a satu, wa lu ngondo ka satu. Antu nunu akumi ahendi la nei waki lʼului andi.

⁶ Benaya ako aki lʼatei wʼakanga wa dihunga akumi asatu; ndi kaki olombodi awo. Onʼandi Amizadaba aki olombodi omotshi lʼatei a wudja andi.

⁷ Asahele, onangu Joaba, aki olombodi wa nei, wa lu ngondo ka nei. Onʼandi Zebadiya aki lʼokongo andi. Antu nunu akumi ahendi la nei waki lʼului andi.

⁸ Shamihute, usi Izira, aki olombodi wa tanu wa lu ngondo ka tanu. Antu nunu akumi ahendi la nei waki lʼului andi.

⁹ Ira, onʼa Ikeshe, usi Tekoa, aki olombodi wa samalu wa lu ngondo ka samalu. Antu num akumi ahendi la nei waki lʼului andi.

¹⁰ Heleze, usi Pelona, uma lu wudja wa Efarayima aki olombodi wʼesambeli wa lu ngondo kʼesambeli. Antu nunu akumi ahendi la nei waki lʼului andi.

¹¹ Sibekai, usi Husha, uma lu diuhu dia Zera aki olombodi wʼenanei wa lu ngondo kʼenanei. Antu nunu akumi ahendi la nei waki lʼului andi.

¹² Abiyezere, usi Anatota, uma lu wudja wa Bendjamina, aki olombodi wa divwa wa lu ngondo ka divwa. Antu num akumi ahendi la nei waki lʼului andi.

¹³ Maharai, usi Nefota, uma lu diuhu dia Zera, aki olombodi wa dikumi wa lu ngondo ka dikumi. Antu nunu akumi ahendi la nei waki lʼului andi.

¹⁴ Benaya, usi Piratona, uma lu wudja wa Efarayima, aki olombodi wa dikumi lʼotoi wa lu ngondo ka dikumi lʼotoi. Antu nunu akumi ahendi la nei waki lʼului andi.

¹⁵ Heledai, usi Netofa, uma lu diuhu dia Oteniyele, aki olombodi wa dikumi lʼahendi wa lu ngondo ka dikumi la hendi. Antu nunu akumi ahendi la nei waki lʼului andi.

¹⁶ Ewandji a wauhu wa Isariyele ane: Eliyezere, onʼa Zikiri, umbuledi wa asi Rubena; Shefatiya, onʼa Maka, wʼasi Simeyona,

¹⁷ Hashabiya, onʼa Kemuele, wʼasi Lewi; Zadoka, wa khumbu ka Arona;

¹⁸ Elihu, onangu Davidi omotshi, wʼasi Jud; Omiri, onʼa Mikaele, wa Isakara;

¹⁹ Ishimaya, onʼa Obadiya, wa Zebuluna, Jerimote, onʼa Aziriyele, wa Nafetali;

²⁰ Hoshea, onʼa Azaziya, wʼasi Efarayima; Joele, onʼa Pedaya, wa etenyi ka hendi ka diuhu dia Manase;

²¹ Ido, onʼa Zekariya, wa etenyi ka hendi ka diuhu dia Manase ka la Ngiliyade; Jasiyeie, onʼa Abinere, wa Bendjamina

²² ndu Azarele, onʼa Jerohama, wa Dane. Waso waki elombodi a wauhu wa Isariyele.

²³ Keli Davidi kumbala wane waki la deku akumi ahendi pulu lʼesi, ne dia Latuyalaka akati ati: Dimi layufudia Isariyele uku toto ta lʼulungu.

²⁴ Joaba, onʼa Zeruya, akatatela mbala antu, keli ndi kunshidiya, ne dia kele ka Latuyalaka akandi Isariyele dikambu dia alelu kako. Alelu kene kunfundama lʼatei wʼekondo wa khumʼekanga Davidi.

²⁵ Azimavete, onʼa Adiyele, aki ulami a waumbelu wa khumʼekanga. Jonatana, onʼa Uziya, aki ulami a waumbelu wa lʼesui, wa lʼesumba, wa lu ngelu, ndu wa lu mvudu ya k umʼekanga.

²⁶ Eziri, onʼa Kelube, aki kapita ka waku wakakambaka lʼekambo;

²⁷ Shimei, usi Rama, aki kapita kakalamaka dikambo dia vinyo; Zabidi, usi Shefame, aki ulami a waumbelu a wanu wʼuma lu dikambo dia vinyo.

²⁸ Bale-Hanana, usi Ngedere, aki ulami wʼetamba wʼeweli la wa khumu waki lʼekidi; Joashi aki ulami a waumbelu wa biso.

²⁹ Shitirai, usi Sarona, aki ulami wa dungalunga diakalekaka adiyu la Sarona, Safata, onʼa Adelai, aki ulami wa dungalunga diakalekaka adiyu lʼekidi;

³⁰ Obile, usi Ishamele, aki ulami wa kamelo. Jedeya, usi Meronota, aki ulami wa punda; Jaziza, usi Hangara, aki ulami wʼekoko.

³¹ Waso tshe waki, alami wa diango dia khumʼekanga Davidi.

³² Jonatana, onʼa onangu Davidi, aki undaki, kanga ewu, ndu ufundji; ndi la Jehiyele, onʼa Hakimoni, waki ekimanyidi wʼana wa khumʼekanga;

³³ Ahitofele aki undaki wa khumʼekanga; Hushai, usi Arka, aki ongenyi wa khumʼekanga.

³⁴ Lʼokongo wa Ahitofele, Jehoyada, onʼa Benaya, la Abiyatara, wakayala andaki. Joaba aki umbuledi wʼului wʼalimbi wa khumʼekanga.