1 Ekondo 26 - La Bible en Otetela (Bible K'Ekila) 1991

Alami wʼAsuku la Tupita Tawo

¹ Lanʼeli elui wʼalami wʼasuku. Uma le asika Kora: Meshelemiya, onʼa Kora uma lu diuhu dia Asafu.

² Ana apami wa Meshelemiya ane: Zekariya, ona lʼenundu; Jediyaele, la hend; Zebadiya, la satu; Jateniyele, la nei;

³ Elame, la tanu; Jehohanana, la samalu; la Eliyehoenai, lʼesambeli.

⁴ Ana apami wa Obede-Edome ane: Shemaya, ona lʼenundu; Jehozabada, la hendi; Joa, la satu; Sakara, la nei; Netanele, la tanu;

⁵ Amiyele, la samalu; Isakara, lʼesambeli; Peuletai, lʼenanei, ne dia Unyashungu akotshokola.

⁶ Shemaya, onʼa Obede-Edome, akuti ana apami, wakuledi luudu la shewo, ne dia vo waki apami a wulu.

⁷ Ana apami wa Shemaya ane: Otini, Refaele, Obede, la Elezabada la anengewo, apami wa wulu, Elihu la Semakiya.

⁸ Waso tshe waki ana wa Obede-Edome. Vo la anʼawo la anengewo, waki apami wa wulu, wakeyaka ntsha ulimu; antu akumi asamalu la ahendi asika Obede-Edome.

⁹ Meshelemiya, anʼandi wʼapami, la anangu, apami a wulu waki yediko ya antu dikumi la enanei.

¹⁰ Ndu Hosa usika Merari omotshi akuti ana apami: Shimiri, uwandji (shi akawudji uwandji kuyanga ndi taki onʼa enundu),

¹¹ Hilikiya, la hendi; Tebaliya, la satu; Zekariya, la nei. Ana apami tshe ndu anangu Hosa, waki dikumi la asatu.

¹² Waso weli elui wʼalami wʼasuku, antu awo a wulu waki la okende wa namaka luudu la Latuyalaka, uku akalamaka anengewo.

¹³ Vo wakawaukela uwali, waki ndu wa tshitshe, uku khumbu ya washewo dikambu diʼasuku tshe.

¹⁴ Eukelu kʼuwali dikambu dia suku dia lʼehutwelu akandi Shelemiya, ku vo wakukela onʼandi Zekariya, undaki wʼololo, uwali. Ku ndi akandama uwali dia namaka suku dia lu leke la ngelʼa kushi.

¹⁵ Obede-Edome akandama uwali, dia namaka suku dia lu leke la diku dia kushi, la anʼandi, dia namaka luudu lʼeumbelu;

¹⁶ Shupima la Hosa, dia namaka suku dia Shalekete, lu mbuka kʼedelu. Elamelu kemotshi kaki lu welelo wa kekina.

¹⁷ Asi Lewi asamalu waki lu leke lʼehutwelu, anei la lushi la lushi lu leke la ngelʼa kushi, anei la lushi la lushi lu leke la diku dia kushi, la anei la luudu lʼeumbelu: ahendi wedi ahendi wedi.

¹⁸ Lu leke lʼedjelu, lene aki ekhuta, anei utsha lu mbuka, la ahendi lasuki lʼekhuta.

¹⁹ Waso waki elui wʼalami wʼasuku, wʼuma lʼatei wʼasika Kora ndu wʼasika Merari.

²⁰ Ahidja, usi Lewi omotshi, aki la okende wa namaka waumbelu wa luudu la Unyashungu, la waumbelu wa diango diʼekila.

²¹ Lʼatei wʼana wa Ladana, asi Ngereshona, wakatungo uma le Ladana, ewandji wa khumbu ya washewo asika Ladana, asi Ngereshona, waki Jehiyele,

²² la ana apami wa Jehiyele: Zetame la Joele, onangu. Vo mbakalamaka waumbelu wa luudu la Latuyalaka.

²³ Lʼatei wʼasika Amurama, asika Izehare, asika Heberona ndu asika Uziyele,

²⁴ Shebuele, onʼa Ngereshome, onʼa Mose, kaki olombodi wa ladiku a waumbelu.

²⁵ Uma lʼatei wʼanangu wakatungo uma le Eliyezere, lakuti Rehabiya, lakuti Jeshaya, lakuti Jorama, lakuti Zikiri, lakuti Shelomota.

²⁶ Shelomota ako, ndi la anangu waki la okende wa namaka waumbelu tshe wa diango diʼekila diakatakidisha khumʼekanga Davidi, ete wa khumbu ya washewo, ewandji wa nunu nunu la wa kama kama la elombodi wʼalimbi.

²⁷ Vo wakakidia diango dia dimbu diakawosaka lu ta, dia nongosola luudu la Latuyalaka.

²⁸ Eshasha tshe wakakidia Samuele, omenyi wʼakambu wahatayi, Saulu, onʼa Kishi, Abinere, onʼa Nere, la Joaba, onʼa Zeruya eshasha eso tshe wakakidiama, mbakalamaka Shelomite la anangu.

²⁹ Kenaniya, usi Izehare omotshi, la anʼandi wakatshi akambu wa lʼandja uku elombodi la embadi lu Isariyele.

³⁰ Lʼatei wʼasi Heberona, Hashabiya la anangu, apami a wulu, yediko ya kinunu la kama esambeli waki la okende wa namaka Isariyele lu wedi wa Jorodana, lu leke lʼedjelu lu akambu tshe wa Latuyalaka ndu lʼulimu wa khumʼekanga.

³¹ Jeridja, usi Heberona omotshi, aki uwandji wʼasi Heberona, uku aki nonga ya khumbu ya washewo. (Lʼeleku kʼakumi anei ka diulelu dia Davidi, antu wakayangi asi Heberona ako, ku wakatatana apami weya ntsha akambu lʼatei awo la Jazera ya la Ngibiyade.)

³² Khumʼekanga Davidi akawusha, ndi la anangu, antu nunu pendi la kama esambeli, apami weya ntsha akambu, ete wa khumbu ya washewo, okende wa namaka akambu wa Unyashungu la wa khumʼekanga lʼatei wʼasi Rubena, wʼasi Ngada, la wa etenyi ka hendi kʼasi Manase.