1 Ekondo 23 - La Bible en Otetela (Bible K'Ekila) 1991

¹ Davidi akayala usumbi a lukusumbi, akunduya andja. Ndi akadji onʼandi Solomona, khumʼekanga lu Isariyele.

Ekahanyelu kʼAsi Lewi la Elimu awo

² Ndi akasanganya ewandji tshe wa Isariyele, elombedi, la asi Lewi.

³ Vo wakali asi Lewi, waki la deku akumi asatu pulu ladiku. Vo wakali untu lʼuntu, ku vo wakatanema yediko yʼantu nunu akumi asatu la enanei.

⁴ Davidi akati ati: Antu nunu akumi ahendi la nei uma lʼatei awo, wayuyala la okende wa namaka ulimu wa luudu la Latuyalaka, antu nunu samalu wa ndjala elohe la embadi;

⁵ antu nunu nei dia ndjala alami wʼasuku, anʼu nunu nei dia nemiaka Latuyalaka la dihumahuma diakamatshi dia mbutumbula.

⁶ Davidi akakahanya lu beke uku aki ana wa Lewi: Ngereshome, Kohata la Merari.

⁷ Asika Ngereshome ane: Ladana la Shimei.

⁸ Ana apami wa Ladana ane: Uwandji Jehiyele, Zetame la Joele, asatu.

⁹ Ana apami wa Shimei ane: Shelomota, Haziyele, la Harana, asatu. Aso weli ete wa mvudu ya washewo uma lu khumbu ka Ladana.

¹⁰ Ana apami wa Shimei ane: Jahata, Zina, Jeushe la Beriya. Aso anei weli ana wa Shimei.

¹¹ Jahata aki uwandji, la Ziza divwa diandi. Keli Jeushe la Beriya kumbuta ana apami efula, diako mbakawalema uku luudu otoi lu khumbu ka washewo.

¹² Asika Kohata ane: Amurama, Izehare, Heberona la Uziyele, anei.

¹³ Ana apami wa Amurama ane: Arona la Mose. Arona akakidiama dia ndi nkidiaka diango diuleki ekila, ndi la tukanula tandi pundju; la dia ntshumbaka malashi wʼupumu wʼololo la ntundu ka Latuyalaka dia mbutshelaka ulimu, la dia ntumbulaka lukumbu landi pundju.

¹⁴ Keli lu dikambu dia Mose, umvutshi a Unyashungu, anʼandi wʼapami wakalema lʼatei a wudja wa Lewi.

¹⁵ Ana apami wa Mose ane: Ngereshoma la Eliyezere.

¹⁶ Ona pami a Ngereshoma one: Shebuele, uwandji.

¹⁷ Ana apami wa Eliyezere ane: Rehabiya, uwandji; Eliyezere kumbuta ana apami akina, keli ana apami wa Rehabiya waki efula.

¹⁸ Ana apami wa Izehare ane: Shelomita, uwandji.

¹⁹ Ana apami wa Heberona ane: Jeriya, uwandji; Amariya la hendi; Jahaziyele, la satu, la Jekameame, la nei.

²⁰ Ana apami wa Uziyele ane: Mika, uwandji, la Ishiya, la hendi.

²¹ Asika Merari ane: Mali la Mushi. Ana apami wa Mali ane: Eleazara la Kishi.

²² Eleazara akavu, kumbuta ana wʼapami, paka wʼamantu atu. Ku anengewo ana apami wa Kishi wakatsʼiuki.

²³ Ana apami wa Mushi ane: Mali, Edere, la Jeremote, asatu.

²⁴ Aso waki asi Lewi uku khumbu ya washewo, ete wa khumbu ya washewo uma lʼatei a waku wakawali kumbu untu lʼuntu. Wane waki la deku akumi ahendi pulu ladiku, mbakatshaka ulimu wa luudu la Latuyalaka.

²⁵ Davidi akati ati: Latuyalaka, Unyashungu wa Isariyele, ambusha wudja andi mumuya, la ndi ayudjaseka la Jerusalema pundju.

²⁶ Lʼasi Lewi hawuyala la ulimu wa memba etemwelo ka dipema la diango diato tshe diʼulimu ntu.

²⁷ Aui wʼekumelu wa Davidi waki dia mbala asi Lewi waki la deku akumi ahendi pulu ladiku.

²⁸ Okende awo waki dia nkimanyia ana wa Arona lʼulimu wa luudu la Latuyalaka lu aseke, lu mvudu ya mbetama ndu lu edielo ka diango diʼekila, ndu elimu wa luudu la Unyashungu,

²⁹ dia ma dia lenya, dia shima ka pudipudi ne dia ulambu wa shima, ekama waha la edya, ekati kana ekati wakaloyama lʼiso, la dia wehu tshe wa tediko ta mbedika diango.

³⁰ La dia ndjakaka pindju ndu dikolo dia ndjandulaka, la mbukaka Latuyalaka lusaka.

³¹ Dia nambulaka Latuyalaka elambu tshe wa lutshumba tena tshe lu nshi ya mumuya, lu nshi ya talelu ta ngondo, lu nshi ya waki uku efula kawo kakawadjanga.

³² Vo wayulamaka luudu lʼesanganelu la dipema la dihuli diʼekila, wayukimanyiaka anengewo ana wa Arona dia vo ntshaka ulimu wa lu luudu la Latuyalaka.