1 Ekondo 22 - La Bible en Otetela (Bible K'Ekila) 1991

¹ Ku Davidi akati ati: Onʼeli luudu hi la Unyashungu, Latuyalaka, ndu one eli ediakelu kʼelambu wa lutshumba dikambu dia Isariyele.

Davidi Ambomotsha Diango dia Ntsha Otemwelo

² Davidi akasanganya angendangenda waki lu kete ya Isariyele, akasha ambatshi wʼave okende wa nongosola ave wa mpika luudu la Unyashungu.

³ Ndi akatshi ndu mbulu efula ndu seti ya kuki, ya lu asuku, ndu ne dia tukengeti, ehotela efula wuhu waki kunkuka mbedikema,

⁴ la etamba wʼesasi waheyama mbala, ne dia asi Sidona la asi Tura wakela Davidi etamba wʼesasi efula efula.

⁵ Davidi akati ati: Onʼami Solomona eki dikenda ndu atakikitala, la luudu layuwuhikela Latuyalaka, layuyala dimena dia mamba la lukumu la lutumbu lu kete tshe, diako mbalangami ntukitshisha diango diʼulimu. Ku Davidi akatshi diango diʼulimu efula la ntundu ka nyoi kandi.

⁶ Davidi aketi onʼandi Solomona, akawusha okende wa mpikela Latuyalaka, Unyashungu wa Isariyele, luudu.

⁷ Davidi akatela Solomona ati: Onʼami, dimi laki la pusa ka mpika luudu la lukumbu la Latuyalaka, Unyashungu ami.

⁸ Keli diui dia Latuyalaka dial ayi le mi ati: We akatshulula dikila efula, ndu akalo ata a waki. We huhika luudu la lukumbu lami, ne dia we akatshulula dikila efula la kete la ntundu kami.

⁹ Enda, we ayuta ona pami omotshi, layuyala la la mumuya. Dimi layuwusha mumuya uma le atunyi andi tshe wudingi; ne dia Solomona (kitshimudi ati: Ki), kayuyala lukumbu landi. Dimi layela ki, la lutui tshitshi lu Isariyele lu nshi ya lumu landi.

¹⁰ Ndi kayuhika luudu lu lukumbu lami. Ndi ayuyala onʼami, la dimi layuyala shi. Dimi layushikike kiti ka diulelu diandi lu Isariyele pundju.

¹¹ Kakiane, onʼami, Latuyalaka ayali la ye, dia we ngona ndu dia we mpika luudu la Latuyalaka, Unyashungu aye, uku akandati lu dikambu diaye.

¹² Dikambu otoi, Latuyalaka akusha yimba la ewu, ndu akusha okende dikambu dia Isariyele. Osoku we ayeya nama elembe wa Latuyalaka, Unyashungu aye.

¹³ Ku we ayongona, naka we ayulamaka elembe la adjangu wakadjela Latuyalaka Mose dikambu dia Isariyele. Ukikitali, uyali la dihunga. Tukaki woma, kuyanga mbate asulu.

¹⁴ Kakiane, enda, lu pa kami lambolongoswela luudu la Latuyalaka talata ya paunyi nunu lukama, la talata ya fesa miliyona otoi, la efula ka ehotela, la ka mbulu kaheyama mbedika; ne dia yo yeko efula. Dimi lakalongosola ndu etamba lʼave, we kuyukutsha.

¹⁵ We eko la asi ulimu efula, ambatshi wʼave, ambiki wa mvudu yʼave, etshudi wʼabaya, la apami wa tumba lu wehu wʼelimu tshe.

¹⁶ Paunyi, fesa, ehotela la mbulu, yeko efula kaheyama mbala. Unela, utshi; Latuyalaka ayali la ye.

¹⁷ Davidi akatela ewandji tshe wa Isariyele dia vo ndjukimanyia onʼandi Solomona, akawambula ati:

¹⁸ Undi, Latuyalaka, Unyashungu anyu kema kame la nyu, ndu kunyusha mumuya uma lu beke tshe? Ndi akakimo akanga a kete lu anya ami, la kete yakalembiama la ntundu ka Latuyalaka, ndu la ntundu ka wudja andi.

¹⁹ Kakiane, nyudji etema anyu la nyumu yanyu dia nyanga Latuyalaka, Unyashungu anyu. Nyuneli, nyuhiki etemwelo ka Latuyalaka, Unyashungu, dia mbela oshete andi wa sheki ndu diango diandi diʼulimu diʼekila, lu luudu layunyuhika lu lukumbu la Latuyalaka.