1 Ekondo 20 - La Bible en Otetela (Bible K'Ekila) 1991

Davidi Ambolembia Raba

¹ Lʼetatelu kʼeleku, lʼetena katutshokaka khumi ya dikanga lu ta, Joaba akatshu lʼului a wulu wʼalimbi, akatohenyahenya asi Amona, akatudinga Raba. Keli Davidi akatshikala la Jerusalema. Joaba akalo la usumba wa Raba, akolembia.

² Davidi akahula dembo dia kusu uma lʼote wa khumʼekanga kawo. Dembo dia kusu diako aki la wutshu wa talata otoi ka paunyi, ndu dio diakalengami la dive diʼushinga a wulu. Wakadiahe lʼote wa Davidi, ku ndi akatuya la diango dia dimbu efula uma lʼusumba.

³ Ndi akayi lʼantu wʼuma leko dia vo mbataka abaya, nkambaka la kungu, ndu la tokenge. Osoku mbakatshela Davidi esumba tshe wʼasi Amona. Ku Davidi la antu tshe wakakalula la Jerusalema.

Asika Davidi Wambudiaka Akunguti

⁴ Lʼokongo wʼakambu aso, ta diakayala ntu lʼasa asi Isariyele la asi Filistiya la Ngezere. Ku Sibekai, usi Husha, akadiaki Sipai, otoi omotshi uma lʼatei tukanula tʼakunguti. Ku wakalembia asi Filistiya.

⁵ Wakalo lʼasi Filistiya ntu. Ku Elehanana, onʼa Jayira, akadiaki Lami, onangu Ngoliyate, usi Ngata, lakakimelaka dikonga diaki la ulanga uku ukanda wa nto asami.

⁶ Wakalo ta ntu la Ngata, lene aki pami kemotshi ka dihanoki, kaki la pita shamalu shamalu ndu lʼanya ndu lʼekulu, tshe kame akumi ahendi la nyei, ndu ndi akatongo uma lu diuhu diʼakunguti.

⁷ Ndi akadji Isariyele tofwefwe, ku Jonatana, onʼa Shimea, onangu Davidi, akudiaki.

⁸ Antu anei aso waki tukanula tʼakunguti wa la Ngata. Ku Davidi la ekambi andi wakadiaki.