1 Ekondo 19 - La Bible en Otetela (Bible K'Ekila) 1991

Elembelo kʼAsi Amona la Asi Suriya

¹ Lʼokongo wʼakambu ane, Nahashi, khumʼekanga kʼasi Amona, akavu. Ku onʼandi Hanuna akulela lu dihuli diandi.

² Davidi akati ati: Dimi layutshela Hanuna, onʼa Nahashi, ololo, ne dia shi akantshelaka ololo. Okone Davidi akatumi akendji dia ntnsamba lu nyoi ka shi. Ku ekambi wa Davidi wakakumi lu kete yʼasi Amona le Hanuna, dia mbusamba.

³ Keli ewandji wʼasi Amona wakambula Hanuna vati: We nkanaka wati: Davidi ambukutumela antu ane dia ndjukusamba lu nyoi ka sho? Aha dia ndjulimbitela, la ndjukemba usumba ne dia ndjulanya, mbutumindi ekambi andi le ye?

⁴ Hanuna akandi ekambi wa Davidi, akâhelola ndedu, akawatela ahondo, akatshiki asoko lʼandja, ku ndi akakendja.

⁵ Ku antu amotshi wakatutela Davidi uku akawatshela antu ane, ku ndi akatumi antu dia ntalungula, ne dia vo waki la sonyi efula. Khumʼekanga akatumela diui ati: Nyutshikali la Jeriko edja ndu lamʼayomena ndedu yanyu, ku nyu ndja.

⁶ Lamʼakenyi Hanuna la asi Amona vati: Shu tambuyaete atunyi wa Davidi, vo wakatumi talata ya fesa kinunu ntamba pusupusu ya ta la ambahemi wa falasa uma la Mesopotamiya, uma la Arama-Maka, ndu uma la Zoba.

⁷ Vo wakatamba pusupusu ya ta nunu akumiasatu la pendi, ndu khumʼekanga ka Maka akayi ndi la antu andi, wakayuhanga la ntundu ka Medeba. Ndu asi Amona wakayasanganya uma lʼesumba awo, wakayi lu ta.

⁸ Lamʼakuki Davidi dikambu so, ndi akatumi Joaba la ului andi tshe wʼalimbi, apami wa wulu.

⁹ Asi Amona wakatumbi, wakayalonge lʼenongo wa ta lʼeotwelo kʼusumba. Ku khumi ya dikanga yakayi waki lu leke lukina lʼusui vame.

¹⁰ Lamʼakenyi Joaba ati: Wuyanga ntuhake lʼatei, wane la ntundu wane lʼokongo, ndi akasonola alimbi wa Isariyele tshe wuleki wulu, akalonge lʼenongo dia ndo lʼasi Suriya.

¹¹ Ndi akakimo alimbi wakatshikala le Abishai, onangu, akalonge lʼenongo dia vo ndo lʼasi Amona.

¹² Ndi akatela Abishai ati: Naka asi Suriya wambundeka wulu, kuyi dia ndjunkimanyia. Keli naka asi Amona wamhukuleka wulu, dimi layuya dia ndjukukimanyia.

¹³ Ukikitali, tenya wudja asu la esumba wa Unyashungu asu dihunga. Ku Latuyalaka katshi uku alangandi.

¹⁴ Okone Joaba la antu waki la ndi wakatshu dia ntolo la asi Suriya, ku vo wakulawo.

¹⁵ Lamʼakenyi asi Amona vati: Asi Suriya wambulawo, ndu vo wakalawo Abishai, onangu, wakatoto lʼusumba. Ku Joaba akakalula la Jerusalema.

¹⁶ Lamʼakenyi asi Suriya vati: Asi Isariyele wakatowedi, vo wakatumi akendji dia nteta asi Suriya waki la wedi wa Eyufarate. Ku Shofaka, umbuledi wʼalimbi wa Hadarezere, kaki umbuledi awo.

¹⁷ Wakayutela Davidi dikambu so. Ku ndi akasanganya Isariyele tshe, akateho Jorodana. Ndi akasukana utsha le wo, akayalongosola dia ndo la wo. Lamʼakashili Davidi ndjalongosola dia ndo la asi Suriya, vo wakalo la ndi.

¹⁸ Ku asi Suriya wakalawo Isariyele. Davidi akadiaki ambahemi wa pusupusu ya ta nunu esambeli, la alimbi watokendakendaka lʼekulu nunu akumi anei. Ndi akadiaki ndu Shofaka, umbuledi awo.

¹⁹ Lamʼakenyi ekambi wa Hadarezere vati: Isariyele wambutowela, vo wakalembela Davidi, wakayala lʼokongo andi. Okone asi Suriya kunanga nkimanyia asi Amona ntu.