1 Ekondo 16 - La Bible en Otetela (Bible K'Ekila) 1991

¹ Lamʼakawela oshete wa Unyashungu, wakukitsha lʼatei a luudu la dipema lakuhikela Davidi. Vo wakalambula elambu wa lutshumba la ntundu ka Unyashungu ndu elambu wa ki.

² Lamʼakashidiya Davidi nambula ulambu wa lutshumba la elambu wa ki, ndi akatshokola antu lu lukumbu la Latuyalaka.

³ Ndi akasha asi Isariyele tshe ndu apami ndu amantu, untu lʼuntu ukama wa ma, la funda ka nyama, la ukama wʼelua wa vinyo ya weumu.

⁴ Davidi akasha asi Lewi ane okende wa ntsha ulimu la ntundu kʼoshete wa Latuyalaka, la dia ntemolaka, mandulaka la mbukaka Latuyalaka, Unyashungu wa Isariyele, lusaka:

⁵ Asafu, olombodi; Zekariya, divwa diandi, Jeyele, Shemiramota, Jehiyele, Matitiya, Eliyabe, Benaya, Obede-Edome la Jeyele, kame la akembi la sese; ndu Asafu la ekokoloko wakandayahelenganyaka;

⁶ elombedi Benaya la Jahaziyele wakayakolamelaka mvuda amama la ntundu kʼoshete wa sheki wa Unyashungu.

Usambu wa Davidi wʼEukelu ka Lusaka

⁷ Lu lushi lake, Davidi akatatela mbisha Asafu la anʼandi okende wa mandulaka Latuyalaka lʼesambu.

⁸ Nyuki Latuyalaka lusaka, nyotemole lukumbu landi! Nyulimbitshiya wedja etsha andi wa mamba!

⁹ Nyuwimbeli esambu, nyuwimbeli esambu wa nemo! Nyotekete dia akambu andi wa mamba tshe!

¹⁰ Nyuyatumbuli lu lukumbu landi lʼekila! Etema a wane watuyangaka Latuyalaka wangenengene!

¹¹ Nyuyangi Latuyalaka la wulu andi, Nyokolameli nyanga elundji kandi!

¹² Nyuho etsha wa mamba wakandatshi, Akambu andi wa mamba, la dumbwelu uma lʼunyo andi,

¹³ Nyu tukanula ta Isariyele, ukambi andi, Nyu ana wa Jakoba, esonami andi!

¹⁴ Ndi eli Latuyalaka, Unyashungu asu; Dumbwelu diandi dieko lu kete tshe.

¹⁵ Nyuhoki sheki yandi nshi tshe, Alaka andi le nonga kinunu,

¹⁶ Sheki yakandadji lʼAbarahama, la etshibelu kakandatshibela Isaka,

¹⁷ Sheki yakandashikike le Jakoba uku olembe, Le Isariyele uku daka dia pundju,

¹⁸ Ati: Layukusha kete ya Kanana Uku etenyi kaye kʼukito.

¹⁹ Lamʼakiwo djui ya tshitshe, Vo waki djui yuleki tshitshe la angendangenda lu kete,

²⁰ Vo wakatekekoka uma lu wudja la wudja, Uma lu diulelu dimotshi utsha lu diulelu dikina.

²¹ Keli Latuyalaka kumbetawo untu mbatshela kolo, Ndi akasuya khumi ya dikanga lu dikambu diawo,

²² Ati: Tanyunandaki akitami ami wʼiso, Tanyutshelaki amvutshi ami kolo!

²³ Nyimbeli Latuyalaka esambu, nyu wa la kete tshe! Nyulimbitshiyaki antu panda kandi la lushi la lushi;

²⁴ Nyusanya lutumbu landi lʼatei a wedja, Etsha andi wa mamba lʼatei a antu tshe!

²⁵ Ne dia Latuyalaka keli wuki, ndi kuleki nkuka dia ntumbwama! Ndi keli woma ladiku dia ditemolatemola tshe;

²⁶ Ne dia ditemolatemola tshe dia wedja, dikishi mbedio, Keli Latuyalaka akatungi ulungu.

²⁷ Lutumbu la nemo weko la ntundu kandi, Wulu la ongenongeno weko lu edjaselu kandi.

²⁸ Nyanduli Latuyalaka, nyu khumbu ya wedja, Nyanduli Latuyalaka ne dia lutumbu landi la wulu andi!

²⁹ Nyutumbuli Latuyalaka ne dia lukumbu landi! Nyela elambu, nyuyi la ntundu kandi, Nyotemole Latuyalaka lʼotemwelo wuleki dimena wa shikaa!

³⁰ Nyudidimi la ntundu kandi nyu asi kete tshe! Ndu andja ambushikikala, wuhu wahaweyi nsukasuka.

³¹ Ulungu angenengene, kete aluli too lʼongenongeno! Wataki lʼatei a wedja tshe vati: Latuyalaka uleli!

³² Ashi a waki wadikiti kame la diango tshe dieli loko! Usui la wane watudjaseka loko, wangenengene!

³³ Ku etamba wa lʼekunda wimbi esambu lʼongenongeno la ntundu ka Latuyalaka Ne dia ndi uyayi dia ndjulumbuya kete.

³⁴ Nyuki Latuyalaka lusaka, ne dia ndi eli ololo, Ne dia ngandji kandi ka mamba katuyalaka pundju!

³⁵ Nyuti ntu nyati: Utushimbeli, we Unyashungu, panda kasu, Utusanganya kame, ututundja uma lʼatei a wedja, Dia shu mbuka lukumbu laye lʼEkila lusaka La dia shu ndeka nkutumbula.

³⁶ Latuyalaka Unyashungu wa Isariyele atumbwami, Pundju pundju! Antu tshe wati vati: Ayali osoku! Nyanduli Latuyalaka.

Wambusha Asi Lewi Okende wʼOshete wa Sheki

³⁷ Ku Davidi akatshiki Asafu la anangu leko la ntundu kʼoshete wa sheki wa Latuyalaka dia vo ntshaka lutumu la la lushi la lushi la ntundu kʼoshete;

³⁸ ndu Obede-Edome, kame la anangu akumi asamalu lʼenanei; la Obede-Edome, onʼa Jedutuna, la Hosi dia ndjala alami wʼasuku.

³⁹ Ndi akakitsha olombedi Zadoka la elombedi, anangu, la ntundu ka etemwelo ka dipema ka Latuyalaka lu dihuli dia ladiku, diaki la Ngibiyona,

⁴⁰ dia nambulaka Latuyalaka elambu wa lutshumba pindju la dikolo lʼediakelu kʼelambu wa lutshumba, uku akafundama lu elembe wa Latuyalaka, wakandadjela Isariyele.

⁴¹ Ndu Hemana, Jedutuna, la akina wakasonwama ndu wakawafundama kumbu dia mbukaka Latuyalaka lusaka, ne dia ngandji kandi ka mamba katutshikalaka pundju.

⁴² Hemana la Jedutuna waki kame la wo la amama ndu la ekokoloko ne dia wane wakatehelenganyaka, la dihumahuma ne dia esambu wa nemia Unyashungu. Ana apami wa Jedutuna waki aiami wa asuku.

⁴³ Ku antu tshe wakakalula utsha la wakawo, ndu Davidi akakalula lakandi dia ntotshokola khumbu kandi.