1 Ekondo 15 - La Bible en Otetela (Bible K'Ekila) 1991

Wambela Oshete wa Sheki Uya la Jerusalema

¹ Davidi akayahikela mvudu lʼusumba wa Davidi. Ndi akalongoswela oshete wa Unyashungu dihuli, akutshela luudu la dipema.

² Davidi akati ati: Untu kʼuntu hakuki memba oshete wa Unyashungu, paka asi Lewi atu, ne dia Latuyalaka akasonola dia vo membaka oshete wa Unyashungu, la dia mbutshelaka ulimu pundju.

³ Davidi akasanganya asi Isariyele tshe la Jerusalema, dia mbela oshete wa Latuyalaka uya lu dihuli diakandolongoswela.

⁴ Davidi akasanganya ana apami wa Arona la asi Lewi ane:

⁵ Uma le asika Kohata, Uriyele, uwandji, la anangu lukama la akumi ahendi;

⁶ uma le asika Merari, Asaya, uwandji la anangu kama hyendi la akumi ahendi;

⁷ uma le asika Ngereshome, Joele, uwandji, la anangu lukama la akumi asatu,

⁸ uma le asika Elizafana, Shemaya, uwandji, la anangu kama hyendi;

⁹ uma le asika Heberona, Eliyele, uwandji, la anangu akumi enanei;

¹⁰ uma le asika Uziyele, Aminadaba, uwandji, la anangu lukama la dikumi la ahendi.

¹¹ Davidi aketi elombedi Zadoka la Abiyatara, la asi Lewi: Uriyele, Asaya, Joele, Shemaya, Eliyele la Aminadaba.

¹² Ndi akawatela ati: Nyu mbeli ete wa khumbu yʼasi Lewi. Nyuyakidia, nyu la anengenyu, dia nyu ntela oshete wa Latuyalaka, Unyashungu wa Isariyele, uya lu dihuli diakamolongoswela.

¹³ Uma lu dikambu diakinyu kuntsho etena ka ntundu, mbakatusuya Latuyalaka, Unyashungu asu, ne dia shu kumbumbula uku olembe.

¹⁴ Okone elombedi la asi Lewi wakayakidia dia ntosa oshete wa Latuyalaka, Unyashungu wa Isariyele.

¹⁵ Asi Lewi wakatemba oshete a Unyashungu lʼesembe lʼaheka, uku diui dia Latuyalaka lʼunyo wa Mose.

¹⁶ Davidi akatela olombodi wʼasi Lewi dia ndi nonga anengewo amimbi kame la dihumahuma diawo, akembe, sese la ekokoloko dia vo mpuma shamanya la mimba lʼongenongeno.

¹⁷ Okone asi Lewi wakasonola Hemana, onʼa Joele, Asafu, onangu omotshi, onʼa Berekiya; uma le asika Merari, onengewo omotshi, Etana onʼa Kushaya;

¹⁸ vo la anengewo wa lʼonongo a hendi: Zekariya, Bena, Jaziyele, Shemiramota, Jehiyele, Uni, Eliyabe, Benaya, Maseya, Matitiya, Elefelehu, la Mikineya, ndu alami wʼasuku Obede-Edome la Jeyele.

¹⁹ Emimbi ene: Hemana, Asafu, la Etana wakakimela ekokoloko wʼehotela dia vo ntekokolaka.

²⁰ Zekariya, Aziyele, Shemiramota, Jehiyele, Uni, Eliyabe, Maseya, la Benaya wakakimela akimbi wakahumi lu diui dia Alama;

²¹ Matitiya, Elifelehu, Mikineya, Obede-Edome, Jeyele, Azaziya wakakimela sese wakayihumi lu diui dia Shemina dia nombola esambu.

²² Kenaniya, olombodi wʼasi Lewi, akatalombolaka esambu, ne dia ndi akaweyaka efula.

²³ Berekiya la Elekana waki alami wa suku diʼutsha lʼoshete va sheki.

²⁴ Elombedi: Shebaniya, Joshafata, Netanele, Amasai, Zekariya, Benaya la Eliyezere wakatadaka amama la ntundu ka oshete wa Unyashungu. Obede-Edome la Jehiya waki alami wa suku diʼutsha lʼoshete wa sheki.

²⁵ Ku Davidi, dihangamendi dia Isariyele la elombodi wʼantu nunu nunu wakatshu lʼongenongeno dia ntosa oshete wa sheki wa Latuyalaka uma lu luudu la Obede-Edome.

²⁶ Lamʼakakimanyiaka Latuyalaka asi Lewi wakayembaka oshete wa sheki wa Latuyalaka, vo wakulambula esongo wa ngombe esambeli la ekoko a waumi esambeli.

²⁷ Davidi akalote ukutu wa linene wʼololo. Ndu asi Lewi tshe wakayembaka oshete wa sheki, amimbi, la Kenaniya, olombodi wʼesambu lʼatei wʼamimbi, wakalote pupu. Davidi akalote ndu ukutu wa nemo wa linene.

²⁸ Okone Isariyele tshe wakela oshete wa sheki wa Latuyalaka, wayadji aelu wʼongenongeno, wayadi pungi la amama, wayahumi ekokoloko, wayahelenganya akembi la sese.

²⁹ Lamʼakakumi oshete wa sheki wa Latuyalaka lʼusumba wa Davidi, Mikale, ona umuntu a Saulu, akendaka lu didishi, enyi ku khumʼekanga Davidi one ayalimbolimbo la wenye. Ku ndi akawonyola lʼutema.