1 Ekondo 14 - La Bible en Otetela (Bible K'Ekila) 1991

Hirame Ambeya Davidi

¹ Hirame, khumʼekanga ka Tura, akatumi akendji le Davidi kame la etamba wʼesasi, ambiki wa mvudu yʼave la etshudi wʼabaya dia ntuhikela luudu.

² Davidi akalimbitela ati: Latuyalaka ambunshikike khumʼekanga ka Isariyele, ndu ndi ambedia diulelu diami dikambu dia wudja andi Isariyele.

Ana Wakatuta Davidi la Jerusalema

³ Davidi akatutshuka wadi akina la Jerusalema. Ku ndi akamututa ana apami la ana amantu.

⁴ Kumbu yʼana wakandatuta la Jerusalema nye: Shamua, Shobaba, Natana, Solomona,

⁵ Jibare, Elishua, Elefelete,

⁶ Nonga, Nefenge, Jafiya,

⁷ Elishama, Beliyada la Elifelete.

Davidi Ambolembia Asi Filistiya

⁸ Lamʼakuki asi Filistiya lukumu ati: Wakakiti Davidi iso, dia ndi ndjala khumʼekanga ka Isariyele, vo tshe wakayi dia ndjuyanga. Lamʼakuki Davidi dikambu so, ndi akatshu dia ntuhumana la wo.

⁹ Asi Filistiya wakakumi, wakakukanela lʼukidi wa Refayima.

¹⁰ Ku Davidi akambula Unyashungu ati: Ntshu dia ntolo lʼasi Filistiya? We ayakimo lu anya ami? Ku Latuyalaka akûkaluya diui ati: Tshoka, dimi layakimo lu anya aye.

¹¹ Davidi la asikandi wakatshu la Bala-Perazina. Ndi akatolembia asi Filistiya leko. Ku ndi akati ati: Unyashungu akahandjudi atunyi ami vwa la lunya lami, uku ashi mbakela. Diako mbakawole dihuli diako lukumbu ati: Bala-Perazima.

¹² Asi Filistiya wakatatshiki ditemolatemola diawo leko, ku dio diakatshumbama uku akadjanga Davidi.

¹³ Asi Filistiya wakayukukanela lʼukidi ntu.

¹⁴ Davidi akambula Unyashungu ntu. Ku Unyashungu akûkaluya diui ati: Tutshoki lu welelo awo, keli utshimbi uma lʼokongo awo. Ku we ayukuma la le wo lasuki lʼetamba wʼelombi.

¹⁵ Lamʼayuyuka luhelu ladiku diʼetamba wʼelombi, kutumbi dia ntolo la wo ta, ne dia Unyashungu ambeta la ntundu ka ye dia ntolembia alimbi wʼasi Filistiya.

¹⁶ Davidi akatshi uku akawutela Unyashungu, ku vo wakatalembia alimbi wʼasi Filistiya uma la Ngibiyona pulu ndu la Ngezere.

¹⁷ Lukumu la Davidi lakadiangana lu kete tshe. Latuyalaka akawete engo ka woma le wedja tshe.