Matius 28 - Kaili Ledo

I Yesus natuvu mpanjili

¹ Naliu eo penonto, dopame nebonda eo, ri eo Aka hau i Maria Magdalena bo i Maria ntanina manggita dayo i Yesus.

² Sampesani naria lingu mbaso sabana malaeka nTupu nanau lako ri suruga nombaduliaka vatu poupi dayo. Naupu haitu nonturomo ia ri bavona.

³ Lenjena nenggila mpo kila, pakeana naputi mpuu.

⁴ Tantara-tantara anu nojaga ri sia naeka mpuu sampe nolete-lete njumanggaro. Nadunggamo ira najadi eva tomate.

⁵ Bo nanguli malaeka haitu ka mombine-mombine, “Nee maeka. Nisaniku komiu nangelo i Yesus anu namate nipaku ri kayu salib.

⁶ Ia domo ria ri sii. Natuvu mpanjilimo Ia nangoseaka anu niuliNa bara ipia. Kamaimo peinta ponturo nipomboli karobataNa.

⁷ Bo koimo masalisa ulika ana-anaguruNa natuvu mpanjilimo Ia. Ia mokolu ka komiu hau ri bagia Galilea. Hamai rakitamiu Ia. Toramo anu nitesaku ka komiu!”

⁸ Jadi nalaimo ira nasalisa lako ri dayo. Naeka ira tapi nadamba muni rarara. Nangovamo ira hau manguli anu najadi ka ana-anaguru i Yesus.

⁹ Sampesani nariamo i Yesus nosintomuka ira bo nanguli, “Tabe.” Ira nanggaparai Ia bo nanggapui kadaNa mombasomba Ia.

¹⁰ Nanguli i Yesus ka ira, “Nee maeka. Koi ulika sampesuvu-sampesuvuKu hau ri Galilea. Hamai rakitara Yaku.”

Tesa nipatolele tantara-tantara anu nombajagai dayo i Yesus

¹¹ Nalaipa mombine-mombine pangane, bara sako-ndua tantara topojaga dayo haitu hau ri ngata nombatesaki ka balengga-balengga ntopanggeni pesomba anu najadi ri dayo pangane.

¹² Balengga-balengga ntopanggeni pesomba nasiromu nolibu ante totua-totua ntoYahudi. Bo ira nasituju mombapepe doi dea ka tantara-tantara haitu.

¹³ Niulira ka tantara haitu, “Ulimiu ivei: ‘Tanga bongi pangane nakavamo topangoseaka i Yesus nangangga karobataNa tempo kami namonjo.’

¹⁴ Ane Gubernur mangepe tesa haitu, damo kami motesa ka ia komiu ledo nasala, ala ledo makuya-kuya komiu.”

¹⁵ Jadi tantara-tantara nangala doi haitu bo nitesa-tesara anu nitudu ka ira. Bo tesa tantara-tantara haitu batena nipatolele ri tatanga ntoYahudi sampe sii-sii.

I Yesus nantudu anaguruNa mompatolele Kareba Belo

¹⁶ Bo haumo sapulu saito anaguru i Yesus ri sangu bulu ri bagia Galilea anu nipakatantu i Yesus ka ira.

¹⁷ Hamai nikitara mpuu Ia bo nantaputu ira mombasomba Ia. Tapi naria sanu nonggai rarara.

¹⁸ I Yesus nanggaparai ira bo nanguli, “Pura-pura kuasa ri suruga bo ri dunia nidekei ka Yaku.

¹⁹ Jadi koimo komiu, hau ri umba-umba ri dunia, mompatuduki tona lako ri umba-umba ngata majadi topangoseaka Yaku. Diumo ira ante kuasa nTuamata Alatala, Yaku AnaNa, bo Nosa Gasa.

²⁰ Patudukimo ira ala raoseakara pura-pura anu niparentaKu ka komiu. Bo toramo! Yaku bate-batena mosanggani-nggani ante komiu sampe ri kaupu dunia.”