Matius 1 - Kaili Ledo

Sunju nu muli ntotua i Yesus Kristus

¹ Iveimo sunju nu muli ntotua i Yesus Kristus, muli Magau Daud, muli i Abraham:

² i Abraham nomulika i Ishak, i Ishak nomulika i Yakub, i Yakub nomulika i Yehuda ntali sampesuvu,

³ i Yehuda nomulika i Peres bo i Zerah (tinara i Tamar), i Peres nomulika i Hezron, i Hezron nomulika i Ram,

⁴ i Ram nomulika i Aminadab, i Aminadab nomulika i Nahason, i Nahason nomulika i Salmon,

⁵ i Salmon nomulika i Boas (tinana i Rahab), i Boas nomulika i Obed (tinana i Rut), i Obed nomulika i Isai,

⁶ i Isai nomulika Magau Daud, Magau Daud nomulika i Salomo (tinana timbala i Uria),

⁷ i Salomo nomulika i Rehabeam, i Rehabeam nomulika i Abia, i Abia nomulika i Asa,

⁸ i Asa nomulika i Yosafat, i Yosafat nomulika i Yoram, i Yoram nomulika i Uzia,

⁹ i Uzia nomulika i Yotam, i Yotam nomulika i Ahas, i Ahas nomulika i Hizkia,

¹⁰ i Hizkia nomulika i Manasye, i Manasye nomulika i Amon, i Amon nomulika i Yosia,

¹¹ i Yosia nomulika i Yekhonya ntali sampesuvuna napara tempona toYahudi nidagi bo nikeni mpalai hau ri tana Babel.

¹² Nakava ri tana Babel, i Yekhonya nomulika i Sealtiel, i Sealtiel nomulika i Zerubabel,

¹³ i Zerubabel nomulika i Abihud, i Abihud nomulika i Elyakim, i Elyakim nomulika i Azur,

¹⁴ i Azur nomulika i Zadok, i Zadok nomulika i Akhim, i Akhim nomulika i Eliud,

¹⁵ i Eliud nomulika i Eleazar, i Eleazar nomulika i Matan, i Matan nomulika i Yakub,

¹⁶ i Yakub nomulika i Yusuf berei i Maria, bo i Maria noanaka i Yesus anu niuli i Kristus, haitumo Magau Topepakasalama anu nijanji nu Alatala.

¹⁷ Jadi lako nte i Abraham sampe Magau Daud naria sapulu pata-ntapi mulina. Bo lako ri Daud sampe ri tempo toYahudi nikeni mpalai hau ri tana Babel naria sapulu pata-ntapi muni. Bo lako ri tempo toYahudi nikeni hau ri tana Babel sampe pompoanaka i Kristus naria sapulu pata-ntapi muni.

Tesa pompoanaka i Yesus bo kanganaNa (1:18-2:23) Tesa pompoanaka i Yesus Kristus

¹⁸ Iveimo tesa pompoanaka i Yesus Kristus. TinaNa i Maria anu nijanji moberei ante langgai nosanga i Yusuf. Tapi dopame ira noberei, natianamo i Maria lako ri kuasa Nosa Gasa nu Alatala.

¹⁹ I Yusuf, tengeana, tona natutu nangoseaka atura agama. Haitu sampe ia nonia mombabole tengeana i Maria. Tapi ledo nadota ia mompakaeya i Maria ri ngayo ntodea. Jadi patujuna mombabole i Maria nggalino-lino.

²⁰ Tempo i Yusuf da nompekiri patujuna haitu, malaeka nTupu nakava riara pangipina bo nanguli ka ia, “Yusuf, muli i Daud, nee makini raramu mompoberei i Maria, sabana ngana nikatianakana najadi lako ri kuasa Nosa Gasa nu Alatala.

²¹ I Maria mompoanaka saito ngana langgai, bo ngana haitu kana mupoposanga Yesus sabana Iamo mompakasalama todeaNa lako ri dosara.”

²² Haitu pura-pura najadi ala madupa tesa nTupu anu nipasimbayu nabiNa nggaulu ivei:

²³ “Saito randaa matiana bo mompoanaka saito ngana langgai. Bo ngana haitu rapoposanga i Imanuel.” Yesaya 7:14 (Imanuel riara basa Ibrani batuana: “Alatala mosanggani ante kita.”)

²⁴ Jadi nembangupa i Yusuf, nipovianamo anu niuli nu malaeka ka ia. Nipobereinamo i Maria,

²⁵ tapi ira dopa nosampaturu dopame i Maria moanaka anana langgai haitu. Bo i Yusuf nompoposanga ngana haitu i Yesus.