Ibrani 1 - Kaili Ledo

Ana nu Alatala nompasimbayu Tesa nu Alatala ka manusia

¹ Tempo nggaulu, nadea ngganimo Alatala nompasimbayu tesaNa ante mpengaya-ngaya cara ka nabi-nabi anu nompapola tesaNa haitu ka totuata nggaulu.

² Tapi ri tempo nggapuri hitu AnaNa mbotomo nompasimbayu tesaNa ka kita. AnaNa haitu nipopale nu Alatala nompajadi dunia, bo Alatala nompakatantu AnaNa haitumo masipato majadi tupuna pura-pura anu naria.

³ AnaNa haitu nompopakita kuasa bo kaoge nu Alatala, bo Ia nasimbayu nte Alatala. Iamo nombakuasai bo nompiara mpengaya-ngaya ri dunia ante tesaNa nakuasa. Naupu Ia nombakabasaka manusia lako ri dosa, Ia nonturo ri ponturo magau ri suruga ri panggana nu Alatala toNeliu KaogeNa.

⁴ Jadi Ia nipakalanga ntotopa pade malaeka-malaeka nu Alatala, bo nturo nidekei nu Alatala ka Ia naogepa pade nturo nu malaeka-malaeka.

I Yesus naogepa pade malaeka-malaeka nu Alatala

⁵ Nalantomo kaoge i Yesus apa ledo ria sanggania Alatala notesa ka malaekaNa ivei: “Ikomo AnaKu, eo hitu Yaku najadi TuamaMu!” Mazmur 2:7 Bo ledo ria sanggania Alatala nanguli ka malaekaNa ivei: “Yaku majadi TuamaMu, bo Iko majadi AnaKu.” 2 Samuel 7:14 Tapi niuliNa ivehaitu ka AnaNa mboto.

⁶ Bo tempo Alatala nombatudu Ana lumbuaNa makava ri dunia hitu, niuliNa muni ivei: “Pura-pura malaeka kana mombasomba AnaKu.” Mazmur 97:7

⁷ Alatala nombatesa malaeka-malaekaNa ivei: “Yaku nompajadi malaeka-malaekaKu nasimbayu mpo poiri. Ira nasimbayu mpo apu narega.” Mazmur 104:4

⁸ Tapi niuliNa ka AnaNa ivei: “Ikomo Alatala, bo poparentaMu maroo sampe ri kasae-saena, Iko moparenta todeaMu ante rara nanoa.

⁹ Iko nompotove pokainggu nanoa bo navuu mataMu nanggita pokainggu natenggo. Jadi haitu sampe Yaku, TupuMu Alatala nompelisi Iko, bo nibilaKu Iko bo nipakadambaKu raraMu nelabipa pade roa-roaMu.” Mazmur 45:7-8

¹⁰ Bo Alatala nanguli muni ka AnaNa ivei: “Pue, Iko nompajadi dunia ri ulu jadina, Bo langi muni asele mpaleMu.

¹¹ Langi bo tana kana malipo, bo magero mpo baju naranta, Tapi Iko bate-batena maria.

¹² Langi bo tana ratikaMu nasimbayu mpo buya. Bo rasambei ante baruna nasimbayu mpo baju narantamo nisambei ante baruna. Tapi Iko ledo ntoto mabali, KatuvuMu ledo ria kaupu-upuna.” Mazmur 102:26-28

¹³ Bo ledo ria sanggania Alatala nanguli ka malaekaNa mpo niuliNa ka AnaNa ivei: “Ponturomo ri sabingga ngganaKu sampe Kupopekou pura-pura baliMu nte Iko.” Mazmur 110:1

¹⁴ Jadi, isema kakanana malaeka-malaeka nTupu? Ira pura-pura topotulungi Alatala anu nisuroNa mantulungi bo manggeniaka tona rapakasalamaNa.