1 Korintus 13 - Kaili Ledo

Nompotove tona ntanina nabelopa pade mpengaya-ngaya pompakule nidekei nu Nosa Gasa

¹ Ane rapana kupakule motesa mpengaya-ngaya basa manusia bo basa-basa malaeka, tapi ane ledo kupotove tona ntanina, tesa-tesaku haitu ledo ntoto ria gunana. Tesaku haitu nasimbayu mpo goo naoni atau gimba nitinti pakamangga, ledo ria isina.

² Bo ane kupakule mompasimbayu tesa-tesa nitarimaku lako nte Alatala, bo ane kusani mpengaya-ngaya anu nitabuniaka bo kusani muni mpengaya-ngaya pangisani ntanina, bo pomparasayaku maroso mpuu sampe yaku mamala mantudu bulu molinja, tapi ane ledo kupotove tona ntanina, katuvuku ledo ntoto ria gunana.

³ Bo ane kudekei pura-pura mbara-mbaraku ka tona napakasi, bo kudekei karoku mboto rapatesi rapalabu ntona sabana pomparasayaku i Yesus, tapi ane ledo kupotove tona ntanina, pura-pura anu nidekeiku ledo ntoto naria gunana.

⁴ Tona nompotove roana nandoe posabarana bo nabelo rarana. Ia ledo nasiriati, ledo nangoe, bo ledo nalanga rarana.

⁵ Ia ledo nasodo nte roa bo ledo aga nangelo kabelo nu karona mboto. Ia ledo nasalisa narau bo ledo nompariara kasala nipovia ntona ka ia.

⁶ Tona nompotove roa ledo nadamba nanggita pokainggu nadaa tapi nadamba nanggita pokainggu nanoa.

⁷ Ia nombatidamaka riara mpengaya-ngaya anu najadi. Ia ledo nenonto nomparasaya, batena nanjarumaka Alatala, bo nosabara nau bara nuapa-nuapa najadi.

⁸ Pepotove ledo maupu-upu. Ane pompakule mompasimbayu tesa nitarima lako nte Alatala, makava tempona pompakule haitu menonto. Bo ane pompakule motesa ante basa-basa nopuna lako nte Nosa Gasa, makava tempona pompakule haitu malipo. Bo ane anu nipopaisani nTupu ka kita, makava tempona pangisanita domo raparaluu.

⁹ Apa pangisanita da nakura, bo pompakuleta mompasimbayu tesa lako nte Alatala dopa nagana.

¹⁰ Tapi tempo Alatala mompakabelo mpengaya-ngaya bara maipia, domo raparaluuta pompakule-pompakule anu da nakura haitu.

¹¹ Jonjona, tempo yaku da nangana yaku notesa mpo ngana, raraku mpo rara nu ngana, yaku nompekiri mpo ngana. Tapi nambasopa yaku, inggu-inggu ngana haitu nikabasakaku puramo.

¹² Anu nikitata sii-sii nasimbayu mpo vayo nu lenje navuyo-vuyo riara pompevayo. Tapi ri tempo makava malanto rakitata mpo tona mosinggita lenje. Sii-sii pangisaniku da nakura, tapi tempo bara maipia malanto kusani pura-pura nuapa, nasimbayu mpo Alatala nangisani pura-pura karoku hitu.

¹³ Jadi pura-pura pompakule maupu tapi naria talu-ngaya anu ledo maupu-upu, haitumo pomparasaya, panjarumaka bo pepotove. Bo lako ri talu-ngaya haitu, nopokopa pepotove.