O ZAKHARIA 9 - MA JOU AI BUKU O ABARI MA OA

O Juru hakimi mangale hagala o negara o Israel ima kokadatekuku

¹ Nenanga ma Jou Ai behehongo. Unanga wa putuhoka mangale Wa hukumu o Hadrakh maberera deʼ o Damsyik ma kota. Koigoungua duga-duga o Israeloka manga hoa-hoana, mä o Siria ma kota matiti ö ganga toma Jou Madutu.

² O Hamat ima ribatingi deʼ o Hadrakh ö ka To ünanga madutu, hoko genangoli o Tirus deʼ o Sidon ma kota-kota deʼ hagala ma nyawa duru yanö nako-nako.

³ O Tirus ihi gokoka hagala o beneno o mehele mangale manga diri deʼ yatoporono duru kohä ngöe o gurasi deʼ haaka hiädono idadi hokä o baranga biaha hokä o dowongi deʼ o peseke o ngekomoka.

⁴ Mä ma Jou aha wadiai imihikini. I ngodu-ngodumu makaya o kota gënanga aha Waumo o ngooto magoronauku deʼ o kota gënanga mahirete aha imata yaol̄omo o uku.

⁵ O Askelon deʼ Gaza ma kota aha yamake deʼ idadi yohawana. O Ekron aha ya make ö deʼ ihihanga hagala manga nganono. O Gaza aha ihihanga manga koano, deʼ o Askelon aha idadi kai rïdika koiwa manyawa.

⁶ O Asdod aha yogogere hagala o nyawa o höana deʼ o berera yoganu-ganuoka. Ma Jou wotemo, ”O Filistin manyawa manga hininga ikokurutil̄e gënanga aha Ta binaha.

⁷ Onanga aha yol̄omokauaoli o hiode ma akeme kama awu-awunohi ekola o inomo ma homoa ilö lara-laranga. Mata-mata o nyawa yä mal̄a-mal̄aika aha yodadi Ahi umati deʼ tapulono hokä o Yehuda ai hoanino mahidoku. O Ekron aha idadi o öraha ma hira.

⁸ Ngohi aha togoana Ahi tonaka deʼ tatatoko hagala o duduono maporetino yomau yatilakuru. Ngohi aha ta higumal̄aokauaoli yo tö tuku-tuku ya paretauku Ahi umati. Hababu toönanga manga hangihara Ta makeoka.”

O Koano aha wo bö boa-boa

⁹ Hei o Sion manyawa, ni morene! Hei Yerusalem manyawa, nimä ulili! Niwï lega! Nia koano woboa deʼ ai utumu! Unanga o adili makoano woö ao-ao o halamati. Mä iwiomanga o hininga ma dipokouku Unanga woboa wobarene o keledai, o dutu moi o keledai ma gö.

¹⁰ Ma Jou wotemo, ”Hagala o kereta ihi poparangi o Efraimino aha Ta umo, mata-mata o kuda o Yerusalemoka aha Ta hohihanga deʼ hagala o toimi aha Ta wede-wederuku. Nia koano aha wohi ngahu o dame o hoana deʼ o berera ma ago-agomo manga hidogoronaka. O ngötoka deʼ o ngötika Unanga aha wakuaha, o Efrat ma Ngairoka deʼ yaino hiädono o dunia mabahaika.”

Ma Jou Madutu Ai umati manga wowango Wohihilio hoi hira-hiraoli

¹¹ Ma Jou wätemo Ai umatika, ”Mangale o jaji Ta dodiai de de ngini, o jaji ihi gö gou-goungu deʼ o huhuba o awunu ihi huba-huba, aha Tahi bebasi ani kawaha ya tago-tagongo o hangihara o tabuanga magoronaka hokä o nyawa yahi dotebenoino o humu ma tore-tore magoronaka.

¹² Nima idulu hei hagala o nyawa ni totabuanga, o öraha nënanga tingini deʼ nia nganono. Nimaidulu nia gogoana ma ngïika, Ngohi aha kahirahi tinihi barakati ngini. Ni ihene: Higali mahinoto ngini aha Ti nihi barakati karana hagala o hangihara ngini nia mö mao-maooka.

¹³ O Yehuda aha Tä pake hokä yobobarani manga toimi, deʼ o Israel hokä o toimi madoto ima hidiaioka ihi toimi. O Sion manga nyawa Ta pake hokä o oworo; deʼ oworo gënanga hagala o Yunani manyawa aha Ta parangi.”

¹⁴ Ma Jou aha womahimatoko Ai diri Ai umatika, hokä o leletongo hagala Ai toimi madoto Wohi toimi. Ma Jou Duru wo ko Kurutil̄e aha wawuwu o trompet manonako woparangi daha wotagi ai himangiha o rato o koreharauku magoronaka.

¹⁵ Ai umati maraioka Wahi döaka o gogoana hiädono hagala manga haturu önanga yakunu yahihanga. Hokä manga ulili o nyawa ihi dalu-daluku o daluku, hoko gënanga toönanga manga ulili o parangi magoronaka. Hokä o huhuba o awunu yodogopoa o huhuba mangï ma l̄okuoka, hoko gënanga toönanga manga haturu manga awunu ikopoa.

¹⁶ Nako o wange gënanga iboa, ma Jou aha wa hihalamati Ai umati, hokä o gogoana wohi halamati ai duba o bahayaino. Onanga aha yoletongo ma Jou Ai tonakoka, hokä o makkota o gurasi o haaka maloleletongo.

¹⁷ Damä hokokia ma hailoa ma Jou Ai tonaka hokokia ma rahai deʼ ma hailoa! Genangoka o angguru deʼ o gandum iwango duru itaiti, o gogoduru deʼ o momoholehe yadiai idogo yokuata.