O ZAKHARIA 8 - MA JOU AI BUKU O ABARI MA OA

Ma Jou wojaji aha wohi gokookali o Yerusalem

¹ Ma Jou Duru woko Kuaha wohi döaka o behehongo nënanga ngohino,

² ”Ngohi duru tö igo tö riwo o Yerusalem karana Ngohi duru tä dora manyawa, deʼ karana Ahi dora gënanga, Ahi hininga yo hauku o kota gënanga ma haturü-haturü ika.

³ Ngohi aha toma idulu o Yerusalemika, Ahi kota itebi-tebini gënanga, deʼ tö gogere genangoka. O Yerusalem aha yanako hokä o kota isosetia deʼ ma Jou Duru woko Kuaha ai Doporono aha yahetongo o Doporono i Tebi-tebini.

⁴ O Yerusalem ma kota ma lapangoka, aha yogogeroli o ete-ete deʼ o el̄e-el̄e duru ya totimonoka hiädono kokiani imä dagi deʼ o tutukunu.

⁵ Hagala o ngekomo o kotaoka aha iomangoli deʼ o ngoha-ngohaka imä gogugule.

⁶ O hali gënanga hapulo-pulono iyakunu idadiua mangale hagala o nyawa yowango-wangoohi o hoana deʼ o bereraino nënanga, ma koi dadiua Ngohino.

⁷ Ngohi aha tä hihalamati Ahi umati hagala o bereraino o ngï önanga yatora-torakoka,

⁸ deʼ taao önanga yolio o wange mahiwaroka deʼ yaiha deʼ wange madumuniha deʼ yaoko, hiädono önanga yogögere o Yerusalemokaoli. Onanga aha yodadi Ahi umati deʼ Ngohi toönanga manga Jou Madutu. Ngohi aha ta pareta önanga deʼ o setia deʼ o adili.”

⁹ Ma Jou wätemo Ai umatika, ”Nia kuata nia hininga! O öraha nënanga ngini ni ihene o demo-demo ö yahö heto-hetongoka o nabi-nabi maöraha o fandasi yogelenga, mangale ihi gokookali Ahi Tau.

¹⁰ O öraha gënanga koiwahi, koiwa yakunu yahewa o nyawa ekola o aiwani, deʼ koiwa yamao yosanangi, o haturüino manga rüae. Ngohi tahi tubeleoka moi deʼ moi.

¹¹ Mä öraha nënanga hagala o nyawa kayo wango-wangoohi o höana deʼ o bereraino nënanga Ta hidiai ima howono deʼ mahira.

¹² Onanga aha ihi barihi o gihihi deʼ ma dame-dame. Toönanga manga angguru ma utu-utu aha i hohoko, o tonaka aha i hi döaka ma hasili, deʼ o awana aha iuti deʼ ma boboloi. Hagala o barakati gënanga Tahi döaka hagala o nyawaika kayo wango-wangohi o höana deʼ o bereraino nënanga.

¹³ Hei o Yehuda deʼ o Israel manyawa! Maöraha i paha-paha, nako hagala o nyawa maporetino ima tekelolai, önanga yato, ’Tanu o bodito yatotapal̄u o Yehuda deʼ o Israel, ini tapal̄u ngona ö!ʼ Ma Ngohi aha tini hihalamati ngini, hagala o nyawa ma poretino gënanga aha ima ke temo imahi koko önanga, ’Tanu o barakati iuti o Yehuda deʼ o Israeluku, iuti ö ani diriuku!ʼ Hababu gënanga nia kuata nia hininga deʼ uha nihawana!”

¹⁴ Ma Jou Duru woko Kuaha wotemo, ”Maöraha nia ete deʼ nia tohora yadiai Ngohi tongamo, Ngohi ta putuhu mangale tä hukumu önanga deʼ ma kuata. Ngohi tangaliua Ahi putuhu gënanga, matadiai.

¹⁵ Mä o öraha nënanga Ngohi tomau tahi barakati o Yerusalem manyawa deʼ Yehuda manyawa. Ho, uha nihawana.

¹⁶ Nenanga hagala o pareta kokiani ngini nia diai. Nako ni ade-ade, ni temo ma diai nimahi koka nyawaika. Nihi döaka Juru hakimi maputuhu iadi-adili deʼ iao o dame.

¹⁷ Uha nihi datoro itö torou nimahi koka nyawaika. Uha nihi demo o koboto ito tiaiua. Ngohi tö dohata o tengelukika deʼ koi adi-adilua ikali nia dö dobuturungu.”

¹⁸ Ma Jou Duru woko Kuaha wohi döaka o behehongo nënanga ngohino mangale Ai umati,

¹⁹ o puaha nia dodiai o mede maiata, mamotoa, matumidi deʼ mangimoi magoronaka idadi o rame-rame iomanga o morene deʼ o sanangi mangale o Yehuda manyawa. Nio igo o diai deʼ o dame!”

²⁰ Ma Jou Duru woko Kuaha wotemo, ”Maöraha aha iboa o kota mangöe manyawa aha yoboa o Yerusalemika.

²¹ O kota moino manyawa aha yä temo o kota manyawa ma homoaino, ’Niaino ngone höiki hihuba ma Jou Duru woko Kuaha deʼ hogahoko Ai barakati. Ho ma kinïki de de ngomi!ʼ

²² Daha manga ngöe o nyawa deʼ manga ngöe o höana deʼ o berera ikua-kuata aha yoboa o Yerusalemika mangale ihi huba Ngohi o Jou Duru to ko Kuaha deʼ yogaholo Ahi barakati.

²³ Hagala o wangeoka gënanga o nyawa maporetino yangimoi aha yoboa o Yehuda manyawa woma tengoika deʼ yo temo, ’Ngomi ö mio igo miutumu hokä ngini; hababu ngomi mi ihene ma Jou Madutu wi nihi barakati ngini.’ ” Ma Jou Duru woko Kuaha wo temoka.