O ZAKHARIA 4 - MA JOU AI BUKU O ABARI MA OA

O lolega mangale o hilo ma l̄ou

¹ O malaikati ihi temo-temoka ngohino gënanga iboali deʼ ihi tumomiki ngohi hokä o nyawa imä iduoka deʼ yatumomiki.

² ”Okia namake?” wohi leha. ”Moi o hilo mal̄ou o gurasi,” tohaluhu, ”Madekaroka naga maminya mangï, deʼ ma gilolitino naga o hilo tumidi, moi-moi to enanga mahubu mangï tumidi.

³ Ma higili deʼ ma niraka yohohononga o hilo mal̄ou gënanga naga o zaitun ma utu hinoto.”

⁴ Ipaha ngohi tïleha o malaikatika gënanga, ”Okia ihi nonako o bara-baranga gënanga, Tuanga?”

⁵ ”Nohiorikua ngona?” wohileha ngohiino. ”Kowali Tuanga,” tohaluhu.

^10b Malaikati gënanga ihi temo ngohino, ”O hilo tumidi gënanga ganga ma Jou Ai lako tumidi watotailako o dunia ma l̄oku ya mode-modekika.”

¹¹ Ipaha ngohi tilehaoli unangika, okia mamangarati o zaitun mautu ma dengeeti o hilo ma l̄ou gënanga manirakoka deʼ mahigiloka?

¹² Okiaoli ma mangarati o zaitun majaga hinoto o pipa o gurasi hinoto ma datekoka ihi heheli o zaitun maminya gënanga?”

¹³ Wohï baluhu ngohino, ”Nohiorikua ngona?” ”Kowali Tuanga,” to haluhu.

¹⁴ Unangö wotemo, ”Genanga o nyawa yahinoto o alami ma gilolitino ma Jou wa irikoka deʼ wa tumutu mangale iwi leleani Unanga.”

Ma Jou Ai jaji Zerubabelika

⁶ O Malaikat gënanga ihi huloko ngohi tohiädono o Zerubabelika ma Jou Ai behehongo nënanga, ”De o tentaraua manga kuata deʼ ani kuatuaoli mahirete ngona aha no hasili, ma deʼ ahi Womaha.

⁷ O dagahanga imatero ol̄oku aha imahititiko ani himangoka. Ngona aha nohi gokookali Ahi Tau, deʼ o öraha ngona nogelenga o helewo duru mal̄okuoka mangï oka, hagala o nyawa aha yo pöaka. ’Hokokia ma hailoa!’ ”

⁸ Daha iboaoli o behehongo mahomoa ma Jouino.

⁹ Wato, ”O Zerubabel wogelengaka Ahi Tau ma fandasi, deʼ unanga aha wabotö ingodu-ngodumu o bangunan gënanga. Nako gënanga idadi, Ahi umati aha ihi öriki Ngohi toni hulokoka ngona Zakharia onangika.

^10a Naga yolegaikaua o öraha nënanga. Ma önanga aha iwi make o Zerubabel wohi gila-gila wohi goko Ahi Tau, deʼ önanga yomorene.”