O ZAKHARIA 3 - MA JOU AI BUKU O ABARI MA OA

O lolega mangale o Imam womomulia

¹ O lolega ma homoa ma goronakaoli, ma Jou wohihimatoko ngohino ma Imam womo Mulia o Yosua ma gogiria woma okoino ma Jou ai malaikat ma himangoka. O Yosua ai honongaka, ima okoino o Hetanga ima hidiaioka mangale i wi kalaki.

² Ma Jou Ai malaikat ya temo o Hetangika, ”Tanu ma Jou woni hukumu hei Hetanga! Tanu ma Jou wahö haya-hayanga o Yerusalem wo ni hukumu ngona. O nyawa nënanga hokä o gota madino o uku itoka-tokaroka deʼ yataurino.”

³ O Yosua woma okoino genangoka womahinoauku o pakeanga duru mapese-peseke.

⁴ Done wätemo o malaikat gënanga yo riwo-riwoika o horogaoka, ”Nia umo o pakeanga ma pese-peseke woma hinoa-noauku o nyawa nënanga.” De o Yosuaika ünanga wïtemo, ”Ani baradoha Ta umoka, ngona aha Tonihi döaka o pakeanga mahungi.”

⁵ Unangö wä hipareta iwi riwo-riwo mangale iwi hipake o häeke ma liliko madebi-debini o Yosua ai häekoka. Onanga yamoteke deʼ iböto gënanga önanga iwihinoa o pakeanga mahungi gënanga unangika deʼ iwi goana ma Jou Ai malaikati.

⁶ Ipaha malaikat gënanga ihiädono ma Jou Ai demo o Yosuaika,

⁷ ”Nako ngona nohingounu hagala Ahi tita deʼ nadiai hagala o manarama Tonihi döa-döaka ngonaika, done mangale hoko genangika ngona yakunu nodadi o tutuda ahi Tau magoronaka deʼ nohidailako malooa. Ngohi aha toihene ani niniata, hokä Ngohi toihene hagala o malaikat manga niata naga Ahi datekoka.

⁸ No ihene hei imam nomomulia Yosua, ngini ö imam-imam nidadi ai dodiawo, ngini mata-mata ganga ma nonako öraha mahimangika maoa-oa. O öraha gënanga Ngohi aha tï huloko ahi gilaongo iwi hetongo o ’Dori imo Mulia’.

⁹ Takelenga o Yosua ai himangoka moi o helewo o pahagi tumidi aha Ta garade deʼ hagala o dulihi. O wange moi magoronaka aha Ta umo o baradoha o bereraino nënanga.

¹⁰ Nako o wange gënanga iboa, moi-moi o nyawa aha yä ahoko imakokadateke mangale yoboa deʼ yajame o dame deʼ o sanangi nia angguru deʼ nia ara ma utu madumule mahi dö dogoronaka.”