O ZAKHARIA 13 - MA JOU AI BUKU O ABARI MA OA

¹ Ma Jou Duru woko Kuaha wotemo, ”O wange nënanga aha ihoropu moi o jobubu mangale ya tebini o Daud aidifauku deʼ o Yerusalem manyawa manga baradoha deʼ ya huba o gomanga önanga yadö dodiaioka.

² O wange gënanga aha Ta ehe hagala o gomanga ma romanga o tonakoka nënanga, hiädono moiua ö kayo hiningahi. Mata-mata o nyawa ima ngaku manga diri o nabi aha Ta duhu ima kinïki önanga yapopooteke o womaha iadi-adilua.

³ De nako kanagahi o nyawa yotemo ünanga wohiädono o behehongo, ai ama deʼ ngoi ayo mahirete aha yotemo unangika ünanga kokiani iwi hukumu iwi hohonenge, hababu wohi dö demo-demo enagënanga ieluku. Nako ünanga kahirahi woma ngaku ai diri hokä o nabioli, ünanga aha iwi tuduku hiädono wohonenge mangale ai ama deʼ ngoi ayo mahirete.

⁴ O wange gënanga, o nabi-nabi aha yamao yamal̄eke mangale yodiai hokä o nabi. Onanga aha imahinoaua o nabi ma pakeanga mangale yotipu deʼ ima hil̄e yamö make-make.

⁵ Idulu yaino, önanga aha yo temo, ’Ngohi o nabiua. Ngohi duga-duga woma tengo wototumule tokarajänga o dumuleoka ahi umuru ma gurutu.’

⁶ De nako o nyawa iwi leha unangika, ’O nabo okianaga ani ale mangunungoka gënanga?ʼ, ünanga aha wohaluhu, ’Ngohi ihi korona o nabo gënanga ahi do diawo manga tauoka.’ ”

O pareta mangale iwi toma o gogoana wi hulo-huloko ma Jou Madutu

⁷ Ma Jou Duru woko Kuaha wotemo, ”Nomomiki, hei oworo, deʼ niparangi o gogoana woko karajänga mangale Ngohino! Nitoma ünanga, done hagala o duba aha ima kokitingakoka. Ngohi aha taparangi Ahi umati,

⁸ deʼ o berera yamode-modekika manyawa iregu hange o regu hinoto manyawa aha yohonenge.

⁹ Duga-duga o regu hange o regu moi aha yohalamati. De önanga gënanga aha Ta tebini hokä o haaka yatebini mangale o uku. Onanga aha Ta uji hokä o nyawa yauji o gurasi. Daha önanga aha imä niata Ngohino, deʼ Ngohi aha tä balahu önanga. Ngohi aha tatemo onangika önanga ganga Ahi umati, deʼ onangö aha ima ngaku Ngohi o Jou toönanga manga Jou Madutu.”