O ZAKHARIA 11 - MA JOU AI BUKU O ABARI MA OA

Yä otaka yo kokuaha manga hayanga ko ö iwa-iwa

¹ Hei Libanon, nahelenga hagala ani ngorana, hupaya o uku yatuhuku ani aras ma gota ma utu-utu!

² Hei o baru ma gota ma utu, nododora, karana o liwewuru ma gota ma utu-utu iheleuroka, o gota ma utu ikö kua-kuata irubaka. Hei o gota ma utu-utu ma pako-pako o Basanoka, ni ari. Hababu hagala o hongana ma ago-agomo ipairoka irataika.

³ Ni ihene manga dodora yokokuaha ihihangoka toönanga manga utumu! Ni ihene maböaka hagala o singa o honganoka; hababu ikilianga to enanga mangï o Yordan ma Ngairi magurutu.

Yahinoto o gogoana

⁴ Ma Jou o Jou Madutu wohi temo ngohino, ”No madiai ma tero-tero ngona o gogoana nogoana o duba aha yatoaka.

⁵ Yo ö ija-ija yatoma hagala o duba gënanga yamakeua o hukumanga. Onanga yahö huku-hukunu hagala o duba ma akeme gënanga yotemo, ’Hï higiriri ma Jou! O öraha nënanga ngone idogo ho kaya!ʼ Hagala o gogoana gënanga yamaoua yodora hagala o dubaika önanga yapopaliara.

⁶ Ngohi tolukokali tä dora o nagonaika ö o bereraoka nënanga. Ngohi mahirete aha tä hilapahi yongodu-ngodumu yokökuahaika. Onanga gënanga aha yawedere o berera nënanga deʼ Ngohi aha ta oraua toönanga manga kuahaino.”

⁷ Ngohi, o Zakharia, daha ihï hewa mangale ima huku-hukunu o duba mangale tögoana hagala o duba aha yatö toa-toaka. Tongohi hinoto ahi diki-diki; moi to hiromanga ”Woigo wona hidoaka” de moioli o ”Liliko”. Ipaha ngohi mulaenge togoana deʼ tapaliara hagala o duba gënanga.

⁸ Yaruange o gogoana ihidö doha-dohata yamata ahi sabari. Onanga tä duhu o öraha o mede moi magoronaka.

⁹ Ipaha ngohi ta temo o duba matikaika gënanga, ”Ngohi toluku tinï goanoli ngini. Kokiani nihonenge mal̄aika dika nihonenge, deʼ kokiani nibinaha. Daha ma hou yakunu ni makotoma.”

¹⁰ Daha o diki-diki tohirö roma-romanga ”Woigo” wonahi doakä gënanga tal̄e deʼ tatobiki mangale wohi dadiua o jaji wadodiai ma Jou deʼ mata-mata o hoana deʼ o berera.

¹¹ O wange gënanga dika o jaji gënanga wohi dadiua. Ima huku-hukunu o duba gënanga ihi totailako ngohi, de önanga yamao ma Jou magogiria wo temo-temo itilakuru hagala ahi manarama.

^12-13 Ngohi ta temo onangika, ”Nako Tua-tuanga nio modeke, nihi döaka tongohi ahi hewa; nako kowali, ngarouha.” Daha önanga ihi döaka ngohino o tiwi o haaka moruange mangale ahi hewa. Ma Jou wohi temo ngohino, ”No noa o tiwi gënanga Ahi Tau ma tiwi ma gö gogono magoronauku.” Hö tonoa o tiwi o haaka moruange gënanga ma Jou Ai Tau ma tiwi magögogono magoronauku! Duga-duga hoko gënanga yaika toönanga manga horomati ngohino!

¹⁴ Iböto gënanga ngohi tatobiki ahi diki-diki mahinotoka, enagënanga tohirö roma-romanga o ”Liliko”, done ima kokitingakoka manga rimoi o Yehuda de o Israel.

¹⁵ Daha wohi temo ma Jou ngohino, ”Nomadiai nohi galioli ma tero-tero ngona o gogoana, mä mamoi nënanga hokä o gogoana madorou.

¹⁶ Karana Ngohi aha tï himanarama womatengo o gogoana mangale wogoana Ahi duba matika, mä ünanga wolegaikaua o duba ihö hihihanga; ünanga walingirua o duba irö rehe-herene, wahourua ö o duba yanö nabo-nabo, deʼ wohi ol̄omua o dubaika kai wango-wangoohi, Koaholi ünanga mahirete waol̄omo o duba duru iboburere maakeme de warahuku hagala ma kuliti o aiwani gënanga.

¹⁷ Tilolai o gogoana wobobaragunaua gënanga! Unanga wa mal̄aoka ai duba matika. O parangi aha ihi bobaha ai kuaha. Ai giama aha idadi yabole deʼ ai lako maniraka idadi ipiloko.”