O ZAKHARIA 10 - MA JOU AI BUKU O ABARI MA OA

Ma Jou wojaji aha wä hihalamati Ai umati

¹ Nako maöraha o gota-gota itubo iboa, nigahoko o awana ma Jouika. Done ma Jou wa toomu o lobi ihö hohonguku, deʼ wohi guti o awana iriki-rikimi hiädono hagala o dumule idadi ma ijo-ijo deʼ kama gou-gou mangale mata-mata o nyawa.

² Hagala o nyawa yogahoko o hi dumutu hagala o gomangika deʼ yomai-maihika, mä hagala mabobaluhu önanga yamake ganga o tengeluku, ikali o demo ihi hohomoa mata-mata. Naga ihi tararono o nanere, mä toönanga manga hitararono duga-duga ini hirehene ngini, deʼ o lolaru i ni hi dö döa-döaka koiwa ma mangarati. Hababu gënanga o kawaha ima hikabarihi hokä o duba. Onanga yohangihara karana moiua manga tutuda.

³ Ma Jou wato, ”Ngohi duru to ngamo yo kokuahaika ya pö popareta Ahi umati, deʼ önanga aha Tä hukumu. Mä o Yehuda manyawa ganga Tongohi ma dutu, deʼ Ngohi, o Jou Duru woko Kuaha aha ta paliara önanga. Onanga aha Ta hidadi o kuda ihi poparangi ipoputurungu mangale Ngohi.

⁴ Onanga manga hidogoronaino aha Ta iriki yokokuaha, o tutuda, deʼ o kapita aha yapareta Ahi umati.”

⁵ O Yehuda manyawa aha youtumu hokä yopoparangi yä pito-pitoko o haturu hokä o peseke o ngekomoka. Onanga aha yoparangi karana Ngohi, o Jou tariwo önanga, deʼ o haturu manga duduono yobö bare-barene o kuda aha önanga yautumu mata-mata.

⁶ ”O Yehuda manyawa aha Tahi kuata, o Israeloka ma umati aha Ta hihalamati. Ta ao önanga tahigilio manga bereraika karana Ngohi tä dora deʼ tä hayanga onangika. Aha Ta hidiai önanga hokä o höana deʼ o berera komaiwahi Tahi pongono. Ngohi o Jou toönanga manga Jou Madutu, hagala manga niata aha To hohiningaoli.

⁷ O umati o Israeloka aha hokä yobobarani yokua-kuata, hokä o nyawa yokere o angguru, önanga aha yomore-morene. Toönanga manga difauku o öraha ipaha o oraha aha yawohangua o utumu nënanga Tahi dö doa-doaka. Onanga aha duru yomorene karana Ahi manarama onangika.

⁸ Ahi umati aha Tä ahoko deʼ tatoomu yodadi moi. Onanga Tahi bebasi deʼ Ta diai ima tero manga ngöe hoi hira-hirainoli.

⁹ Ngaroka Ta higerewotoönanga o höana deʼ o berera manga hidödogoronaka, önanga aha kahirahi ihi hininga Ngohi dokengoka. Onanga aha yohalamati, hoko genangö manga ngoha-ngohaka deʼ aha yolio imakinïki manga bereraika.

¹⁰ O Mesir deʼ o Asyur deʼ yaino, önanga aha Ta higilio. Manga bereraka mahirete önanga aha Tahi gogere. Ta ao önanga o Gileadika deʼ o Libanonika ö, hiädono önanga yä omanga o berera mata-mataika.

¹¹ Nako önanga yotöaka o ngöto ihuhuha, Ngohi, o Jou aha tägohara hagala o lulu; done o Nil ma Ngairi mabukuku idadi iowaha ma tore-tore. O Asyur manyawa yo ö ede-edenge aha tahitipokouku, deʼ o Mesir yonö nau-nauru aha ihihanga manga kuaha.

¹² Ngohi aha tahi kuata Ahi umati, önanga aha ihihingounu deʼ yo puji Ngohino. Ngohi, o Jou, to temoka.”