O YOSUA 18 - MA JOU AI BUKU O ABARI MA OA

O tönaka wahijäjaji ma Jou ma hou i hi kodöku

¹ O tönaka wahijäjaji ma Jou ya utumoka deʼ iböto, yo ngödumu o Israel manyawa ima toomu o Silo mabereraka, daha önanga ihigoko ma Jou Ai Doomu ma Tau.

² Ka nagaohi o Israel manyawa o höana tumidi yatarimaowahi manga hidöku o tönaka.

³ Hoʼ o Yosua wätemo o Israel manyawaika, ”Ngini ni mau nitotamä hiädono muruonoka, dahaö ngini niöiki niögögere o daera ma Jou winihidöa-döaka ma Jou niaete deʼ niatönaka manga Jou madutu nginiika?

⁴ Niä ïriki yaruange o höana yö gëtongo. Ngohi aha tähüloko önanga yatailäko o berera nënanga mata-mataika la ihitülihi mabätingi-mabätingi o daera yö igo-igo ima hitoönanga. Gënanga deʼ ibötoönanga kokiani imakilioro ngohiino.

⁵ O tönaka gënanga kokiani yarëgu idadi o hidöku tumidi. O Yehuda aha ka ihirahi ai daeraoka o koreharail̄e idaduoka, deʼ o Yusuf aidaeraka o koremieuku.

⁶ Ma bätingi-ma bätingi ma gambar o tönaka o hidöku tumidi gënanga kokiani idiai, deʼ ihidöaka ngohino. Dahaö ngohi taundi la hohiöriki okianaga ma Jou Madutu wohitö tantu mangale ngini.

⁷ Duga-duga o Lewi aihöana aha koya tarimaua o hidöku o tönaka dede ngini, karana toönanga manga hidöku ganga yodiai o imam-imam mangale iwï leleani ma Jou. Deʼ yakorona o Gad, deʼ o Ruben manga höana deʼ o Manasye aihöana mahönonga, i goungu önanga yatarimaoka manga hidöku o Yordan ma Ngairi o wange mahiwaröko idaduoka. O Musa, ma Jou Aigiläongo, wahidöakoka onangika o tönaka gënanga,”

⁸ Done o Yosua wahidöaka o hidümutu-hi dümutu hoko nënanga onangika gënanga, ”Ni öiki nia tailäko o berera nënanga mata-mata ika deʼ niadiai mabätingi-mabätingi magambar. Damä ngohi aha taundi nenangoka o Silo mabereraka la tohiöriki okianaga ma Jou wohitö tantu mangale ngini.” Yatarima o hidümutu-dümutu gënanga o Yosua ino de iböto, önanga yöiki yatailäko o berera gënanga.

⁹ Mata-mataika o berera gënanga önanga yödagi yakaika yakaino, daha yatülihi mabätingi-mabätingi o tönaka gënanga o hidöku tumidö deʼ ikali ihi tulihö o kota-kota naga magoronaka. Deʼ ipaha önanga imakilioro o Yosuaika o tau madoomuika o Silo mabereraka.

¹⁰ Daha o Yosua waundi la wohiöriki okianaga ma Jou wo hitö tantu mangale önanga. Gënanga deʼ iböto o Yosua wa hidöaka toönanga manga hidöku o tönaka o höana moi-o höana moi ika o Israel manyawa yamö mäke-mäke owahi o hidöku o tönaka.

O daera yatötümu-tümutu mangale o Benyamin aihöana

¹¹ O hidöku madodihiraka ganga o tönaka mangale o tau moi-o tau moi manyawa o Benyamin aihöana magoronaka. Toönanga manga hidöku gënanga magögere o Yehuda aihöana manga tönaka deʼ o Yusuf aidifauku mangahöana mahidogoröna.

¹² O koremie uku idaduoka, manga tönaka mabätingi imulaenge o Yordan ma Ngairoka, daha idöa o gelehoril̄e o Yerikho o koremieuku idaduoka, deʼ ipaha o wange madumuniha yanonu o daera deʼ mal̄oku-l̄okuoka hiädono imatëro magurutika o Bet-Awen matonaka ikokakaha madaera.

¹³ O bätingi madodungü gënanga igila-gila oli o gelehorika o Lus (yahöhëto-hëtongo hokä o Betel) o korehara il̄e idaduoka, daha iuti o Atarot-Adarika ol̄oku oka o Bet-Horon ma Utu o koreharail̄e idaduoka.

¹⁴ O wange madumuniha idaduoka ol̄okuoka gënanga deʼ yaino, o bätingi madodungü irëhene o koreharail̄e yödümutu o Kiryat-Baalika (enagënanga o Kiryat-Yearim). O Kiryat-Baal gënanga madutu o Yehuda aihöana. O tönaka gënanga mabätingi madodungü o wange madumuniha idaduoka.

¹⁵ O bätingi-o bätingi o koreharail̄e idaduoka i muläenge o Kiryat-Yearim madatekoka deʼ yaino igila-gila o Me-Neftoah ma äkere matitioka,

¹⁶ daha iuti ol̄oku matimiino imari himangino deʼ o Hinom ma Wai deʼ o Refaim ma Wai mabobaha o koremieil̄e yanonu o Hinom ma Wai o koreharail̄e idaduoka o l̄oku ma gelëhoro o Yebus mabereraka, i gila-gila yodümutu o En-Rogelika,

¹⁷ irëhene o koremieuku o En-Semesika, daha o Gelilot ika o Adumim ma Dodoa ma honongaka. Gënanga deʼ iböto o bätingi madodungü gënanga iuti o Bohan ma Helewo uku (o Bohan ganga o Ruben aingohaka),

¹⁸ daha ya nonu o koremie uku ol̄oku ma go gelëhoro ima teke ri himangino deʼ o Yordan ma Wai, deʼ ipaha iuti o wai uku gënanga,

¹⁹ yanonu o koremie uku o Bet-Hogla mal̄oku magogelëhoro, deʼ ihibobaha o koremieuku o Hönenge ma Ngöto o Yordan ma Ngairi ma bionino. Gënanga o bätingi o koreharail̄e.

²⁰ O Yordan ma Ngairi ma rupa o bätingi o wange ma hiwaröko. Hoko gënanga ma bätingi-ma bätingi o tönaka ya hidödöa-döaka o tau moi-o tau moika o Benyamin aihöana ma goronaka idadi toönanga manga tönaka ma dutu.

^21-24 Hagala o kota ya mö mäke-mäke o tau moi-o tau moi manyawa o Benyamin aihöana magoronaka naga o kota ngimoi deʼ hinoto deʼ makäpo-käpongo ma gilolitïno, enagënanga: O Yerikho, o Bet-Hogla, Emek-Kezis, o Bet-Araba, o Zemaraim, o Betel, o Haawim, o Para, o Ofra, o Kefar-Haamonai, o Ofni, deʼ o Geba.

^25-28 O kota ngimoi deʼ iatö nënanga deʼ makäpo-käpongo ma gilolitïno: o Gibeon, o Rama, o Beerot, o Mizpa, o Kefira, o Moza, o Rekem, o Yirpeel, o Tarala, o Zela, o Elef, o Yebus (enagënanga o Yerusalem), o Gibea deʼ o Kiryat-Yearim. Gënanga o tönaka ya hidö döa-döaka o tau moi-o tau moika o Benyamin aihöana magoronaka idadi toönanga manga tönaka madutu.