O YOSUA 11 - MA JOU AI BUKU O ABARI MA OA

O Yosua wäütumu o Yabin deʼ aidodiäwo

¹ Maöraha ma Koano Yabin o Hazor mabereraino woïhene mangale o Israeloka manga ütumu, ünanga wähüluko ma Koano o Yoabika o Madon makotaino, o Simron deʼ o Akahaf makokoanoika,

² il̄ol̄oku-l̄oku o koremie uku idaduoka ma kokoano o Yordan ma Wai oka, o Galilea o koreharail̄e idadu oka, il̄ol̄oku-l̄oku matimino madaera deʼ o gahil̄e madaera imahitigi-tigika o Dor mabereraika.

³ Unangö wähüloko o Kanaan manyawaika o Yordan o wange madumuniha deʼ o wange mahiwaröko, o Amori, o Heti, o Feris manyawaika, deʼ o Yebus manyawaika il̄ol̄oku-l̄oku madaeraoka, inoli o Hewi manyawa o Hermon mal̄oku matimioka o Mizpa madaeraoka.

⁴ Done o kokoano gënanga yoböa deʼ toönanga manga tentara mata-mata duru kamangangöe hokä o dowöngi o gähi ma datekino. Toönanga manga kuda deʼ manga kereta ihi poparangi ma duru kahangöe.

⁵ O kokoano mata-mata gënanga ima kodögo deʼ imakomöteke yoböa imä tau ima hitigi-tigïka o Merom ma Ngairi maiti ika la yäparangi o Israeloka.

⁶ Ma Jou wïtemo o Yosuaika, ”Uha namödongo onangika. Yärehe hokonënanga maöraha, mata-mata önanga nätomaka mangale o Israeloka. Toönanga manga kereta ihi poparängi kokiani ngona natühuku.”

⁷ Done o Yosua deʼ aitentara mata-mata yäparängi manga haturü gënanga yahitodokanika imahitigi-tigïka o Merom ma Ngäiri maitiika.

⁸ Deʼ ma Jou wadiai o Israeloka yäutumu önanga. O Israel manyawa yaparängi deʼ yaginïki önanga hiädono magurutika o Misrefot-Maimika deʼ o Sidon o koremieuku, deʼ imatëro magurutika o Mizpa ma Wai o wange mahiwaröko. O parängi kai dogo-dogo hiädono manga haturü mahou moiokaua – mata-mata yohönenge.

⁹ O Yosua wädiai onangika imöteke deʼ okianaga wohipoparetaka ma Jou; ünanga wadiai manga kuda yakunokaua imädägi, deʼ watühuku toönanga manga kereta ihi poparängi.

^10-11 Gënanga deʼ iböto o Yosua womakilioro, daha waöra o Hazor makota o öraha gënanga ganga duru ikökua-küata o popareta mata-mata mahidogoronaka genangokadau. O kota gënanga watühuku, inoli ma koano deʼ yongödumu maberera madütu wätöma, kaimätengö deʼ wamal̄aikaua yowängo.

¹² O kota-kota gënanga mata-mata o Yosua waöra, deʼ ma kokoano wätägoko deʼ wätöma ima möteke deʼ o Musa aipareta, ma Jou Aigiläongo gënanga.

¹³ Mä hagala o kota ihi gögöko-göko o dopörono itotorouoka, kamoi ö deʼ o Israeloka yatuhukua, sowaliua o Hazor o Yosua mahirete watühuku.

¹⁴ Mata-mata yogögögere o kotaka gënanga yätöma; kaima tengö deʼ yamal̄aikaua yowängo. Mä mata-mata mabara-bäranga deʼ maija-ija oka deʼ maaiwani yapopaliara o Israeloka imä l̄ë i mahitoönanga!

¹⁵ Mata-mata ma Jou wohipopareta o Musaika, aigiläongo, o Musa wohiadonoka o Yosuaika, deʼ o Yosua wadiai; kamoi ö deʼ koiwala kowadiaiaua.

O daera o Yosua waöra-öra

¹⁶ O Yosua waöra mata-mata ika o berera gënanga – o daera il̄ol̄oku-l̄oku, o daera ol̄oku matimino, kayaoa o koremieuku kayaoa o koreharail̄e; inoli o Gosyen nadaera mata-mataika deʼ o tönaka il̄o lua-luas iboburëreua oa Gosyen o koreharail̄e idadu oka, inoli o Yordan ma Wai.

^17-18 O daera gënanga ma luasi imuläenge il̄ol̄oku-l̄oku magota koiwa-iwa deʼ yaino o koreharail̄e idadu oka i mahi tigi-tigika o Edomika, hiädono o koremieuku magurutika o Baal-Gad o Libanon ma Waioka o Hermon mal̄oku o koreharail̄e idadu oka. Duru madekanino o Yosua woparängi deʼ o kokoano o daeraka gënanga, mä mabaha ünanga wätägoko, deʼ wätöma mata-mata.

¹⁹ Hagala o kota mata-mata yamode-modekika o daeraka gënanga, o kota kamoiö deʼ wadiai ua o jaji ima kohöbata deʼ o Israeloka, sowaliua o Gibeon, o Hewi manyawa manga kota. O kota mahomöa mata-mata wäütumu o parängi magoronaka.

²⁰ Ma Jou wadiai önanga manga hinïnga yatogöwini la yoparängi deʼ o Israel manyawa, hupaya önanga yäbinaha, deʼ mata-mata yätöma maäpongo koiwa imamöteke deʼ ma Jou Aipareta o Musaika.

²¹ O öraha nenangoli o Yosua wäbinaha o Enak manyawa, enagënanga manga röehe il̄olägo-ägomo deʼ yokökurutil̄e yogö gögere o daera deʼ mal̄oku-l̄okuoka – o Hebron, o Debir, o Anab mabereraka deʼ o Yehuda madaera deʼ deʼ mal̄oku-l̄okuoka mata-mataika deʼ o Israel. Onanga mata-mata o Yosua wätöma, deʼ toönanga mangakota yabinahaka.

²² Kaima tengö deʼ o Enak manyawaino koiwa mahou o Israeloka manga daeraka, duga-duga o Gaza, o Gat, deʼ o Asdod madaeraka kanagaohi.

²³ O berera gënanga mata-mataika o Yosua waöra imamöteke deʼ ma Jou Aipareta o Musaika, daha wahidöaka o Israel manyawaika idadi toönanga madutu. O berera gënanga warëgu-rëgu, deʼ o höana moi yamäke o hidoku moi. O Israel manyawa ma imatögumu yoparängi deʼ manga berera irïdi ka iso sanangi.