O YOHANIS 4 - MA JOU AI BUKU O ABARI MA OA

O Yesus de o Samaria mangoheka

¹ O Farisioka manyawa yoihene o Yesus wamäke deʼ waohiki iholoi yowöe de ngaro iwinöninïki o Yohanis.

² (Kaimoteke madiai o Yesus mahirete wo ohikua duga-duga iwinöninïki dika.)

³ Maöraha o Yesus wohiöriki o Farisioka manyawa yoihenoka mangale o hali gënanga, Unanga wöiki o Yudeaika de womaidulu o Galileaika.

⁴ Ai dodagi mahidogoronaka gënanga Unanga kiani watilakuru o Samaria.

⁵ O Yesus womahiädono o berera moi o Samariaka maromanga o Sikar, ikurutikaua de o tonaka mahira o Yakub wihidöaka aingohakika o Yusuf.

⁶ Genangoka naga o Yakub aihumu. O Yesus iwiboleoka duru karana imadagi, mangale gënanga Unanga wogogeruku o humu madatekoka. Oraha gënanga done howange ikorona,

^7-8 deʼ iwinöninïki o Yesus yoikoka o bereraika yoija o inomo. Ahao o Samaria manyawa mangoheka momatëngo moböa moma guiti o akere. O Yesus womitemo munangika, ”Ayo, kai yakunu Ngohi toma gahoko tokere?”

⁹ O Samaria mangoheka gënanga mohaluhu, ”Tuanga o Yahudioka manyawa, ngohi o Samaria manyawa; yadodoa Tuanga nogahoko nokere ngohino?” (Hababu o Yahudioka manyawa imateke rahaiua de o Samaria manyawa.)

¹⁰ O Yesus wohaluhu, ”Nako ngona nohiöriki ma Jou Madutu aingongike deʼ o Naguna wogahoko wokere ngonaika, marai ngona mahirete nogahoko nokere Unangika, deʼ Unanga aha wonihidöaka ngonaika o akere mangango.”

¹¹ O ngoheka gënanga mato, ”Tuanga koiwa anihia-hia, deʼ o humu nënanga duru kohalukuku. Okiaino Tuanga namäke o akere mangango?

¹² O Yakub, miatohora ngomi, womihidöaka ngomi o humu nënanga. Unanga mahirete womal̄ë o akere wokere nenangino; hoko genangoli aingoha-ngohaka de ai aiwani. Okia Tuanga natobote Tuanga iholoi nolamoko de o Yakub?”

¹³ O Yesus wato, ”O nyawa yaokere o akere nënanga aha manga kiriti madudungoli,”

¹⁴ ”mä o nyawa yokere o akere aha Ngohi tahidöaka, manga kiriti madudungokaua kahiado-adonika. Hababu o akere aha Ngohi tahidöaka gënanga aha idadi o jobubu manga diri magoronaka ihahuru ihupu deʼ ihidöaka onangika o ngango madutu deʼ ikakali.”

¹⁵ O ngoheka gënanga mato, ”Tuanga, nohihidöaka ngohi o akere gënanga, hupaya ngohi ahikiriti madudungokaua; la ibötohi togogilio nenangino tol̄ë o akere.”

¹⁶ O Yesus wato, ”Noiki, niahoko anirokata, daha nainoli nangino.”

¹⁷ O ngoheka gënanga mohaluhu, ”Ngohi koiwa ahirokata.” O Yesus wato, ”Anidemo gënanga itiai.”

¹⁸ ”Hababu ngona nokawingoka nohigali mamotoa iböto, deʼ o nauru niwango dede ngona nënanga naga anirokatauahi.”

¹⁹ O ngoheka gënanga mato, ”Orahanënanga ngohi tohiöriki Tuanga Ngona o nabi moi.”

²⁰ ”Tongomi miaete de miatohora iwihuba ma Jou Madutu o doporonoka nënanga, mä Tuanga ani nyawa yato, duga-duga o Yerusalemoka dika mangï o nyawa iwihuba ma Jou Madutu.”

²¹ ”Nongaku,” o Yesus wato munangika, ”öraha moiuku o nyawa aha iwihuba o Ama, o doporonokaua nënanga, deʼ o Yerusalem okauaö.

²² Ngini o Samaria manyawa niahuba okianaga ngini nianäkoua, mä ngomi o Yahudioka manyawa miahuba ënanga ngomi mianäko, hababu o halamati iböa o Yahudi manyawaka de yaino.

²³ Mä maöraha aha iböa, deʼ iböaka de ma Jou Madutu ai Womaha makuaha o nyawa aha iwihuba o Ama hokä sarakia Unanga naga. Onanga aha yopuji de madiaioka, hokä o Ama woigo-igo.

²⁴ Hababu ma Jou Madutu gënanga o Womaha, deʼ kade ma Jou Madutu ai Womaha dika makuaha, o nyawa yakunu iwi huba o Ama hokä sarakia Unanga naga.”

²⁵ O ngoheka gënanga motemo o Yesusika, ”Ngohi tohiöriki o Koano Wohihohalamati (iwi hetongo o Kristus) aha woböa. Nako Unanga woböa, Unanga aha wohingahu hagala mata-mata ngoneino.”

²⁶ ”Ngohi nanga Unanga,” o Yesus wato, ”Ngohi öraha nënanga homa ade-ade magogiria dede ngona.”

²⁷ Orahagënanga o Yesus iwinöninïki yoböa. Onanga yohëranga iwimäke o Yesus ima ade-ade de o ngoheka momatëngo. Mä komoiuaö onangino imileha o ngoheka gënanga, ”Ayo aniparalu okia?” ekola iwileha o Yesusika, ”Yadodoa Bapa nima ade-ade de o ngoheka gënanga?”

²⁸ Ma ngoheka gënanga kama mal̄a ami rube genangoka, deʼ moma popäta o bereraika deʼ mohingahu hagala o nyawa dokengoka,

²⁹ ”Niaino niwilegahi, womatëngo wohihingahu ngohino hagala mata-mata ngohi tadodiaioka. Bote Unanga gënanga o Koano Wohi hohalamati?”

³⁰ Hagala o nyawa genangoka kayamal̄a manga berera de yoiki o Yesusika.

³¹ Orahagënanga o Yesus iwinöninïki iwiahoko wol̄omo. Onanga yato, ”Bapa Guru,” ïka nol̄omohi.”

³² O Yesus wohaluhu, ”Naga o inomo Ngohioka, ngini nihiörikua.”

³³ Mä o Yesus iwinöninïki muläenge imakeleha, ”Bote naga o nyawa yoao o inomo mangale Unanga?”

³⁴ Daha o Yesus wato, ”Ahi inomo Ngohi ganga tamoteke Ai mau Unanga wohihulo-huloko Ngohi, deʼ tohitotomo o manarama wohihilapahioka Ngohino.

³⁵ Ngini niato, ’O mede iatohi o gugutuku maöraha.’ Mä Ngohi tinitemo nginika: Niapulono o dumule-o dumule ikuratioka, imahidiai mangale iutuku!

³⁶ O nyawa youtu-utuku imuläenge yodahongo manga hewa deʼ yototoomu mahohoko mangale o ngango madutu deʼ i kakali. Hiädono yodato-datomo deʼ youtu-utuku yakunu yokokimörene.

³⁷ Ohi ade nënanga de madiaioka, ’Moi yodatomo, mahomoa youtuku.’

³⁸ Ngohi tinihuloko ngini nioiki niutuku o dumuleika ngini nitumuleua, o nyawa mahomoa yomanaramoka dokengoka, deʼ ngini niö dahongo mautumu to önanga manga manaramino.”

³⁹ Manga ngöe o Samaria manyawa o bereraka gënanga iwingaku o Yesusika, hababu o ngoheka gënanga mato, ”Unanga wohihi ngahu ngohino hagala mata-mata ngohi tododiaioka.”

⁴⁰ Maöraha o Samaria manyawa gënanga imakamäke de o Yesus, önanga yogahoko duru iwiributu, hupaya Unanga wogogerohi dede önanga. Hoʼ o Yesus wogogere genangoka o wange hinoto madekana.

⁴¹ Maduruino iholoi yowöeoli o nyawa iwingaku o Yesusika, hababu okia wadotoko mahirete onangika.

⁴² Onanga yotemo o ngohekaika gënanga, ”Ngomi mingaku örahanënanga, igoungua hababu okia nomihi ngahu ngomino, mä karana ngomi mahirete mi ihenoka mangale Unanga, deʼ mihiöriki Unanga igoungu o dunia Wohi hohalamati.”

O Yesus wihitogumu o kadatoka womomanarama aingohaka

⁴³ O wange hinoto ipaha wogogere o Sikar, o Yesus woiki o Galileaika.

⁴⁴ O Yesus mahirete wotemoka, ”O nabi womatëngo iwihoromatiua toünanga aiberera madutuoka.”

⁴⁵ Mä maöraha Unanga womahiädono o Galileaika, o nyawa manga ngöe dokengoka iwibuhuku de manga hininga imore-morene, hababu önanga naga o Yerusalemoka yamäkeoka mangöe o Yesus wodiai o Paskah ma Wange ma Amokoka.

⁴⁶ Ahao o Yesus womaidulu o Kana mabereraika o Galilea ma tonakoka, kiaka Unanga wohidadioka o akere idadi o angguru. O Kapernaumoka naga womatëngo o kadatoka womomanarama aingohaka wopanyake.

⁴⁷ Mä oraha ünanga woihene o Yesus woböa inoka o Galileaka o Yudea de waino, ünanga woiki o Yesusika deʼ wogahoko o Yesus waika o Kapernaumika la wihitogumu aingohaka ngadeke wohonenge.

⁴⁸ O Yesus witemo o kadatoka womomanaramika gënanga, ”Nako niamäkeuahi ihëra-hëranga, ngini ningakua.”

⁴⁹ ”Tuanga,” o kadatoka womomanarama wohaluhu, ïtaiti noböa ahingohaka wohonenguahi de.”

⁵⁰ O Yesus witemo unangika, ”Noiki, aningohaka wotogumoka.” O nyawa gënanga wangaku o Yesus aidemoika, deʼ unanga woiki.

⁵¹ O ngëkomo mahidogoronaka, iwilöleleani yoböa unangika deʼ iwihingahu, ”Ani ngohaka Tuanga wotogumoka.”

⁵² Daha ünanga wäleha onangika, o takoro muruono o ngohaka gënanga muläenge wotogumu. Onanga yohaluhu, ”Kanugono mudukua hotakoro moi o wange ikorona aigogama ihihanga.”

⁵³ Daha o ngohaka aiama gënanga wohininga maöraha hokogënanga o Yesus wotemo unangika, ”Ani ngohaka wotogumoka.” Hoʼ unanga deʼ aitau madol̄a iwingaku o Yesusika.

⁵⁴ Gënanga o nonako ihëra-hëranga mahinoto o Yesus wodiai o Galileaka, maöraha Unanga o Yudea de waino.