O YOHANIS 18 - MA JOU AI BUKU O ABARI MA OA

O Yesus iwitagoko

¹ Hokogënanga o Yesus woma niata iböto, Unanga de iwinöninïki yoiki yatobongo o Kidron ma Ngairi. Genangoka naga o dumule moi, deʼ o Yesus de iwinöninïki yowohama o dumuleika gënanga.

² O Yudas wohininga dorou gënanga, wohiöriki o ngï gënanga; hababu o Yesus mamoi-mamoi imatoomu genangoka de iwinöninïki.

³ O Yudas woiki o ngï ika gënanga de waao o duduono moi o tentara Romawi deʼ yamuruono naga ma Jou Madutu ai Tau magogöana yamäke o huhuloko o imam-imam manga häekino deʼ o Farisioka manyawaino. Onanga imagao o daë, o lantera deʼ o oboro.

⁴ O Yesus wohiöriki mata-mata aha idadi Ai dirika. Hoʼ Unanga womahi tigi hagala o nyawaika gënanga deʼ waleha, ”Ngini nialingiri o nagona?”

⁵ Onanga yohaluhu, ”O Yesus o Nazaret manyawa.” O Yesus wato, ”Ngohila Unanga.” O Yudas wohininga dodorou womaokoino genangoka dede önanga.

⁶ Maöraha o Yesus watemo onangika, ”Ngohila Unanga,” önanga mata-mata yodohuku deʼ yoruba o tonakuku.

⁷ Mamoioli o Yesus waleha onangika, ”Ngini nialingiri o nagona?” Onanga yohaluhu, ”O Yesus Nazaret manyawa.”

⁸ O Yesus wato, ”Ngohi totemo iböto Ngohila Unanga.” ”Deʼ nako igoungu Ngohi ngini nihilingiri, niamal̄aika önanga mahomoa nënanga yoiki.” (

⁹ De wotemo hoko gënanga, imadadi okia o Yesus wohidodemo iböto ngaro kowahi de gënanga: ”Ama, o nyawa Ama nohihidöa-döakoka Ngohino, kao nyawa moiö de yohihangua.”)

¹⁰ O Simon Petrus womagaoino o oworo moi, warahuku daha wioto o imam womomulia aigilaongo hiädono ipageloka aingauku manirakoka. O gilaongo gënanga airomanga o Malkus.

¹¹ O Yesus wotemo o Petrusika, ”Nohi ngohamoli anioworo maharunguku! Okia ngona napikiri Ngohi aha taokerua o hangihara magalahi o Ama wohihidöakoka Ngohino?”

O Yesus iwiao wihimanga o Hanas

¹² Daha o Romawi matentara de manga baluhu deʼ o Yahudioka yagöa-göana iwitagoko deʼ iwiliko o Yesus.

¹³ Madodihiraka önanga iwiao o Yesus wihimanga o Hanas, o Kayafas aitoroa. O Kayafas ganga o imam womomulia o taongo gënanga.

¹⁴ Deʼ unangala wanasihatoka o Yahudi manyawa yokokuaha, iholoi yaoa o nyawa womatëngo wohonenge mangale o hoana yongodumu.

O Petrus wihipongono o Yesus

¹⁵ O Simon Petrus deʼ womatëngo iwinöninïki mahomoa iwinïki o Yesus. Wonöninïki mahomoa nënanga winäko ma imam womomulia; hoʼ unanga witomoteke wowohama dede o Yesus ma imam womomulia aitau malöaika,

¹⁶ ma o Petrus wotamä maporetoka, o ngoranoka. Winöninïki mahomoa gënanga woiki wohupu deʼ womi temo o ngoheka molöleleani o ngorana magogöana, daha wiao o Petrus wihingohama magoronaika.

¹⁷ O ngoheka molöleleani o ngorana magogöana gënanga mitemo o Petrusika, ”Hei, koigoungua ngonaö o nyawa ninöninïki o nyawa gënanga?” ”Kowali,” o Petrus wohaluhu.

¹⁸ O öraha gënanga o alo kohamäta, hoʼ yolöleleani deʼ yogo göa-göana imadofoil̄e o uku deʼ onanga imarauku genangoka. O Petrus woiki genangika deʼ womaokoino womarauku dede önanga.

O imam womomulia wileha o Yesus

¹⁹ O imam womomulia wileha o Yesus mangale iwinöninïki deʼ mangale Ai dodötoko.

²⁰ O Yesus wohaluhu, ”Ngohi hoko genangika totemo tohitararonuku o nyawa yowöe-wöe manga himangoka. Ngohi hokogenangika tadotoko o puji matau-tauoka deʼ ma Jou Madutu ai Tauoka, o ngï Yahudioka manyawa biaha ima totoomu. Komaiwahi Ngohi totemo okia naga de toma ngiu-ngiunu.

²¹ Hoʼ yadodoa Tuanga nohi leha Ngohi? Naleha önanga yoihe-ihenoka Ngohi tadotoko. Maraioka önanga ihiöriki okia Ngohi totemoka.”

²² Maöraha o Yesus wotemo hokogënanga, womatëngo wogo göa-göana genangoka wipoka deʼ wato, ”Duru nobarani, Ngona notemo hokogënanga ma imam womomuliaika!”

²³ O Yesus wohaluhu, ”Nako Ngohi totemo okianaga moi ihowono, nahetongo nenangoka okia mahowono! Mä nako Ngohi totemo gënanga igoungu itiai, yadodoa ngona nohipoka Ngohi?”

²⁴ Dahao o Hanas wahuloko o nyawa iwiao o Yesus de aililikoka ma Imam womo Muliaika o Kayafas.

O Petrus wihipongonoli o Yesus

²⁵ O Simon Petrus kawoma okoinohi womarauku genangoka. O nyawa yotemo unangika, ”Koigoungua ngonaö ninöninïki o nyawa gënanga?” Mä o Petrus womahi pongono wato, ”Kowali!”

²⁶ O nyawa womatëngo ma imam womomulia aigilaongo, enagënanga o riadodoto de o nyawa aingauku waoto-oto o Petrus, wato, ”Koigoungua ngohi tonimäkeoka ngona o dumuleoka gënanga dede ünanga?”

²⁷ Daha o Petrus wihi pongonoli, ”Kowali,” – deʼ maöraha duru ima kokoronaika gënanga o kuru-kuru ihorene.

O Yesus wihimanga o Pilatus

²⁸ Duru ngoru-ngoruminohi önanga iwiao o Yesus o Kayafas aitauoka de magubernur aikadatoika. O Yahudioka manyawa mahirete yowohamua o kadato magoronaika, hupaya önanga uha yodadi yopeseke imoteke o agama madodagi, hababu önanga yomau yanïki yol̄omo o Paskah mangol̄omoka.

²⁹ Karana gënanga o Pilatus woiki wohupu onangika deʼ waleha, ”Okia nia galaki o nyawa ne Unangika?”

³⁰ Onanga yohaluhu, ”Hohiade Unanga koiwa Ai howono, ngomi aha miwiaoua ma Bapa Gubernurika.”

³¹ O Pilatus watemo onangika, ”Niwi l̄ë Unanga de niwi hakimi Unanga imamoteke niahukumu mahirete!” Mä o Yahudioka manyawa gënanga yohaluhu, ”Ngomi yakunua miahukumu o nyawa yohonenge.” (

³² Nënanga idadi hupaya iganapu okia o Yesus wotemoka yadäene madodagi Unanga aha wohonenge.)

³³ O Pilatus wowohamoli ai kadatoika deʼ wiahoko o Yesus, dahao wileha, ”Boteka Ngona o Yahudioka manyawa manga koano?”

³⁴ O Yesus wohaluhu, ”Okia aniloleha nënanga ngonaino mahirete ekola naga o nyawa mahomoa inihingahuoka ngonaika mangale Ngohi?”

³⁵ O Pilatus wohaluhu, ”Bote ngohi o Yahudioka manyawa? Inihi lolapahi Ngona ngohino ganga Ani nyawa mahirete deʼ o imam-imam manga häeke. Okia Ngona nodiaioka?”

³⁶ O Yesus wotemo, ”Ngohi ahi pareta o duniainoua nënanga. O demo maade nako Tongohi ahipareta o duniaino nënanga, Tongohi ahi nyawa aha yalawani hupaya Ngohi uha ihihilapahi o Yahudioka yokokuahaika. Mä igoungu Tongohi ahi pareta o duniainoua nënanga!”

³⁷ O Pilatus wileha Unangika, ”Nako hokogënanga, Ngona o koano?” O Yesus wohaluhu, ”Ngona notemoka Ngohi nënanga o koano. Ngohi tomakil̄au deʼ toböa o duniaka mangale madumutu moi, enagënanga tohidöaka o hakihi mangale o diai. O nyawa o diaino gënanga ihihigihene Ngohi.”

³⁸ O Pilatus wileha Unangika, ”Okia mamangarati o diai?” Daha o Pilatus wohupuoli ai kadatoino deʼ watemo o Yahudi manyawaika, ”Ngohi tamäke okia-kiaua Ai howono Unangoka.

O Yesus iwihukumu wohonenge

³⁹ Mä imoteke niabiaha, ngohi kiani tihilapahi o hohowono manyawa womatëngo o Paskah ma Wange ma Amokoka. Nioigo ngini hupaya ngohi tihilapahi o Yahudioka manyawa manga koano mangale ngini?”

⁴⁰ Onanga yohaluhu de ima pöa-pöaka, ”Kowali, uha Unanga, mä o Barabas!” (O Barabas ganga o nyawa moi wo ora-ora.)