O YOHANIS 14 - MA JOU AI BUKU O ABARI MA OA

O Yesus naga o ngëkomo o Amaika

¹ O Yesus watemo onangika, ”Uha niahininga ibaliha.” ”Niwi ngaku ma Jou Madutu, deʼ nihingaku Ngohino.

² Tongohi ahi Ama Ai tauoka, naga kahangöe o gogere mangï. Ngohi toiki genangika, tohidiai tingini niangï. Ngohi aha takunua totemo hokogënanga nginika, hokä nako gënanga hokogenangua.

³ Nako Ngohi toikoka tohidiai tingini niangï, Ngohi aha tolio deʼ Tini ngoho ngini, hupaya kiaka Ngohi naga, genangokaö ngini naga.

⁴ O ngï Ngohi to oi-oikika, ngini nihi öriki mangëkomo.”

⁵ Daha o Tomas wotemo o Yesusika, ”Jou, ngomi mihiörikua kiaika Jou noiki, sarakia ngomi mihiöriki mangëkomo?”

⁶ O Yesus wibaluhu, ”Ngohi o ngëkomo mangale iwinäko ma Jou Madutu deʼ yamäke o ngango. O nyawa moiua yakunu yaika o Amaika, nako kodede Ngohiua.

⁷ Hokä nako ngini nihinäko Ngohi, marai ngini aha niwinäko Tongohi Ahi Amaö. Orahanënanga ngini niwinäkoka Unanga, deʼ niwimäkeoka Unanga.”

⁸ O Filipus wotemo o Yesusika, ”Jou, nomihi matoka o Ama gënanga ngomino, hupaya ngomi iholoi miwinäko.”

⁹ Mä o Yesus wibaluhu, ”Hoko gënanga madekana Ngohi dede ngini, deʼ ngona kanohinäkouahi Ngohi, Filipus? O nyawa ihi mäkeoka Ngohi iwimäkeoka o Ama. Sarakia ngona yakunu notemo, ’Nomihi matoka o Ama ngomino’?

¹⁰ Filipus! Ngona kano ngakuahi, Ngohi kamoi de o Ama, deʼ o Ama kamoi de Ngohi? Okia Ngohi totemoka nginika, Ngohi totemoua Ahi dirino mahirete. O Ama wotatapu kamoi dede Ngohi, Unanga womanarama mata-mata gënanga.

¹¹ Nongaku Ngohino, Ngohi kamoi de o Ama, deʼ o Ama kamoi de Ngohi. Ekola makuranguku, nongaku hababu okia Ngohi tadiaioka.

¹² Igoungu itiai Ahi demo nënanga: O nyawa yongaku Ngohino, aha yadiai okia Ngohi tadiaioka, – de Unanga aha wadiai iholoi ilamokoli – hababu Ngohi toiki Ahi Amaika.

¹³ Deʼ okia dika ngini nigahoko de Tongohi ahiromanga, gënanga aha Ngohi tadiai mangale ngini, hupaya o Ama iwihimulia mangale o Ngohaka.

¹⁴ Okia dika ngini nigahoko de Tongohi ahi romanga, aha Ngohi tadiai.”

O Yesus wohijaji ma Jou Madutu ai Womaha

¹⁵ ”Nako ngini nihihininga Ngohi, ngini aha nihidagi hagala Ahi pareta tongohi.

¹⁶ Ngohi aha togahoko o Amaika, deʼ Unanga aha winihidöaka nginika o Roriwo mahomoa, aha wogogere dede ngini kahi ado-adonika.

¹⁷ Unanga gënanga ma Jou Madutu ai Womaha aha ihimatoko ma Jou Madutu aidiai. O dunia iwitarimaua Unanga, hababu iwimäkeua ekola iwinakoua. Mä ngini niwinäko Unanga, hababu Unanga wogogere dede ngini deʼ aha kamoi dede ngini.

¹⁸ Ngohi aha tinimal̄aikaua ngini hokä o gohihi. Ngohi aha toböa nginika.

¹⁹ Mahou kabotinokahidika o dunia aha ihimäke okaua Ngohi. Mä ngini aha nihimäke Ngohi. De hababu Ngohi towango, nginiö aha niwango.

²⁰ Nako yadono o wange gënanga, ngini aha nihiöriki Ngohi kamoi de o Ama, ngini kamoi de Ngohi, deʼ Ngohi kamoi de ngini.

²¹ O nyawa yatarima hagala Tongohi ahipareta de yadiai, ünanga wohihininga Ngohi. Tongohi ahi Ama aha wahininga o nyawa ihihohininga Ngohi. Ngohiö aha tahininga o nyawa gënanga deʼ tomahimatoko Ahi diri Ngohi unangika.”

²² O Yudas (o Yudas Iskariotua) woleha o Yesusika, ”Jou, yadodoa Jou nomau nomahimatoko Ani diri ngomino deʼ o duniaika kowali?”

²³ O Yesus wibaluhu, ”O nyawa ihihininga Ngohi, aha yamoteke Tongohi ahi dodötoko. Ahi Ama aha wihininga ünanga. Ahi Ama deʼ Ngohi aha miböa unangika deʼ migogere dede ünanga.

²⁴ O nyawa ihihiningaua Ngohi, yamotekua Tongohi ahidodötoko. O dodötoko ngini ni ihe-ihene gënanga, Ngohi okaua, mä Ahi Amaino wohihulo-huloko Ngohi.

²⁵ Mata-mata gënanga Ngohi tahetongo nginika hokokia madekana ngini dede Ngohi.

²⁶ Mä ma Jou Madutu ai Womaha, o Roriwo aha wahuloko Ahi Ama de Tongohi Ahi romanga, ënanga aha inidotoko ngini hagala mata-mata, deʼ inihihohininga ngini aha mata-mata, Ngohi tinihi ngahu-ngahuoka nginika.

²⁷ O dame Ngohi tini gumal̄a nginika. Ahi dame Ngohi mahirete, Ngohi tinihidöaka nginika. Ngohi tinihi döaka gënanga hokä o duniaua inihidöaka nginika. Uha nibaliha, uha nihawana.

²⁸ Ngini ni ihenoka Ngohi totemo, ’Ngohi aha toiki, mä Ngohi aha toboali nginika’. Nako ngini nihihininga Ngohi, ngini aha nimörene Ngohi toiki o Amaika, hababu ma Ama iholoi wolamoko dede Ngohi.

²⁹ Orahanënanga, Ngohi tohingahu nginika, ngaro mata-mata koidadiuahi, hupaya nako de imadadi, ngini aha ningaku.

³⁰ Ngohi aha totemokaua iholoi iwöe dede ngini, hababu yadonoka maöraha o dunia nënanga makuaha iböa. Mä enanga yakuahaua Tongohi Ahi diri.

³¹ Ngaro mata-mata gënanga kiani idadi hupaya o dunia yamäo Ngohi tihininga o Ama deʼ Tadiai hagala wohihiparetaka o Ama Ngohino. Aa, niaino, ngone homa jobo de o ngï nënanga.”