O YOHANIS 11 - MA JOU AI BUKU O ABARI MA OA

O Lazarus wohonenge

¹ Womatëngo o nyawa airomanga o Lazarus wogogere o Betania mabereraka de aibira-biranga o ngo Maria deʼ o ngo Marta.

² O ngo Maria mangoheka nemünanga mohituagi de o minya mabounu mahëmo-hëmoro ma Jou ail̄ouku, deʼ mohiehe de ami tadauru. Oraha moiuku o Lazarus wopanyake.

³ Ngoi hiranga yahinoto ihiabari o Yesusika, ”Jou, tongomi miairanga Jou nihohininga gënanga wopanyake.”

⁴ Maöraha o Yesus woihene o abari gënanga, Unanga wotemo, ”Panyake nënanga aha koidadiua o hababu wohonenge. Nënanga idadi hupaya ma Jou Madutu iwihimulia, deʼ hupaya hababu gënanga ma Jou Madutu ai Ngohakö iwihimulia.”

⁵ O Yesus wahininga o ngo Marta, o ngo Maria deʼ o Lazarus.

⁶ Mä maöraha o Yesus wamäke o abari o Lazarus wopanyake, Unanga wohangaja womagogogere o wange hinotohi.

⁷ Ipaha de gënanga aha Unanga watemo iwinöninïkika, ”Niaino ngone homa idulu o Yudeaika.”

⁸ Onanga yohaluhu, ”Bapa Guru, aha ipahaino o Yahudi manyawa yomau inikaweli Bapa de o helewo, deʼ öraha nënanga Bapa nomau homaiduloli dokengika?”

⁹ O Yesus wato, ”Mode koigoungua o wangeoka madekana o jam ngimoi de hinoto?” ”O nyawa imadagi o wangeoka, yopelekua hababu önanga yamäke o dunia madararono nënanga.

¹⁰ Mä o nyawa yotagi maöraha o hutu-hutu aha yopeleke, hababu koiwa o dararono onangoka.”

¹¹ Hoko gënanga o Yesus wotemo. Ipaha Unanga wotemoli, ”Tongone nanga dodiawo o Lazarus womaiduoka, mä Ngohi aha toiki titomanga ünanga.”

¹² Iwinöninïki o Yesus yotemo, ”Jou, nako o Lazarus womaiduoka, done ünanga aha wotogumu.”

¹³ O Yesus aidungutu, enagënanga o Lazarus wohonengoka. Mä onanga yatobote o Yesus wotemo gënanga naga o Lazarus womaidu biaha.

¹⁴ Karana gënanga o Yesus wotemo onangika wohitotararonika, ”O Lazarus wohonengoka.

¹⁵ Mä Ngohi kato sanangi dika, Ngohi koihiwa naga dokengoka, hababu iholoi yaoa mangale ngini, hupaya yakunu ningaku. Niaino ngone hoiki öraha nënanga o Lazarusika.”

¹⁶ O Tomas, iwiaho-ahoko ”O Hago” watemo aidodiawoika iwinöninïki o Yesus, ”Niaino ngone hinïki, mal̄aika la ngoneö hohonenge dede Unanga!”

Wohi wango okali deʼ wohidöaka o ngango

¹⁷ Maöraha o Yesus womahiädono o ngï gënanga, o Lazarus o wange iata iböto madekana o lungunoka.

¹⁸ Betania yadatekuku o Yerusalem done ho kilo hange magurutika imatingaka.

¹⁹ Manga ngöe o Yahudioka manyawa yoböainoka yalega o ngo Marta deʼ o ngo Maria mangale yalaru önanga hababu wohonenge manga iranga.

²⁰ Maöraha o ngo Marta moihene o Yesus woböa, münanga mohupu mibuhuku o Yesus, ma o ngo Maria mogogogere o tauoka.

²¹ O ngo Marta motemo o Yesusika, ”Jou, hokänako Jou naga nenangoka öraha gënanga marai tongohi ahiranga wohonengua.

²² Ngaro hoko gënanga ngohi tohiöriki öraha nënanga dika ma Jou Madutu aha wohidöaka okia dika Jou nogahoko Unangika.”

²³ O Yesus wotemo o ngo Martaika, ”Ani iranga aha wowangoli.”

²⁴ O ngo Marta mohaluhu, ”Ngohi tohiöriki o Lazarus aha wowangoli nako o nyawa yohone-honengoka yomomiki o Kiamati ma Wangeoka.”

²⁵ O Yesus womi temo o ngo Martaika, ”Ngohi tahidöaka o wowango deʼ Ngohi tahi momiki o nyawa yohone-honengoka.” ”O nyawa ihingaku Ngohino aha yowango, ngaro Unanga wohonengoka.

²⁶ Deʼ o nyawa yowango-wango ihingaku Ngohino, kahi ado-adonika aha yohonengua. Nongaku ngona o hali gënanga?”

²⁷ ”Jou,” o ngo Marta mohaluhu, ”Ngohi tongaku Jou ma Jou Madutu ai Ngohaka, ma Koano Wohihohalamati aha woböa o duniaino.”

O Yesus woari

²⁸ O ngo Marta motemo ipaha hokogënanga, münanga moiki momiahoko o ngo Maria deʼ momihudu munangika, ”Ma Bapa Guru naga nenangoka; Unanga wonileha ngona.”

²⁹ Moihene gënanga, o ngo Maria moma tai-taiti momomiki, daha moiki ima mäke de o Yesus.

³⁰ Oraha gënanga, o Yesus wowohamuahi o kapongika. Unanga ka o ngo Marta ami ngï okahi kiaka imamäke de Unanga.

³¹ O Yahudioka manyawa imilolaru-laru o ngo Maria amitauoka, imimäke o ngo Maria momomiki de moma tai-taiti mohupu; hoʼ onanga yoiki iminïki münanga, hababu önanga yatobote münanga moiki o lungunika la moari.

³² Maöraha o ngo Maria momahiädono o Yesus aingïika deʼ mimäke Unanga, o ngo Maria matilabukuku Ai himangoka deʼ motemo, ”Jou, hokä nako Jou naga nenangoka öraha gënanga, marai ahi iranga wohonengua.”

³³ Maöraha o Yesus womimäke o ngo Maria moari, deʼ o Yahudioka manyawa yoböa-böaino imakinïki de o ngo Maria gënanga onangö yoari, Ai hininga ihuha, deʼ Unanga iwimäke duruhe iwitora.

³⁴ De Unanga waleha onangika, ”Kiaka ngini niwilungunu ünanga?” Onanga yohaluhu, ”Naino nolega, Jou.”

³⁵ Daha o Yesus woari.

³⁶ O Yahudioka manyawa gënanga yotemo, ”Niwimäke, kaogoguleua Ai dora o Lazarusika!”

³⁷ Mä naga manga hidogoronaka önanga yotemo, ”Unanga wadiai o nyawa yopilokoka imahiöriki, yadodoa Unanga wakunua watatoko hupaya o Lazarus uha wohonenge?”

O Lazarus wihiwangokali

³⁸ O Yesus duruhe iwitorali, daha woiki o lungunika. O lungunu gënanga naga o aruku moi ihitamunu de o helewo kohapako.

³⁹ O Yesus wato, ”Nihirehene o helewo gënanga.” O ngo Marta, ngoi hiranga o nyawa wohone-honenge gënanga, mohaluhu, ”Mä, Jou ünanga o wange iata iböto o lungunoka. Marai aibounu imelaka!”

⁴⁰ O Yesus wotemo o ngo Martaika, ”Ngohi totemoka ngonaika: Nako ngona nongaku, ngona aha namäke hokokia ma amoko ma Jou Madutu aikuaha!”

⁴¹ De onangö ihirehene o helewo gënanga. Dahao o Yesus womamataga o dihangil̄e deʼ wotemo, ”Tarima kasi, Bapa, hababu Ngona nohigihenoka Ngohi.

⁴² Ngohi tohi öriki Ngona hoko genangika nohi gihene Ngohi, mä Ngohi totemo nënanga, mangale o kawaha naga nenangoka; hupaya önanga yongaku Ngonala nohi huloko Ngohi.”

⁴³ Iböto wotemo hokogënanga, o Yesus wotemo de Ai ilingi ilamoko, ”Lazarus, nohupu!”

⁴⁴ Daha o Lazarus wohone-honengoka gënanga wohupu. Mä aigiama deʼ ail̄ou kade mahahawookahi de o ngöere magare-garehe mahohailoa deʼ aibiono kai tamunukohi de o ngöere o biono madadamunu. ”Niahohe o ngöere magare-garehe gënanga hupaya ünanga womadagi woworo-woro,” o Yesus watemo o kawahaika gënanga.

O hidailako madorou o Yesusika

⁴⁵ O Yahudioka manyawa manga ngöe yoböa-böaino imilega o ngo Maria, iwingaku o Yesusika maöraha önanga yamäke idodadadi gënanga.

⁴⁶ Mä yamuruono naga manga hidogoronaka önanga, yoiki o Farisioka manyawaika deʼ yoade-ade okia wadiaioka o Yesus.

⁴⁷ Hababu gënanga o Farisioka manyawa deʼ o imam-imam manga häeke yadiai o doomu de o Agama ma Juru Hakimi. Onanga yato, ”Ngone kiani hodiai okia? O nyawa nënanga wodiai mangöe ihëra-hëranga!

⁴⁸ Nako ngone himal̄a Unanga hoko nënanga o nyawa mata-mata aha iwingaku Unangika. Deʼ mabaha yokokuaha o Romaka aha yoböa yawedere ma Jou ai Tau deʼ mata-mata tongone nanga hoana.”

⁴⁹ Womatëngo onangino airomanga o Kayafas, imam womomulia taongo gënanga, wotemo, ”Ngini okia-kiaua nihiöriki.

⁵⁰ Yadodoa ho ngini niodibangua mangale o kawaha iholoi yaoa o nyawa womatëngo wohonenge, la uha o hoana mata-mata yobinaha?”

⁵¹ Imoteke madiai o Kayafas wotemo gënanga, aidibanga mahirete okaua de yaino. Mä hokä o imam womomulia o taongo gënanga ünanga wohidodemoka mangale o Yesus aha wohonenge mangale o Yahudioka manyawa.

⁵² Deʼ ka o Yahudi manyawaua dika, mä genangö mangale yatoomu deʼ yahirimoi ma Jou Madutu Ai ngoha-ngohaka imahi koka barihika.

⁵³ Muläenge o wange gënanga o Yahudioka manyawa yokokuaha imakaturu mangale iwitoma o Yesus.

⁵⁴ Hababu gënanga o Yesus waikaokaua o nyawa yowöe-wöe manga himangika o Yahudi manyawa manga hidogoronaka. Unanga wamal̄a o Yudea, daha woiki o bereraika maromanga Efraim itigi de o tonaka makokakaha. Genangoka Unanga wogogere de iwinöninïki.

⁵⁵ Oraha gënanga o Yahudioka manga Wange ma Amoko o Paskah itigioka. Manga ngöe o nyawa o kapo-kapongino yoikoka o Yerusalemika mangale yadiai madatoro ihitebini manga diri, koi dadiuahi o rame-rame gënanga.

⁵⁶ Onanga iwilingiri o Yesus, deʼ maöraha imatoomu ma Jou ai Tauoka, önanga imaketemo moi de moika, ”Sarakia niadamäke? Ngaroma Unanga wainoua o rame-rameino nënanga.”

⁵⁷ Onanga yotemo gënanga hababu o imam-imam manga häeke deʼ o Farisioka manyawa ihihupuoka o pareta, nako o nyawa ihiöriki okiaka o Yesus naga, kiani ihingahu, hupaya o Yesus yakunu iwitagoko.