O YOHANIS 10 - MA JOU AI BUKU O ABARI MA OA

O hitotero o duba deʼ magogöana

¹ ”Igoungu itiai Ahi demo nënanga: O nyawa yowohama o duba makurunga magoronaika yanïkua o ngorana, mä yodoa yanonu o ngëkomo mahomoa, o nyawa gënanga yotohi-tohiki deʼ yo ora-ora.

² Mä o nyawa yowohama yanïki o ngorana, ünanga o duba magogöana.

³ O kurunga magogöana wibelenga o ngorana mangale ünanga, deʼ o duba-duba yanïki ai ilingi maöraha ünanga wa ahoko de maromanga ënanga moi-moi deʼ watuda ënanga wohihupu.

⁴ Wohihupu iböto o duba-duba gënanga, o gogöana gënanga womadagi mahimangoka, deʼ o duba-duba gënanga iwinïki ünanga hababu ënanga yanäko ai ilingi.

⁵ Enanga aha ioluku yänïki o nyawa mahomoa, ma aha iwidokaoara o nyawa gënanga, hababu yanäkoua ai ilingi.”

⁶ O Yesus wohi ade-ade o hitotero nënanga, mä onanga imangaratiua okia Ai dungutu.

O Yesus, o gogöana maoa

⁷ O Yesus wotemo wohigalioli, ”Igoungu itiai Ahi demo nënanga: Ngohila o ngorana mangale o duba.

⁸ Mata-mata yoböa-böa ihira de Ngohi, geönanga yotohi-tohiki deʼ yo ora-ora, mä o duba-duba ihigihenua toönanga manga ilingi.

⁹ Ngohila o ngorana. O nagona yowohama ihinonu Ngohi, aha yohalamati; ünanga wohupu wowohama deʼ wamäke o inomo.

¹⁰ Yotohi-tohiki yoböa duga-duga mangale yotohiki, mangale yotoma deʼ mangale yakilianga. Mä Ngohi toböa hupaya o nyawa yamäke o ngango – o ngango de maboloioka.

¹¹ Ngohi o gogöana maoa. Gogöana maoa wohidöaka Ai wowango mangale Ai duba-duba.

¹² O hewa manyawa o gogoanua gënanga, deʼ o duba-dubaö gënanga tounaua, aha woara wamal̄aika o duba-duba nako ünanga wamäke o kaho honganika iböa. Done o duba-duba gënanga aha o kaho honganika yakaboto deʼ ihikokabarihika.

¹³ O hewa manyawa gënanga woara, hababu ünanga womanarama mangale o hewa. Unanga wahaduliua o duba-duba gënanga.

^14-15 Ngohila o gogöana maoa. Hokä o Ama wohinäko Ngohi deʼ Ngohi tinäko o Ama, hokogenangoli Ngohi tanäko Ahi duba-duba deʼ enangö ihinäko Ngohi. Ngohi tomahilapahi Ahi wowango mangale önanga.

¹⁶ Nagahi o duba-duba mahomoaö ka Ngohi madutu, mä iwohamua o duba matika magoronaika nënanga. Onangö kiani ta ao deʼ onanga aha ihigihene Ahi ilingi. Onanga mata-mata aha yodadi kao tikamoi de magogöana kamoi.

¹⁷ O Ama wohihininga Ngohi hababu Ngohi tomahilapahi Tongohi ahiwowango, mangale tatarimaokali.

¹⁸ O nyawa moiuaö yakunu yal̄ë Ngohioka. Ngohi tohilapahi imoteke Ahi mau mahirete. Ngohi tokuaha tohilapahi, deʼ tokuaha tal̄ëoli. Gënanga Tongohi ahi manarama, tatarima Ahi Amaino.”

¹⁹ Karana o Yesus wotemo hokogënanga, o Yahudioka manyawa muläenge imateke ributu.

²⁰ Yowöe yotemo, ”Unanga iwipootekika o tokata! Unanga iwitogohanga! Mangale okia ngini niwihi gihene ünanga?”

²¹ Mä nagaö yotemo, ”O nyawa yapootekika o tokata, hokogenangua yotemo-temo! Yakunu o tokata yadiai o nyawa yopiloko yakunu imahiöriki?”

O Yahudi manyawa yoluku iwitarima o Yesus

²² O Yerusalemoka magogiria o nyawa ihirame ma Jou ai Tau ma Tabisang ma Wange. Oraha gënanga o dumamäta maöraha.

²³ O Yesus woma dagi-dagi o Löa Salomo, ma Jou ai Tau magoronaka,

²⁴ o öraha o Yahudi manyawa yoböa imatoomu iwihigilolitino o Yesus. Onanga yotemo, ”Hiädono hokokia Ngona nomau nomi mal̄aika ngomi mibingu? Nomihi ngahu nohitotararonino, nako Ngona igou-goungu ma Koano Wohihohalamati.”

²⁵ O Yesus wohaluhu, ”Ngohi totemoka nginika, mä ngini ningakua. O manarama-manarama Ngohi tadiai de Ahi Ama Ai romanga, ihidöaka manyonyata mangale Ngohi.

²⁶ Ngini ningakua hababu ngini iwohamua Tongohi ahi duba-duba.

²⁷ Ahi duba-duba yogihene Ahi ilingi. Ngohi tanako ënanga, deʼ enanga ihinïki Ngohi.

²⁸ Ngohi tahidöaka önanga o ngango madutu deʼ ikakali, deʼ kahiado-adonika önanga aha yobinahaua. O nyawa moiuaö yakunu yaora önanga Tongohi ahi giamoka.

²⁹ Ahi Ama, wohihidöaka önanga Ngohino, yatilakuril̄e hagala mata-mata. Deʼ o nyawa moiuaö yakunu yäora önanga Ahi Ama aigiamoka.

³⁰ Ngohi deʼ o Ama naga kamoi.”

³¹ Daha o Yahudioka manyawa imal̄ëoli o helewo yato iwi kaweli o Yesus.

³² Mä, o Yesus watemo onangika, ”Ngini nia mäkeoka Ngohi tadiai o manarama ma oa-oa mangöe, wohihi döakoka o Ama Ngohino. O manaramino mata-mata gënanga, kiaka idadi hababu, ngini nimau nihikaweli Ngohi?”

³³ O Yahudioka manyawa gënanga yohaluhu, ”Igoungua karana Ani manarama-manarama maoa-oa gënanga ngomi mimau minikaweli Ngona de o helewo, mä hababu Ngona nihikauku ma Jou Madutu. Ngona o nyawa moi, nomau nomadiai Anidiri ma Jou Madutu.”

³⁴ Daha o Yesus wohaluhu, ”Mode koigoungua nia Tita ma Buku magoronaka itulihi: ma Jou Madutu wotemo, ’Ngini naga o gikiri’?

³⁵ Ngone hohiöriki okia itulihi Ma Jou Ai Demo ma Buku magoronaka idadi mangale kahiado-adonika. Hoʼ, nako ma Jou Madutu wahetongo ’o gikiri’ hagala o nyawaika yatotarima Ai demo,

³⁶ yadodoa ngini nitemo Ngohi tihikauku ma Jou Madutu hababu totemo Ngohi ma Jou Madutu Ai Ngohaka? Enahioko Ngohi wohiiriki o Ama deʼ wohihuloko o duniauku.

³⁷ Nako Ngohi tadiaiua o manarama wohihidöakoka o Ama, uha nihingaku Ngohino.

³⁸ Mä karana Ngohi tadiai ënanga, niangaku aha okia Ngohi tadiai gënanga, ngaro ngini nioluku nihingaku Ngohino. De hokogënanga ngini nihiöriki deʼ nimangarati o Ama tatapu kamoi de Ngohi, deʼ Ngohi i tatapu kamoi de o Ama.”

³⁹ Onanga ihidailakoli iwi tagoko o Yesus, mä Unanga wolapahi önanga manga giamoka.

⁴⁰ O Yesus wolio o Yordan ma Ngairi mahonongaika, o ngï o Yohanis mahira waohiki deʼ wogogere dokengoka.

⁴¹ Manga ngöe o nyawa yoböa Unangika. Onanga yato, ”O Yohanis wodiaiua i hëra-hëranga, mä mata-mata wohi dodemoka mangale o nyawa nënanga itiai.”

⁴² Daha o nyawa manga ngöe dokengoka yongaku o Yesusika.