O YOEL 3 - MA JOU AI BUKU O ABARI MA OA

Ma Jou Madutu wahi juru hakimi hagala o hoana deo berera

¹ Ma Jou wotemo, ”Oraha gënanga o Yerusalem deʼ o Yehuda aha hoi hira-hiraoli manga hasili iwöe.

² Mata-mata o hoana deo berera Tä toomu deʼ Tä ao o Juru Hakimi ma Wai ika. De Tahi juru hakimi önanga genangokadau mangale manga dorou Ahi umatika karana önanga imä kokereguoka o Israel matonaka deʼ Ahi umati önanga yä umo o berera irupa-rupa ika.

³ Onanga yä undi la ihi tatapu onagona aha ya make yä tago-tagokino. Onanga yo hukunu o momoholehe deʼ o gogoduru la imä diai o gilaongo. Deʼ ma tiwi önanga ya pake mangale o ngoheka manga röehe ya huku-hukunu deʼ mangale o angguru ya oke-okere.

⁴ Ngini ni mau nihi dodoa Ngohi nënanga, hei Tirus, Sidon deʼ o Filistin madaera ya mode-modekika? Ni mau ngini nia balahi itotorou Ngohi ino? Aah, nia tarima Toma hibalahi dema japati iböa.

⁵ Ahi gurasi deʼ Ahi haaka ngini nia ora ka, deʼ Ahi arata dema o oraganeoka ngini nia toraka nia gomanga ma tau ika.

⁶ O Yehuda deʼ o Yerusalem yogö gogere ngini niä ao ma gurutika de toönanga manga berera, deipaha ngini nia hukunu o Yunani manyawaika.

⁷ Oraha nënanga Ngohi tä ao önanga Tahi hupu ngini nia huku-hukunu mangï ino, deʼ Ngohi aha ta balahi nia dorou onangika.

⁸ Nia ngoha-ngohaka o nauru deʼ o ngoheka aha aha Tä hukunu o Yehuda manyawaika, de aha yä hukunoli o Syebaika, o berera duru magö gurutila. Ngohi, ma Jou, to temoka.

⁹ Nihingahu o bobita nënanga hagala o hoana deo berera ika: Nima hidiaiino ni parangi o hohi tubele yo kuata! Niä toomu yo sosawaro deʼ yonö nau-nauru yo parangi; niä toomu mata-mata o tentara, deʼ ni tagi nia himangika!

¹⁰ Nia tutuku nia pajeko ma doto idadi nia oworo, deʼ o gakana nihi pö poporo idadi nia tutuduku. O nyawa yo bole-bole kokiani yo temo, ʼNgohi takunu to parangi hokä o tentara.

¹¹ Ika, ni böa dema japati, hei hagala o hoana deo berera hagala okiaino honanga! Nima toomu dokengoka o wai oka.” Ya, Jou, nä huloko Ani tentara yä parangi önanga!

¹² Ma Jou wätemoli, ”Hagala o hoana deo berera kokiani ima hidiaino deʼ yoiki o Juru Hakimi ma wai ika. Genangokadau Ngohi ma Jou aha ta hi juru hakimi o hoana deo berera Ahi umati ima kokadateke.

¹³ Onanga duru itorou; niä pairi önanga hokä o gandum iohakoka o dumuleoka. Niä doko-doko önanga hokä o angguru ioma-omanga hiadono ikopoa.

¹⁴ O nyawa de manga ribu-ribuhu naga o Juru Hakimi ma Wai oka. Hababu dokengoka ma Jou Ai Wange aha itaiti iböa.

¹⁵ O wange deʼ o mede aha idadi ihuhutu, deʼ hagala o murumu aha i cahayaokaua.”

Ma Jou Madutu aha wahi barakati Ai umati

¹⁶ Ma Jou woma pöaka o Sion de yaino, to unanga Ai l̄oku; o Yerusalem de yaino Ai ilingi ima dotoreke. O dihanga deʼ o dunia igiwi karana Unanga. Mä ma Jou aha kahirahi wa riwo deʼ wa goana o Israel Ai umati.

¹⁷ ”Hei Israel, ngini aha nihioriki, Ngohi ma Jou nia Jou Madutu. Ngohi to gögere o Sion ma l̄akuoka, Ahi l̄oku itebi-tebini. De o Yerusalem ma idadi o kota itebi-tebini, o nyawa ma poretino aha koyö ngohamokaua.

¹⁸ O oraha gënanga hagala l̄oku aha omanga o angguru ma dumule. O aiwani o gigini aha iol̄omo o momo hagala o doporono iboburereoka. Hagala o ngairi o Yehuda ma tonakoka aha komaiwa ma akere idudungu. O gahumu moi o ngairi aha ihahuru ma Jou Ai Tau ino, deʼ ya pehaka o Akasia ma Wai deo akere isosanangi.

¹⁹ O Mesir aha idadi o tonaka ma kokakaha, deʼ o Edom idadi itoongoro, o nyawa yö gogerua. Hababu önanga yä parangioka o Yehuda manyawa, deʼ yä toma maberera ma dutu koiwa-iwa manga howono.

^20-21 Mangale toönanga manga awunu aha To dota gahoko ma balahi, yä toma-toma aha yo honenge Tä pairi. Mä o Yehuda deʼ o Yerusalem aha salalu o nyawa yö gogere, deʼ o Sion mal̄oku aha kahirahi Ngohi tö gogere.”