O YOEL 2 - MA JOU AI BUKU O ABARI MA OA

O hohininga mangale ma Jou Ai wange aha ibö boa-boa

¹ Nia wuwu o trompet, nihitoilingi o bodito ma nonako o Sion ma doporono itebi-tebinoka, ma Jou Madutu wogö gogeroka. Ni hahara, hei o Yehuda nigö gogere! Hababu ma Jou Ai wange itigioka deʼ i taiti iböa.

² O wange gënanga itararonua deʼ kama hohuhutu mahai-haiti, iomanga deo domoata kama kafo-kafo. O tentara o kahoho yo kokiboa hokä o lobi ihoheika o l̄oku ma buturungoka. Idö da dadi hoko gënanga komaiwahi idadi, deʼ aha ihi gali-galiokaua ka hiado-adonika.

³ Hokä o uku iharongo deʼ yo uku ënanga ya binaha hagala idö dato-datomo. Mahira, o berera gënanga hokä o Eden ma Jou Ai dumule, ipaha hokaʼ o tonaka ikokahaha ma tore-tore. Ka okianaga moi ma koiwa ma hou, onanga yä ngino moi-moiua yakunu yo atana.

⁴ To ënanga ma rupa hokä o kuda; ima popata hokä o kuda o parangi ma himangoka.

⁵ Enanga ima tototubo o l̄oku ma buturungu ma tubuoka, ma ilingi makarau hokä o kereta ihi poparangi ma karau deʼ hoka o uku itetëke ya tuhuku o gandum ma röehe ma merang. Enanga ituono hokä o tentara yo nau-nauru manga duduono, ima hidiaioka yoiki o parangi ma himangika.

⁶ Maöraha enanga iparangi, mata-mata o nyawa yo hahara, mata-mata manga biono i mule deʼ iwangorua.

⁷ Hokä o nyawa yo nau-nauru, ënanga iparangi, deʼ ya doa o bebeno o mehele hokä yo poparangi. Enanga ituono iriko-rikoto manga himangika, irehe-rehenua ekola ta ngali ma dihira.

⁸ Enanga ima kokehetua, enanga ya nonu ma ngekomo ma hirete. Yo rorimoi ënanga ya kilianga hagala o dadatoko, to ënanga manga duduono yakunua ya tumungu.

⁹ Enanga iparangi o kota ma gorona ika, deʼ ima popata o bebeno o mehele malokuino. Enanga idöa manga tau ma gorona ika; hokä yo tohi-tohiki, onanga yowohama o janelail̄e ya doa.

¹⁰ Ma gogiriaka itagi ma himangika, o dunia ihahara, deʼ o dihanga ma itodara. Deo wange ma lako deʼ o mede ihuhutu, deʼ hagala o murumu ma cahaya ihihanga.

¹¹ Ma Jou Ai ilingi hoka o dotoreke, wo hidöaka o nanako, hagala aitentara yo poparangi ika. Hokokia manga ngöe aitentara! Hokokia manga kuata aitentara ya dodiai Ai pareta! I goungu hö modongo deʼ hö borohono ma Jou Ai Wange! O nyawa moiua yakunu yo tongohono.

Wo ahoko la yatiai manga wowango

¹² Ma Jou wätemo, ”Ma o oraha nënanga, ni lio Ngohi ino de nia hininga ma gahumu, ikali ni puaha, ni dodora deʼ ni ari.

¹³ Nia kakihi nia hininga deʼ uha nia pakeanga.” Nima idulu ma Jou nia Jou Madutu ika. Unanga ikurutu ai sabari deʼ wota hayangi Ai hininga imura deʼ iwi omanga o dora. Wo sanangi wini hiapongo deʼ wo igoua wohidagi Ai hukumanga.

¹⁴ Mudukua ma Jou nia Jou Madutu wa ngali Ai goko il̄e, deʼ wini hibarakati ngini dema boboloi. Hiadono ngini niakunua nihihuba o huhuba o angguru deʼ o gandum mangale ma Jou, nia Jou Madutu.

¹⁵ Ni wuwu o trompet o Sion, ma Jou Madutu Ai l̄oku oka, nihi ngahu-ngahu o puaha mawange, nia diai o gamake ma doomu ilago-agomo.

¹⁶ Nia toomu o kawaha yo ngodumu, niä ahoko ima toomu o umati ma dodoomu. Niä huloko yo böa o balu-baluhu, o ngoha-ngohaka deʼ ongohaka ma gil̄au o. Ma boboloi yo kawi-kawingi ma hungi kokianioli yo böa. Niä huloko önanga ya mal̄a manga kamari.

¹⁷ Niä huloko o imam-imam iwi lö leleani ma Jou, yo ari o huhuba mangï deʼ o pandopo ma himangoka ma hidogorona, ikali yo temo, ”Nomï dora Ani umati ya Jou; uha na mal̄aika tongona Ani idadi dema dorou,” hiadono o hoana deo berera ma homoa ya hohedu deʼ yo temo, ”Kiaka wa ika toönanga manga Jou Madutu?”

Ma Jou Madutu wadiai o tonaka i burereoli

¹⁸ Daha ma Jou watö tailako Ai tonaka, deʼ wä dora Ai umati.

¹⁹ Unanga wä baluhu onanga hoko nënanga, ”Oraha nënanga ngini mata-mata Tini hidöaka: o gandum, o angguru deʼ o zaitun ma minya mangale nia inomo, hupaya ngini mata-mata inï punuhu. Ngohi aha tohi gumalaokaua ngini inï hikauku ekola hegala o hoana deo berera inï gogiete.

²⁰ O kahoho ma duduono o koremieil̄e aha Ta duhu, o hidoku moi Ta duhu o tonaka i kokahahaika. O Honenge ma Ngötika Ta huhuru ma duduono ma hima-himangoka, o ngoto ikokoronaika Ta tila ma duduono ma poretino. Ma honenge aha imel̄a. Enanga Ta binaha hababu inï hangiharaoka ngini.

²¹ Uha ni hawana, hei o dumule, nihi sanangi nia hininga; niohininga o hali ma ago-agomo ma Jou wamo manarama mangale ngini.

²² Hei hagala o aiwani, uha nia hininga i burakiti. O momo o tonaka ilua-luasoka oraha nënanga kama ijo-ijo. Hagala o gota ma utu ihohoko duru iwöe, o angguru deʼ o ara ma hohoko dema boboloi.

²³ Hei o Sion ma kawaha, ni morene! Ni more-morene deʼ ni ulili! karana hagala ma oa-oa ma Jou nia Jou Madutu ino. O hiwara maöraha deʼ o dumamata maöraha ma hidogorona yaoaka o awana nginiuku o dumamata ma orahoka o awana inï dotawana, o bunga-bunga ma orahoka o hokä hirahi biaha dika.

²⁴ Done o gandum aha ya dol̄aoli o bibidoro mangï; o angguru deʼ o zaitun ma minya aha ihebu-hebulu ma dedeo ma ngï ino.

²⁵ Ngohi aha ta tagali hagala nia rugi ma taongo maöraha o kahoho ya ol̄omo nia utu-utuku ma hasili. Hababu ka Ngohi tohi dingoto o kahoho ma duduono gënanga ngini ika.

²⁶ Ngini aha inï wedono nia inomo deʼ nia mao inï punuhu. Ma Jou nia Jou Madutu aha ngini niwi himulia, hababu ngini ika wadiai ma ngöe ihera-heranga. Ahi umati aha yo dadiokaua o hohedu mangï!

²⁷ Done nihioriki ngini, Israel, Ngohi naga nia hidö dogoronaka deʼ Ngohi, ma Jou, ganga nia Jou Madutu. Koiwa naga o Jou Madutu ma homoa, sowaliua Ngohi ma hirete. Ahi umati aha yahi mal̄ekokaua!”

Ma Jou Ai wange

²⁸ ”Ipahaika de gënanga mata-mata o nyawa aha Ta hidöaka Ahi wohama dema boboloi. Done nia ngoha-ngohaka o nauru deo ngoheka aha ihi ngahu hagala Ahi behehongo; o balu-baluhu nia hidogoronaka aha yo nanere o lolega-lolega aha Ta hidöaka o gogoduru deo momoholehika.

²⁹ Oraha gënanga Ahi womaha aha Tä doburaraholi yolö leleani o ngongoheka deʼ o nau-naurika ö.”

³⁰ O dihangoka deʼ o duniaka aha To diai ma ngöe ihö hera-heranga. Aha naga o awunu ikopoa, o uku ma dokara deʼ o nofo ma kuhuhulu.

³¹ O wange ma lako aha ihuhutu deʼ o mede kama doka-dokara hokä o awunu. Mata-mata gënanga aha idadi ihira dema Jou Ai Wange i böa, o wange hö modo-modongo deʼ hö boborohono!

³² Mä o nagona honanga yo gahoko ma Jou Ai roriwo, aha yahi halamati. Ma Jou wotemo, ”O Yerusalem mabereraka hagala o nyawa Tä iri-iriki aha yo halamati.”