O YEHEZKIEL 2 - MA JOU AI BUKU O ABARI MA OA

Ma Jou Madutu wiahoko o Yehezkiel mangale wodadi o nabi

¹ itemo, ”Hei o nyawa nokokakaliua, nomaoko. Ngohi toigo homa temo-temo dede ngona.”

² Maöraha o ilingi gënanga toihene, ma Jou Madutu Ai Womaha iwohama ahi diri magoronaika, deʼ ihioko ngohi. Ipaha toihenoli o ilingi gënanga itemo,

³ ”Hei o nyawa nokokakaliua, ngona Toni huloko hagala o Israel manyawaika ima poputurungu ihilawani Ngohi. Onanga ima poputurungu hokä toönanga manga ete de manga tohora.

⁴ Onanga manga häeke itogowini deʼ ihihoromatiua Ngohi. Ngona Toni huloko onangika mangale nohiädono okia Ngohi, o Jou ma Jou Madutu Duru tokokurutil̄e tahetongo onangika,

⁵ boteka önanga yomau ihihigihene ekola kowali; iparalu, önanga kiani ihiöriki naga o nabi toönanga manga hidogoronaka.

⁶ Mä ngona, hei o nyawa nokokakaliua, uha nämodongo yopoputurungika gënanga, ekola okiaö dika önanga yotemo. Onanga aha inilawani deʼ inihikauku, hiädono matero-tero ngona nowango o kokakatama mahidogoronaka. Ngaro hoko gënanga, uha nohawana.

⁷ Nohiadono mata-mata Ahi behehongo onangika, boteka önanga yomau yoihene ekola kowali. Nohininga önanga gënanga yolö lawa-lawani.

⁸ Hei o nyawa nokokakaliua, noihene okia Totö temo-temo ngonaika. Uha nohi moteke nomalawani. Nahelenga ani uru deʼ naol̄omo okia Tonihi döa-döaka ngonaika.”

⁹ Ipaha ngohi tamake o giama ihidöaka ngohiuku. Ogiama gënanga magoronaka naga o buku ilüluluino,

¹⁰ itulihi ari hononga. Daha wahelenga ilüluluino gënanga deʼ genangoka itulihi o dodora, o daiana deʼ o gururihi.