O YAKOBUS 3 - MA JOU AI BUKU O ABARI MA OA

O nyawa ma äkiri

¹ Roriadodoto! Uha nia hidogoronaino nima wöe-wöe nimau nidadi niguru. Ngini nihi öriki ngone hodadi o guru aha ina adili de iholoi ikiria ngaro de o nyawa mahomoa.

² Mata-mata ngone mamoi-mamoi hodiai o howono. Mä o nyawa komaiwahi yodiai o howono de manga demo-demo, önanga o nyawa yotötotomo yakunu yakuaha manga diri ingodumu.

³ Nako ngone hohipäke o kuda madudumungu mauruoka laʼ enanga yamoteke tongone nanga mau, ngone hakunu haleboto o kuda maröehe mata-mata gënanga.

⁴ Ha l̄ë o hokä o kapa manonako. Ngaroka o kapa moi ganga hoko gënanga ma amoko deʼ ihi haili o hidal̄oko i kua-kuata, ma ënanga yaleboto de maririmi duru koha mengeteke, imamoteke wohido duru-duru ai mau.

⁵ Hoko genangö de tongone nanga äkiri; ngaroka tongone nanga äkiri gënanga mamengeteke, mä enanga yakunu ima hil̄e madiri, mangale o hali-o hali ma ago-agomo. Hatibanga, o hongana hokokia ma amoko yakunu yatuhuku de o uku duru maiteteke!

⁶ O äkiri kaimadäene de o uku. Tongone nanga röehoka, ënanga marupa o dorou matiti, ihi gerewoto o dorou tongone nanga dirika ingodumu. De o uku ma ahali o narakaino, ënanga yatuhukoka tongone nanga ngango ingodumu.

⁷ Hagala rupa o aiwani ihohatera, o totaleo, o aiwani ima tahe-tahe deʼ o nawoko yakunu yadana, deʼ ya danaö iböto mangale o nyawa.

⁸ Mä o nyawa ma äkiri kaima tëngo mayakunua yadana. O äkiri gënanga itorou deʼ hakunua hakuaha; iomanga de o rasongo yahi hone-honenge.

⁹ Ngone hapäke mangale hohidemo tarima kasi ma Jouika deʼ tongone nanga Ama, mä mangale hahilaiö nanga dodiawo o nyawa, ma Jou Madutu wahi dadadioka imoteke Ai rupa de Ai dulada.

¹⁰ De o uru genanginoli ihupu o demo-demo tarima kasi deʼ o demo-demo o lolaiö. Kokiani uha hoko gënanga!

¹¹ Boteka naga o jobubu ma akere ma ake-akere deʼ ma akere ma mali-mali matiti kaima däene?

¹² Ahi roriadodoto, o ara mautu yakunua ihi hohoko o zaitun mahohoko, deʼ o angguru mautu yakunua ihi hohoko o ara mahohoko. O jobubu-o jobubu magahi-gahi yakunuaö ihi hupu o akere ma ake-akere.

O barija i böa-böa dakuku

¹³ Nako nia hidogoronaka naga o nyawa yososawaro deʼ yobobarija, kiani ünanga wohidumutu de ai ngango maoa-oa deʼ wodiai o hali-o hali maoa-oa, imanïki o hininga maboluluku deʼ o sawaro.

¹⁴ Mä nako ngini nimakangakua, nima teke hininga hiri, deʼ nihi akunu kania diri mahirete, nia sawaro gënanga uha nihi lamoko, karana de gënanga ngini nia takaidulu o abari madiai ma Jou Madutuino.

¹⁵ O barija ma rupa hoko gënanga o horogainoua ma ahali. Enanga ma ahali o duniaino, o nyawa manahihuino deʼ o hetangino!

¹⁶ Kiaka naga makangakua deʼ o biaha ihi akunu manga diri mahirete, genangokaö hamäke o ruae deʼ hagala irupa o manarama madorou.

¹⁷ Mä o nyawa to önanga manga barija ma ahali dakuku, duru madodihiraka ünanga wododono, ipaha woigo imaka dame, ai demo-demo irahai, deʼ wotomoteke. Unanga iwi omanga o dora de o hayanga, deʼ ihihasili o manarama-manarama maoa-oa. Unanga woiri-irikua deʼ woma dodiaiua.

¹⁸ Igoungu o oa-oa ganga o dame magihihi, mahasili yodatomo o nyawa yoigo-igo o dame!