O SAMUEL MAHINOTOKA 6 - MA JOU AI BUKU O ABARI MA OA

O jaji ma Peti yao o Yerusalemika

¹ Ipaha o Daud wa ahokoli o tentara duru yaö oa-oa o Israeloka hupaya ima toomu, manga gegetongo yaribuhu moruange ma nyawa.

² ”Onanga wätuda yameta o Baal-Yehudaika, mangale yal̄ë nenangino o Jaji ma Peti yahetongo deʼ ma Jou woko Kuaha ai romanga womä kadato o kerub-o kerub mal̄okuoka.

³ O jaji ma Peti gënanga yal̄ë o Abinadab ai tauino o doporono mal̄okuoka de ihi barene o goroba mahungiuku. Daha o Uza deʼ o Ahio, o Abinadab ai ngoha-ngohaka yanïki o goroba gënanga; o Uza woma dagi madatekoka,

⁴ deʼ o Ahio womadagi mahimangoka.

⁵ O Daud deʼ o Israeloka manyawa yongodumu ima dagi o Peti gënanga mahimangoka daha yoselo-selo manga kuata yododoomuino deʼ yonyanyanyi mangale iwi horomati ma Jou. ”Onanga ihi gogule o kecapi, o gambus, o rebana, o kelentingan deʼ o simbal.

⁶ Maöraha önanga imahi ädono to Nokhon ai gandum yo hido-hidoro mangïoka, hagala o hapi yatö tau-tauru o goroba gënanga ipeleke, daha o Uza deʼ ai giama wodöaka deʼ wasö o Jaji ma Peti gënanga la uha itifa.

⁷ Ma o öraha gënanga dika ma Jou Madutu idadi wingamo o Uzaika, karana ai manarama gënanga marupa wihikauku ma Jou. O Uza witoma o ngïoka gënanga, o Jaji ma Peti madatekoka.

⁸ Mulaenge öraha gënanga o ngï gënanga yahetongo o Peres-Uza. O Daud wongamo karana ma Jou wihibinaha o Uza.

⁹ Mä o Daud wi modongö ma Jouika deʼ wato, ”Oraha nënanga sarakia o Jaji ma Peti gënanga yakunu tao?”

¹⁰ Hababu gënanga ünanga wolukokali wao o Jaji ma Peti gënanga o Yerusalemika, mä wagogono o Obed-Edom o Gat manyawa ai tauoka.

¹¹ O Jaji ma Peti gënanga igogere genangoka o mede hange madekana, deʼ ma Jou wihi barakati o Obed-Edom deʼ ai tau ma nyawa.

¹² Ma Koano Daud woihene ma Jou wahi barakati o Obed-Edom ai tau manyawa deʼ hagala ai kia honanga karana o Jaji ma Peti gënanga. Daha ünanga woiki o Obed-Edom ai tauika, wal̄ë o Peti mangale watururu o Yerusalemika deʼ o rameanga ma ago-agomo.

¹³ Maöraha hagala o nyawa yogö gora-goraka o Jaji ma Peti gënanga ima dagika o aguru butanga, o Daud wahuloko önanga imatogumu. Daha ünanga wohihuba o huhuba ma Jouika, enagënanga o hapi manauru deʼ o hapi mangohaka yabö boburereoka.

¹⁴ Ipaha o Daud woselo-selo deʼ ai kuata magahumu mangale wihoromati ma Jou. Oraha gënanga ünanga duga-duga womahi pake o ngoere o lenan madodipoko wohi likoino ai goronaino.

¹⁵ Hoko gënanga o Daud deʼ o Israeloka ma kawaha yongodumu yatururu o Jaji ma Peti gënanga o Yerusalemika, ihi ginïki o ulili deʼ hagaga deʼ o trompet mailingi.

¹⁶ Maöraha o Peti gënanga magogiria yao ihi ngohama o kota magoronaika, o ngo Mikhal o Saul ngoi ora mihi hahere o jangelaino daha mimake ma Koano Daud woma tototubo de woselo-selo mangale wihoromati ma Jou, deʼ o ngo Mikhal mamao mi emono mimake o Daud.

¹⁷ O Jaji ma Peti gënanga yakelenga mangïoka o hubayanga mangï magoronaka wododiai ukuoka o Daud mangale o Peti gënanga. Ipaha o Daud wohi huba o huhuba itö tuhu-tuhuku deʼ o dame mahuhuba ma Jouika.

¹⁸ Daha ünanga wahi barakati o Israeloka makawaha de, ma Jou Duru woko Kuaha ai romanga.

¹⁹ Ipaha wahidoku o inomo onangika mata-mata. O nyawa moi-moi naga genangoka yaoa o nau-nauru yaoa o ngoheka wahi döaka o luiti moi o hiode ma akeme i l̄ofo-l̄ofo o roti deʼ o kukisi o kismis. Iböto gënanga önanga mata-mata yolio manga tauika moi-moi.

²⁰ Maöraha o Daud wolio ai kadatoika mangale wahi döaka ai tabea o tau ma nyawaika, o ngo Mikhal mohupu mibuhuku o Daud deʼ mato, ”O wange nënanga o Israeloka manga koano igou-goungu womadiai ai diri deʼ mahoromati! Unanga woma hekonoka hokä o nyawa bodo yanakoua o mal̄eke o kadatoka yomomanarama toönanga manga gogilaongo o ngoheka manga himangoka!”

²¹ O Daud wohaluhu, ”Ngohi toselo mangale tihoromati ma Jou, witö tila-tilaka ani Ama ikali ai tau manyawa, daha wohi öriki ngohi todadi o Israeloka Ai umati, manga tutuda. Hababu gënanga ngohi aha gila-gila toselo mangale tihoromati ma Jou.

²² I goungu ngohi toma sadia ihihikauku iholoi ngaro deʼ kangano, Kaiyakunu dika ngona nohi pulono ngohino okia-kiaua ihi daene, mä o gögilaongo nahö heto-hetongo kangano, aha ihihibaraguna ngohi!”

²³ O ngo Mikhal, o Saul ngoi ora gënanga mongohakua ami umuru magurutu.