O PILIPI 3 - MA JOU AI BUKU O ABARI MA OA

O diai madutu

¹ Mabobaha, ahi Riadodoto, kokiani ngini nimörene karana ngini nirimoioka de ma Jou. Ngohi tamäoua madubuho mangale togilioli mahira totuli-tulihoka nginika; hababu o hali gënanga yaoa mangale tingini nia halamati.

² Nimahi dodiai hagala o nyawaika yodö dodiai o hali itotorou hagala o nyawa mapatutu yähëtongo ’o kaho’. Onanga yogëgoto hupaya o nyawa mata-mata ima huna.

³ Ena hioko ngone nanga hagala o nyawa hatotarimaka o huna madutu, ko onangua. Ngone hïhuba ma Jou Madutu de ma Jou Madutu ai Womaha mahirete matutuda, deʼ ngone hosukur karana ngone howango horimoioka de o Kristus Yesus. Ngone homa higagaoua yadodiai o agama ma mau-mauika hamö mäke-mäke.

⁴ Imoteke madiai ngohi yakunu toma higagao okia o agama mamau-mau yododiai gënanga. Hababu nako naga imatëngoani wamäo ünanga naga iwihi kuata la woma higagao o agama mamau-mau yadodiaika hamö mäke-mäke, ngohi yomoholoioli.

⁵ Ngohi ihi huna ahi umuru o wange tufange. Ngohi tomakil̄au hokä womatëngo o Israel manyawa, o Benyamin ai ahaluku; ngohi o Ibrani manyawa madutu. O momoteke magoronaka o agama Yahudi matitaika, ngohi nanga o gegetongo o Farisi madoomuoka.

⁶ Ngohi hoko gënanga ahi hininga mahauku hiädono ngohi tä aniaya o jemaat. Nako yaetongo o agama Yahudi matitaka, ngohi o nyawa maoa moi, koiwa tahowono.

⁷ Mä karana o Kristus, mata-mata mahira tapulono hokä okia naga moi ihihi utumu, öraha nanga imadadi okia naga moi ihihirugi.

⁸ Koigoungua kao hali yahëto-hëtongo dika; mä imadogo hagala moi-moi ngohi tapulono hokä o hali ihihi rugi-rugi dika. Naga ngohioka öraha nanga ganga iholoi iragane: enagënanga tïnäko o Kristus Yesus ahi Jou. Karana o Kristus, ho ngohi tapidiloka hagala mata-mata. Ngohi tapulono mata-mata gënanga hokä o wal̄ë dika, hupaya ngohi yakunu tïmäke o Kristus,

⁹ deʼ igou-goungu torimoi dede Unanga. O hidohanga maoa-oa de ma Jou Madutu ngohi tohidailako okaua mahirete de madodagi tohingounu o agama matitaika. Oraha nanga ngohi de ahi rimoi maoa-oa de ma Jou Madutu, karana ngohi tïngaku o Kristusika. Hoʼ, o hidohanga maoa gënanga iböa ma Jou Madutuino, deʼ i mahi hol̄e o ngongaku o Yesus Kristusika.

¹⁰ Genangö moi ngohi töigo enagënanga hupaya ngohi tïnäko o Kristus, deʼ tamäo o kuaha iwihiwö wango-wango Unanga o honenge mahigoronaka. Ngohi töigo tatagongo o hangihara dede Unanga deʼ tomadadi hokä Unanga Ai honenge magoronaka.

¹¹ Deʼ ngohi tönganono ngohi mahirete aha i hihi wangoli o honenge mahidogoronaka.

Homa popäta ha ädono madumutu

¹² Ngohi koto temoua ngohi tohasiloka, ekola tototomoka. Mä ngohi gila-gila dika tohidailako tal̄ë o ngongike o Kristus Yesus wasösadiaka. Mangale gënanga doka Unanga wohi l̄ëoka ngohi deʼ ngohi todadi to Unangoka.

¹³ Maraioka Roriadodoto, i gou-goungu ngohi tamäoua ngohi tohasiloka tal̄ë o ngongike gënanga. Mä naga o hali moi ngohi todiai, enagënanga ngohi tawohanga okia naga tongohi ahi poretoka deʼ tohidailako tagoungu ta ädono okia naga ahi himangoka.

¹⁴ Mahababu gënanga ngohi toma popäta gila-gila tödumu-dumutu mabobahaika la tamäke o utumu, enagënanga o ngango o horogaka; mangale gënanga doka ma Jou Madutu wohi ahoko ngohi de madodagi o Kristus Yesus.

¹⁵ Ngone mata-mata hobalu-baluhoka cara rohani, kokiani nanga jako hoko gënanga. Mä nako nia higoronaka naga haramoioli manga damäke, done ma Jou Madutu aha wohi ngahuoli i tararono nginika.

¹⁶ Ma inoli o hali nënanga kokiani nia tailako nihidodiai: Ngone kokiani howango itatapu hamoteke o datoro hanï nïkoka ngone hi ädono öraha nënanga.

¹⁷ Roriadodoto mata-mata! Nia nïki ahi dulada. Ngomi mihi döakoka o dulada itotiai, hababu gënanga niatailako nihidodiai hagala o nyawa yonöninïki tongomi mia dulada gënanga.

¹⁸ Ngohi kahamanaroka tinihi ngahu nginika, deʼ oraha nanga ngohi togilioli de toari, naga manga ngöe o nyawa manga wowango yakilianga o Kristus ai honenge o saliboka mamangarati.

¹⁹ Hagala o nyawa manga wowango hokä hoko gënanga aha mabaha i kilianga iwede-wederuku, hababu toönanga manga jou ganga to ona manga röehe mahirete ma nahihu. O hali de mamal̄e-mal̄ekoka, gënanga doka önanga ihi lamo-amoko; hababu önanga yatibanga duga-duga o hali yakokorona de o dunia nënanga dika.

²⁰ Mä ngone ganga o gegëtongo o horoga makawaha. Genangoka de wainoli nanga Koano Wohihohalamati, ma Jou Yesus Kristus aha woböa. Unanga ganga ngone hidodamä de nanga ngigo de nanga nganono.

²¹ Nanga röehe yabole-bole deʼ yakunu iwedere nënanga, o Kristus aha watururu imadadi hokä to Unanga Ai röehe mahirete imomulia. Unanga wakunu wadiai gënanga karana Unanga de Ai kuahaoka mangale wapareta hagala moi-moi.