O PILIPI 2 - MA JOU AI BUKU O ABARI MA OA

O Kristus Ai huha deʼ Ai mulia

¹ Ngini nikuata, karana ngini nirimoi de o Kristus. Deʼ ngini i nï laru karana o Kristus winï dora. Ngini inï tuda ma Jou Madutu ai Womaha, deʼ nginiö nimäkodora de nima kahayangi moi de moi.

² Aa, abeika ngini nia gou-goungu tongohi ahi hininga nia sanangi de o hali-o hali nënanga: Niwango o hininga moi de o dora ima koketero, de o dibanga ima koketero deʼ o dumutu ima koketero.

³ Uhali nidiai okia naga moi karana inihititila nia diri mahirete maparalu, ekola mangale nihikurutil̄e nia diri. I idulu yaino kokiani ngini moi-moi de nia hininga madodipokouku niä pulono o nyawa mahomoa iholoi yaoa de nia diri mahirete.

⁴ Nia tailako nia gou-goungu o nyawa mahomoa mangaparalu; uha duga-duga nia diri mahirete ma paralu.

⁵ Kokiani ngini nia jiwa hokä o Yesus Kristus:

⁶ Kade mahirahi Unanga imatero de ma Jou Madutu, mä Unanga womamäoua ai hali okia naga hokä o Jou gënanga ko kiani Wasosö.

⁷ I idulu yaino, Unanga wapidili mata-mata daha womadadi hokä o gilaongo moi. Unanga womadadi hokä o nyawa, deʼ hïmäke wowango hokä o nyawa.

⁸ Unanga wohitipokouku Ai diri, deʼ wowango de ai momoteke ma Jou Madutuika hiädono wohonenge – enagënanga wohonenge o saliboka.

⁹ Hababu gënanga ma Jou Madutu wïgöraka Unanga wakö kurutil̄e, de wihidöaka Unangika o kokuaha i holoi i lamoko de hagala o kokuaha mahomoa.

¹⁰ Ho mangale iwi horomati o Yesus, mata-mata o dodadi o horogaka, deʼ o duniaka, de o dunia matimiuku aha iwi huba Unanga.

¹¹ Onanga mata-mata aha yoma ngaku o Yesus Kristus ma Jou; de hoko gënanga ma Jou Madutu o Ama iwi himulia.

Nihiwara hokä o cahaya yatotararono o dunia

¹² Hababu gënanga, Roriadodoto tinï hohininga, hoka sarakia ngini salalu nitomoteke ngohino maöraha ngohi naga tingini nia hidogoronaka, ho maboboloi öraha nanga maöraha homaki tingaka magurutika, kokiani ngini i tatapu nitomoteke ngohino. Ngini ma Jou Madutu wini hihalamatoka, hoʼ nihidailako nihi gila-gila hupaya nia ngango isosanangi idadi itotomo. Niadiai gënanga de mahoromati deʼ nioigo nitomoteke ma Jou Madutu ika,

¹³ karana ma Jou Madutu mahirete womanarama nia diri magoronaka la yadiai ngini de nia hininga mangigo deʼ sadia aha nia sanangi ma Jou Madutu ai hininga.

¹⁴ Nia manarama hagala moi-moi de uha nitotaiana ekola nima teke roributu.

^15-16 De hoko gënanga ngini nihidumutu ngini ganga ma Jou Madutu ai ngoha-ngohaka koiwa nia kuranga niwango de nia hininga itebini de itiai o nyawa madorou deʼ yoböbaradoha manga hidogoronaka. Deʼ maöraha ngini nihi ngahu onangika o abari ihi döa-döaka o ngango, kokiani ngini nimadadi onangika hokä o cahaya i hiwa-hiwara yatotararono o dunia. Nako ngini niwango hokä hoko gënanga, dahaö naga o titi ngohino mangale tomamäo tolamoko mangale ngini maöraha o Yesus Kristus woböali. Gënanga manyonyata igoungu to ngohi ahi parahajaua deʼ tongohi ahihi dailako naga de mahasili.

¹⁷ Yakunu idadi ngohi aha ihi toma deʼ ahi awunu imadadi hokä o huhuba yakokopoa okia ngini nihi huba-huba ma Jou Madutuika toënanga mal̄okuoka hokä o nonako ngini niwi ngaku Unangika. Nako igoungu gënanga kokiani hoko gënanga, ngohi tosukur de o hali gënanga deʼ tomörene dede ngini.

¹⁸ Hoko genangoli kokiani nginiö niamäo nisanangi deʼ nimörene dede ngohi.

O Timotius deʼ o Epafroditus

¹⁹ Ngohi tongaku de ma Jou Yesus ai roriwo, de majapati ngohi yakunu tïhuloko o Timotius nginika, hupaya ngohi tamäke o lolaru de o abari mangale ngini.

²⁰ Duga-duga o Timotius woma tëngo-tëngo o nyawa mima jiwa moi dede ngohi, deʼ igou-goungu wödibanga tingini nia utumu.

²¹ Mahomoa mata-mata duga-duga ihi dailako manga diri mahirete maparalu, ma o Yesus Kristusua ai paralu.

²² Ngini mahirete nia mäkeoka manyonyata igoungu o Timotius de ai faidä. Unanga womanaramoka wakai goungu mima nïki dede ngohi mangale mihï barihi o Abari ma Oa ma Jou Madutuino. Ngomi imi hinoto hokä o ama de o ngohaka dika.

²³ De mahababu gënanga, nako itaiti tohi orikoka sarakia tongohi ahi parakara ipaha dahaö, ngohi aha tïhuloko ünanga nginika.

²⁴ Ngohi tongaku de ma Jou ai roriwo, ngohi mahirete ma itedekanokaua aha tini ädono nginiö.

²⁵ Mangale tongone nanga riadodoto o Epafroditus ngini niwihuloko wohibatumu ngohi, ngohi tamäo iparalu ho tïhuloko ünanga womakilioro nginika. Unanga wohi dodiawoka ngohi tongohi ahi manarama deʼ ahi magoronaka.

²⁶ Unanga duru wi nï igo de winï nganono nginika Riadodoto mata-mata, deʼ unanga ai hininga i huha karana ngini ni ihenoka o abari ünanga wo panyake.

²⁷ I tiai i goungu ünanga wopanyake ngade-ngadeke wohonenge. Mä ma Jou Madutu wïdora unangika; deʼ kaduga-dugaua unangika dika, mä ngohinoö, hupaya uha ngohi iholoi ahi hininga ihuhali.

²⁸ Mahababu gënanga idogoli i lamoko tongohi ahi ngigo mangale tïhuloko ünanga nginika, hupaya ngini nimorenoli nako ngini nimaka mäke dede, deʼ tongohi ahi hininga ma irïdi.

²⁹ Hoʼ, niwitarima ünanga de hagala nia hininga isosanangi hokä o riadodoto womatëngo o ngongaku moi. Niä horomati mata-mata o nyawa hokä una.

³⁰ Mangale o Kristus ai manarama maparalu, ünanga ngade-ngadeke de wohonenge; ünanga wohidöaka ai nyawa mangale wohidöaka o roriwo ngohino de tingini nia romanga.