O PENGKHOTBAH 1 - MA JOU AI BUKU O ABARI MA OA

¹ O demo-demo o buku nënanga magoronaka ma ahali wapopiki-pikirino, o Daud aingohaka o nauru, witagali o Daud wodadi o kaano o Yerusalemoka.

² Wa Popiki-pikiri wato: Mata-mata kaparahaja deʼ ibaragunaua! O ngango gënanga parahaja, mata-mata koiwa mamangarati.

³ Nanga umuru magurutu ngone hokarajanga, hateo nanga gahauku. Mä, kiaka mahasili yakunu ngone hohi amo-amoko?

⁴ O difauku moi puda, deʼ o difauku mahomoa ihihanga, mä o dunia kahirahi kaimatero dika.

⁵ O wange kai potokahi, deʼ kai tumunohioli. De yabole ënanga ilio mangïika madodihiraka, daha ipotokaoli.

⁶ O hidal̄oko iwuwu o korehara de yauku, daha iwuwu o koremiete; ënanga ilololiti, daha i lioli.

⁷ Mata-mata o ngairi ihahuru o ngötoko, mä o ngöto i taitua iomanga. Ma akere ilio o ngairi mautuiha, daha mulaenge ihahuruoli.

⁸ Hagala moi-moi hogihounu deʼ o gihounu gënanga hakunua hohi demo. Tongone nanga lako yapunu-punuhua yamake; tongone nanga ngauku yogogihounua i ihene.

⁹ Okia idadioka, aha idadioli. Okia yadodiaioka, aha yadiaioli. Koiwa moi mahungi o duniaka nënanga.

¹⁰ Naga o nyawa yotemo, ”Niolega, nënanga mahungi!” Mä, gënanga ngone homakil̄auuahi ënanga naga iböaka.

¹¹ O nyawa aha yohiningaua idadi o öraha ipaha-paha. Hoko genangö idadadi o örahanënanga deʼ aha dama iböa, aha yohiningaua o nyawa o öraha ibö boa-boa.

Ai mamao Wapopiki-pikiri

¹² Ngohi, Ta Popiki-pikiri, topareta o Yerusalemoka hokä o koano mangale o Israeloka.

¹³ Ngohi ahi mau mangale tatailako tohidodiai deʼ tomä dotoko dema sawaro hagala idödadadi o duniaka nënanga. Okia idadi wasadia ma Jou Madutu mangale ngone igoungu ganga hininga yahuha.

¹⁴ Ngohi tamakeoka hagala manga manarama o nyawa o duniaka nënanga. Ningaku, mata-mata gënanga kaparahaja, hokä o hidailako hoginïki o hidal̄oko.

¹⁵ I popeleoko hakunua harikoto, deʼ koiwa hakunua haetongo.

¹⁶ Tapikiri, ”Ngohi nënanga todadioka o nyawa yolago-agomo deʼ yososawaro, iholoi ikurutika tosawaro ngaro de mata-mata o nyawa yopopareta o Yerusalemoka kowahi de ngohi. Ngohi tatoomu mangöe o ganako deʼ o dodotoko.”

¹⁷ Done ngohi tomau mangale tohiöriki imadaenua o ganako deʼ o bodo mahidogoronaka, o barija deʼ o fuma mahidogoronaka. Mä i nyata ngohi nënanga hokä toginïki o hidal̄oko dika.

¹⁸ Hababu iholoi iwöe tongone nanga barija, iholoi iwöeö tongone nanga hawana. Iholoi iwöe tongone nanga ganako, i holoi iwöeoli tongone nanga huha.