O NGO RUT 4 - MA JOU AI BUKU O ABARI MA OA

O Boas wokawingi deʼ o ngo Rut

¹ O Boas woiki o doomu mangï ika o kota mangorana ma amo-amokoka. Unanga wogogerukuoka dokengoka manyawa o nauru wa kaino, imoteke o Boas ganga o Elimelekh ai dutu itö tigi-tigi. Daha o Boas wiahoko ünanga, ”Riadodoto, naino gogerukuohi nenangoka!” O nyawa gënanga waino, daha wogogeruku.

² Ipaha o Boas wa ahoko o kawaha manga balu-baluhu yangimoi o kotaka gënanga mangale ima kinïki yogogerukuö genangoka. Onanga yogogeruku iböto,

³ o Boas wïtemo o nyawa wadö dutu-dutuika dede ünanga gënanga, ”O ngo Naomi molioka o Moab deʼ maino. O öraha nënanga munanga momau mahukunu o Elimelekh tongone nanga dutu itö tigi-tigi ai tonaka.

⁴ De ngohi tamao ngona kiani nohi öriki mangale o hali gënanga. Nako ngona nomau naija, notemo o nyawa yogö gogeruku nenangoka manga himangoka. Nako kowali, notemo deʼnohi totararonika, hababu duga-duga ngone ina hinoto deʼ nanga haku mangale o hali gënanga; ngona madodihiraka, ipaha daha ngohi. ”O nyawa gënanga wohaluhu, ”Ia, ngohi aha taija.”

⁵ Daha o Boas wato, ”Nako hoko gënanga kayaoa. Mä, nako ngona naija o tonaka gënanga o ngo Naomino, ngona kiani nomi l̄ëö o ngo Rut o Moab mangoheka, o ngo Naomi ami ngohaka wohö hone-honenge ngoi fao. Hababu, o tonaka gënanga kiani o nyawa wohone-honengoka gënanga aidifauku idadi toönanga madutu.”

⁶ O nyawa gënanga wohaluhu, ”nako hoko gënanga, ngohi takunua. Kayaoa öraha nënanga ngohi taiki tongohi ahi haku hokä o nyawa madodihiraka kokiani taija o tonaka gënanga. Koiwa mabaraguna ngohi taija hababu o tonaka gënanga marai aha yakunua idadi tongohi ahi difauku madutu. Holoi yaoa ngona dika naija.”

⁷ Oraha gënanga nako o nyawa imaku bukunu ekola ihi tagali toönanga manga okianaga moi, mangale ihi kuata o hali gënanga mabiaha wohö huku-hukunu waiki ai sandal, daha wohi lapahi woija-ijaika. Hoko gënanga madodagi o Israeloka ma nyawa ihi kuata o perkara moi ima kubukunu deʼ imaki ija o tonaka.

⁸ Karana gënanga, maöraha o nyawa gënanga wïtemo o Boasika, ”Ngona dika naija,” ünanga waiki ai sandal daha wohi lapahi o Boasika.

⁹ Daha o Boas wätemo o kawaha manga balu-baluhika deʼ mata-mata o nyawa mahomoa naga genangoka, ”O wange nënanga ngini mata-mata nidadi o hakihi ngohi taijaka o ngo Naomino mata-mata toönanga madutu yohö hone-honenge o Elimelekh deʼ ai ngoha-ngohaka, o Kilyon deʼ o Mahlon.

¹⁰ Madatekokaö gënanga ngohi tomi l̄ë o ngo Rut, o Moab ma ngoheka, o Mahlon wohone-honenge ngoi fao gënanga modadi to ngohi ngohi hekata. De hoko gënanga o tonaka gënanga aha kahirahi o nyawa wohone-honengoka gënanga ainyawa manga hidogoronaka idadi toönanga madutu. De aidifaukuö aha kahirahi naga ai dutu-dutu manga hidogoronaka de ai kotaka. Niohininga Roriadodoto, o wange nënanga ngini mata-mata ni dadi o hakihi.”

¹¹ O kawaha manga balu-baluhu deʼmahomoa naga gënangoka yotemo, ”Ia, ngomi mihakihi. Tanu ma Jou wohidadi ngoni hekata gënanga hokä o ngo Rahel deʼ o ngo Lea ihi dadi o ngohaka manga ngoë mangale o Yakub. Tanu ngona ani hasili iwoë o Efrata manyawa manga hidogoronaka deʼ tanu ngona ininö nako-nako o Betlehemoka.

¹² Tanu o ngoha-ngohaka aha ma Jou wonihi döaka ngonaika i tilakuru o ngoheka magö nënanga aha idadi ani tau madol̄a hokä o Peres, o Yehuda deʼ o ngo Tamarino manga ngohaka.”

O Boas deʼ aidifauku

¹³ Daha o Boas wo mi l̄ë o ngo Rut idadi ngoi hekata. Ma Jou womihi barakati o ngo Rut hiädono munanga o nyawa mohi ao daha mihi ngohaka o ngohaka o nauru womatengo.

¹⁴ O ngo ngoheka imi temo o ngo Naomika, ”O higiriri ma Jou! Unanga wonihi döakoka ngonaika o danongo o nauru womatengo o wange nënanga mangale woni paliara. Tanu o ngohaka gënanga idadi kaiwi heto-hetongo o Israel manga hidogoronaka!

¹⁵ Ngoni hunungu gënanga duru moni hayanga ngonaika. Munanga monihi döakoka ngonaika iholoi ngaro deʼ okia yakunu inihi döaka o nyawa o ngohaka o nauru yatumidi. O öraha nënanga munanga monihi döakoka o danongo o nauru womatengoli ngonaika, aha wonihi döaka o morene mahungi ngonaika, deʼ wo ni paliara maöraha i ni timonoka.”

¹⁶ O ngo Naomi mil̄ë o ngohaka gënanga daha mipaliara deʼ ami dora deʼ ami hayanga itö totomo.

¹⁷ O ngongoheka ima koka datekuku önanga iwihi romanga o ngohaka gënanga o Obed. O nyawa moi-moika önanga yato, ”O ngo Naomi momamakeoka o ngohaka o nauru womatengo!” O Obed nënanga maduruino wodadi o Isai ai ama, deʼ o Isai ganga o Daud ai ama.

^18-22 De nenangala o Daud ai gutiuku masila-sila mariri, mulaenge o Peres de yaino, enagënanga: o Peres, o Hezrom, o Ram, o Aminadab, o Nahason, o Salmon, o Boas, o Obed, o Isai, o Daud.