O NEHEMIA 13 - MA JOU AI BUKU O ABARI MA OA

O Israeloka ihitingaka manga diri o nyawa maporetino

¹ Maöraha o Musa Ai Tita yadabasa o kawahaika, yamake o hitararono nënanga: ’O Amon de o Moab manyawa hakali-kali yakunua imakodogo de ma Jou Madutu Ai umati;

² hababu maöraha o Israeloka manyawa o dodagi magoronaka o Mesirino yohupu, o hoana hinoto gënanga yahidoakua o inomo de o akere o hoanika gënanga. Koaholi önanga iwi hewaka o Bileam mangale wahilai o Israeloka manyawa, mä tongone nanga Jou Madutu wangali o lolai gënanga idadi o barakati.’

³ Maöraha o Israel manyawa yoihene gënanga, önanga yatingaka mata-mata o nyawa maporetino o Israel makawahaino.

O Nehemia wadiai mahungi

⁴ Kowahi gënanga ma Imam Elyasib, iwihimanarama wogoana o inomo makama-kamari ma Jou Ai Tauoka, ünanga imakao yaoa de o Tobia.

⁵ O Elyasib wihidöaka o Tobiaika moi o kamari ma amo-amoko imoteke madiai yasadia ihitingakoka mangale yagogono o huhuba o gandum, o manyanyi, o pakakaha yapake-pake ma Jou Ai Tauoka, o huhuba mangale o imam-imam, o gandum o regu ngimoi o regu moi, o angguru, de o zaitun maminya, aha yahikodoku o Lewi manyawaika, o musik ihigogoguleika de ma Jou Ai Tau mangorana ma amo-amoko magogoana.

⁶ Maöraha o hali gënanga idadi, ngohi koihiwa o Yerusalemoka, hababu mataongo moruange de hinotoka aipareta o Artahsasta, o Babil manga koano, ngohi toiki o Babilika mangale tohingahu makoanoika. Daha öraha muruono naga ipaha ngohi wohihigumal̄a

⁷ mangale tomaidulu o Yerusalemika. Tomahi adonino nënangoka, ngohi ihitodokana tohi öriki o Elyasib wihidöakoka o Tobiaika moi o kamari ma Jou Ai Tauoka.

⁸ Ngohi duru tongamo deʼ tohikaweli tohihupu mata-mata o Tobia ai kia honanga.

⁹ Ipaha ngohi tohuloko hupaya yodiai o hitebini maupacara mangale o kama-kamari gënanga. Iböto gënanga ngohi tohigilio genangika hagala o huhuba o gandum de o manyanyi ikali ma Jou Ai Tau makia honanga.

¹⁰ Mahomoa gënanga, tamake o musik ihigogogule de o Lewi manyawa yamal̄aka o Yerusalem de yolioka manga dumule-dumuleika moi-moi, karana o kawaha imakadonua toönanga manga paralu.

¹¹ Daha tataaere o balu-baluhu karana önanga yamal̄aikaoka ma Jou Ai Tau ipaliaraokaua. Daha ta ahokokali hagala o Lewi manyawa de o musik ihigogogule gënanga de tahuloko yomanarama okaoli.

¹² Ipaha o Israeloka makawaha yongodumu mulaengoli ihidöaka o regu ngimoi o regu moi o gandum, o angguru, de o zaitun maminya, ikali yao o inomo makama-kamarika.

¹³ Ngohi tahimanarama hagala o nyawa maduruino nënanga mangale yogoana o inomo makama-kamari gënanga: Ma Imam Selemya, o Zadok womatengo o Tita wanö nako-nako de o Pedaya o Lewi manyawa womatengo. O Hanan o Zakur aingohaka de o Matanya ai danongo tahimanarama wariwo önanga. Ngohi tohi öriki hagala o nyawa gënanga yakunu hangaku de aha ihidailako ihikodoku okia honanga gënanga manga dodiawoika o karajanga moi de manga hininga iriko-rikoto.

¹⁴ Ya ahi Jou Madutu, Nohininga hagala tadodiaioka mangale Ani Tau de maleleani.

¹⁵ O öraha gënanga ngohi tamake o Sabat ma Wangeoka o nyawa yamuruono naga o Yehudaoka yoteo o angguru. Naga o nyawa mahomoaoli ihi barene o gandum, o angguru, o angguru mahohoko, o ara mahohoko de okia honanga mahomoa o keledai mal̄okuil̄e de yao o Yerusalemika. Taduhunu önanga imahukunu o Yerusalemoka.

¹⁶ O nyawa yamuruono naga o Tirusino yogogere o Yerusalemoka yoao o nawoko de irupa-rupa okia honanga i huku-hukunu o Yerusalemika o Sabat ma Wangeoka, mangale yahukunu o Yehudi manyawaika.

¹⁷ Tataaere o Yehuda manga tutuda-tutuda de totemo, ”Koni mamao uahi ngini, ngini nia diaioka o dorou karana niapeseke o Sabat mawange?

¹⁸ Hababu karana o baradoha hoko nënanga done ma Jou Madutu Wähukumoka tongone nanga ete de nanga tohora deʼ Wawedere o kota nënanga. Boteka öraha nënanga ngini nimau niodogo ma Jou Madutu Ai gangamo o Israelika de niapeseke o Sabat mawange?”

¹⁹ Hababu gënanga tohipareta hupaya o Sabat mawange mamulaenge mahigetongo, enagënanga Jumat yohutuku, o kota mangora-ngorana ma ago-agomo itaiti yabeno kadeo bimaoa iböto, de yakunokaua yahelenga nako o Sabat mawange ipahauahi, o Hapitu yohutuku. Tahi gogere ahi nyawa yamuruono naga o ngora-ngorana ma ago-agomoka gënanga mangale yogoana hupaya o Sabat mawangeoka koiwa naga okia honanga i huku-hukunu yao ihingohama o kota magoronaika.

²⁰ Mä nagaö yamuruono naga ima huku-hukunu de okia honanga imahuku-hukunu imäidu o bebeno o mehele maporetoka o Jumat mawange yohutuuku.

²¹ Ngohi tatemo onangika, ”Parasuma ngini nitamä genangoka hiädono o ngorumino. Awasi, nako ngini niadiai gënanga nihi galioli, ngohi aha tinidiai de ma buturungoka!” Mulaenge öraha gënanga önanga komaiwaka yoboali o Sabat mawangeoka.

²² Daha hagala o Lewi manyawa tahuloko yadiai o diri madebini ma upacara deyogoana o ngorana-o ngorana ma ago-agomo mangale yogoana hupaya hagala o nyawa yahoromati o Sabat mawange. Ngohi toma niata, ”Ya Jou Madutu, Nohihininga ngohino karana o hali genangö, de Nohi dora ngohi imamoteke de Ani dora ilö amo-amoko.”

²³ O öraha gënanga tamakeö o Yahudioka manyawa kamanga ngöe yokawingoka de o ngongoheka o Asdod, o Amon de o Moab manga hoanino.

²⁴ Mahononga toönanga manga ngoha-ngohakino imangaratiua o Yahudioka manga demo, maʼ o Asdod manga demo ekola o demo maporetino mahomoa.

²⁵ Tataaere de tahilai önanga. Naga tagohara de tautukika manga tadauru. Ipaha tahuloko önanga yokoboto de ma Jou Madutu ai romanga önanga de toönanga manga ngoha-ngohaka aha yokawingi ima kaganu okauaoli.

²⁶ Totemo, ”Koigoungua o baradohaö nënanga wadodiai ma Koano Salomo? Koiwaka o koano o duniaka nënanga iholoi yolamoko de ünanga. Ma Jou Madutu Wihininga ünanga de Wihidadi o koano mangale o Israeloka yongodumu. Ngaro hoko gënanga ünanga iwi bajaoka o ngongoheka o hoana maporetino mangale wodiai o baradoha.

²⁷ Igoungu itorou nia manarama! Ngini nibarani niwilawani ma Jou Madutu de niä kawingi o ngongoheka o hoana maporetino!”

²⁸ O Yoyada ganga ma Imam wo Lamo-amoko o Elyasib aingohaka, mä womatengo o Yoyada ai ngohakino idadi womä toroa o Sanbalat o Bet-Horon makotaino. Hababu gënanga o Yoyada tïduhu o Yerusalemoka.

²⁹ Ngohi tomaniata, ”Ya ahi Jou Madutu, Nohininga sarakia hagala o nyawa gënanga yapeseke o Imam mapangkati de Ani jaji de o imam-imam de o Lewi manyawa!”

³⁰ Hoko gënanga tatebini o Israeloka manyawa hagala moi-moi maporetino. Tohitatapu o datoro-o datoro mangale o imam-imam de o Lewi manyawa, hi ädono önanga moi-moi de manga manarama mahirete.

³¹ Tatatoro hupaya ma ora-oraha itantuoka, o gota ihi dofo-dofo mangale o huhuba ihuba-huba yakunu yasadia de o kawaha yakunu yao o huhuba o tonaka mahasili madodihiraka. Mabobahaka ngohi tomaniata, ”Ahi Jou Madutu, Nohininga mata-mata nenanga de Nohihi barakati ngohi.”