O NEHEMIA 1 - MA JOU AI BUKU O ABARI MA OA

¹ Nenanga ai hingahu o Nehemia Hakhalya aingohaka mangale ai manarama-manarama. O Kislew mamede magoronaka mataongo monaokoka aipareta o Artahsasta hokä o koano Persiaoka, ngohi, Nehemia, naga o Susanoka, o pareta makota matiti.

O Nehemia watibanga de ai hininga mahuha o Yerusalem

² O öraha gënanga, ahi riadodoto o Hanani, woboa o Yehudaino imakinïki o nyawa yamuruono naga. Daha önanga taleha mangale marupa o Yerusalemoka de hagala o Yehuda manyawa yolö lio-lioka o tabuangino o Babiloka.

³ Onanga yoade-ade hagala o nyawa yaö umo-umoka yolö lio-lioka manga tonaka madutuika gënanga, öraha nënanga yowango yohangihara de yahikauku hagala o hoana maporetino naga yakokilolitino. Ikali, mabebeno-bebeno o mehele o Yerusalem makotaka iwede-wederuku hohi bari-barihi de mangora-ngorana ma ago-agomo yatiaiuahi mamulaenge yätuku maöraha ipaha-paha.

⁴ Toihene o abari gënanga, ngohi togogeruku de toari. Dema wange-wange madekana ngohi ahi hininga ihuha. Ngohi gila-gila, topuaha ikali toma niata ma Jou Madutuika,

⁵ ”Ya Jou, Jou Madutu Nokokuaha o horogaka. Ngona o Jou Madutu No Loamo-amoko de ngomi minï himanga Ngona de miamao mia modongo itotomo. Ngona kahirahi Nosetia de nasoso Ani jaji o nyawaika ini hohininga Ngonaika de ihi ngounu Ani pareta.

⁶ Nohi pulono ngohi ya Jou, de Noihene ahi niata tohidoa Ani himangil̄e o hutu de o wange mangale o umati o Israeloka, Ani gogilaongo gënanga. Ngohi tomangaku ngomi, o umati o Israeloka, mibaradohaka; ngohi de ahi ete de ahi tohoraö mibaradohaka.

⁷ Ngomi minilawanoka Ngonaika de miatilakuru hagala Ani pareta. Ngomi mihitotomua Ani tita-tita Nohi doa-doakoka ngomino itilakuru o Musa, Ani gilaongo gënanga.

⁸ Ya Jou, Nohininga Ani demo-demo o Musa waheto-hetongo mangale Ani pareta, nako ngomi, o umati o Israeloka, misetiaua Ngonaika, ngomi aha Nomi hikabarihi o hoana de o berera mahomoa manga hidogoronaka.

⁹ Mä nako ngomi mima idulokali Ngonaika de mihingounu hagala Ani pareta, done ngomi mimahi kokabarihoka gënanga aha nomi toomuokali, ngaroka ngomi naga o dunia mabati-batingoka. Daha ngomi aha Nomihigilio o ngï ika Ngona Nairikoka mangale idadi o puji mangï Ngonaika.

¹⁰ Jou, ngomi nënanga Ani gogilaongo, Ani umati mahirete Nomihi hohalamatoka de Ani kuaha de Ani kuata ikokokiria.

¹¹ Noihene ahi niata, de Ani gogilaongo mahomoa manga niata, yomau ini horomati Ngona. Nohihi doaka ani roriwo hupaya o wange nënanga Ani gilaongo nënanga tohasili tamake makoanoino ai dora de ai hayanga.” O öraha gënanga ngohi ganga tohidodailako ma koano ai ngokere.