O MIKHA 6 - MA JOU AI BUKU O ABARI MA OA

Ma Jou Ai galaki o Israel manyawaika

¹ Ni ihene okia ma Jou Ai galaki o Israelika. No momiki, ya Jou, deʼ na tailako Ani galaki! Mal̄aika ol̄oku deʼ o doporono ihene okia nomau notemo.

² Hei hagala o l̄oku, hei hagala o dunia ma hohol̄e, ni ihene ma Jou Ai galaki! To ünanga deʼ ai perekara deʼ Ai umati o Israeloka deʼ aha wa dotagahoko önanga.

³ Ma Jou wotemo, ”Hei Ahi umati, okia Ta dodiaioka nginika? O hali okia magoronaka Ngohi tinihihuha ngini? Nihï baluhu Ngohi!

⁴ Ngini Tinï aooka tinihihupu o Mesirino, deʼ Ti nihipidili o gilaongino; Ngohi tahulokoka o Musa, o Harun deʼ o ngo Miriam mangale inï tuda ngini.

⁵ Ahi umati, niohininga okia wohi datoro mangale o Balak o Moab manga koano nginika, deʼ okia wibalahu o Bileam o Beor aingohaka unangika. Niohininga okia idadi nia dodagioka nia tau-tau o Sitimoka deʼ Gilgaloka mahi dogoronaka. Nako ngini niohininga mata-mata gënanga, ngini aha nia mao okia Ta dodiaioka mangale tingini nia halamati.”

O huhuba ma Jou wo ö igo-igo

⁶ Okia kokiani ngone hohi huba ma Jouika, ma Jou Madutu o horogaka, nako ngone hoboa mangale hopuji Unangika? Kokiani ngone ho ao o hapi magoduru maoa-oa mangale hohihuba hokä o huhuba ituhu-tuhuku Unangika?

⁷ Boteka ma Jou aha wosanangi nako ngone hao Unangika o duba ma ribu-ribuhu ekola o zaitun ma minya deʼ ma boboloi? Kokiani ngone hohihuba Unangika tongone nanga ngohaka o riaka hokä tongone nanga baradoha ma duduhuhu?

⁸ Kowali! Ma Jou wohi nyataoka ngoneino okia maoa-oa. Wona dotagahoko ngoneino enagënanga hupaya ngone hodiai iadili, salalu hadiai o igo deʼ o dora, de de nanga hininga madipokouku howango ka moi deʼ to ngone nanga Jou Madutu.

⁹ Ganga duru hobarija mangale himodongo ma Jouika, Unanga wä böaka o kota ma nyawaika, ”Ni ihene, hei ngini nima totoomu o kotaka!

¹⁰ Hagala o nyawa madorou manga tauoka hamake o arata yamö make-make deʼ manga tipu mamanarama. Onanga ya pake o susupa madutuua, moi o manarama To doha-dohata. O nyawa yododiai aha Ta hukumu.

¹¹ Kiaka yakunu Ngohi tahi apongo o nyawa ya pake o didibanga madutua?

¹² Hagala o nyawa kaya nia kotaka yä tuku o nyawa mihikini, deʼ ngini mata-mata nitotengeluku.

¹³ Oraha nënanga Ngohi mulaenge tini gohara deʼ tini wedere ngini karana hagala nia baradoha.

¹⁴ Ngini aha ni ol̄omo, mä idadiua inï punuhu ma koaholi kahirahi ini hahini. Ngini aha nia toraka o bara-baranga, ma niakunua nia gogonika. Okia dika ngini nihi hohalamati aha Ta wedere o parangi magoronaka.

¹⁵ Ngini aha nituduku o gandum, mä aha nia utukua ma hasili. Ngini aha nidiai o minya o zaitun mahohokino, mä niakunua nia pake maminya. Ngini aha nia teo o angguru ma teongo, mä aha nia okerua.

¹⁶ Mata-mata gënanga idadi karana ngini nia nïki ma koano Omri deʼ aingoha-ngohaka manga manarama itotorou, enagënanga ma Koano Ahab. Ngini nia nïki hagala toönanga manga datoro. Karana gënanga Ngohi aha tini wedere ngini, deʼ ngini aha inï hohedu deʼ inï hikauku mangale hagala o hoana deʼ o berera.”