O MIKHA 5 - MA JOU AI BUKU O ABARI MA OA

Ma Jou Madutu wohijaji womatengo wokokuaha o Betlehemino

¹ Ma Jou wotemo, ”Hei Betlehem Efrata, ngona moi o kota duru noeteke o Yehuda ma tonakoka! Ma ngonaino aha Tohimomiki womatengo wäkokuaha mangale o Israeloka, ai ahali kakahuruoninohi.”

² Ho, ma Jou aha wä mal̄aika Ai umati yakuaha hagala toönanga manga haturu hiädono o ngoheka wohitö tantantu mangale modadi ngoi ayo wokökokuaha gënanga mihi ngohaka Unanga. Iboto gënanga hagala o nyawa imakohoana de o berera moi naga o tabuangoka aha yahidadi moi yolio deʼ toönanga manga hoana de manga berera.

³ Nako wokokuaha gënanga woboa, Unanga aha wapareta Ai umati deʼ o kuata deʼ o kuaha ma Jou ma Jou Madutuino mahirete. Ai umati aha yowango deʼ marïdi, karana mata-mata o nyawa o dunia magilolitino aha ihi goungu Ai mulia,

^4-5 deʼ Unanga aha wahi döaka o dame. Nako o Asyur manga tentara yaparangi tongone nanga berera de yo ngohama tongone nanga bebeno o mehele, ngone aha hatoomu tongone nanga tutuda-tutuda yokua-kuata mangale yaparangi önanga. To ngone nanga tutuda-tutuda gënanga aha yahihanga o Asyur deʼ o däe makuata, deʼ inahihalamati ngone toönanga manga giamino.

O hibebasi deʼ o hukumanga

⁶ O Israeloka manyawa mahou-houohi aha yodadi hokä o dumunitara i mämäta ma Jouino mangale o hoana deʼ o berera manga ngöe, deʼ hokä o awana iuti idö dato-datomuku. Onanga aha imahitangono ma Jou Madutuika, deʼ o nyawa ikaua.

⁷ O Israeloka manyawa kayo gogogerohi o hoana deʼ o berera ma ago-agomo manga hidogoronakaka aha hokä o singa hagala o aiwani o honganoka mahidogoronaka ekola o duba matika mahidogoronaka o tonaka ma lua-luasi mamomoka. O singa gënanga iwohama o duba matika mahidogoronaika gënanga daha ya pito-pitoko deʼ yakä kakihi; koiwa yakunu yapidili hagala o duba gënanga.

⁸ O Israeloka aha yahohinga hagala manga haturu ikala yä wedere önanga mata-mata.

⁹ Ma Jou wotemo, ”O öraha gënanga Ngohi aha ta hohihanga mata-mata nia kuda, deʼ ta binaha hagala nia kereta ni hi po parangi.

¹⁰ Hagala o kota ma bebeno o mehele nia bereraka aha Ta wedere, deʼ mata-mata nia bebeno nimahi tä tatoko Ta kilianga.

¹¹ Hagala nia röehe ma pareta aha Ta hohihanga deʼ mata-mata yo mai-maihi Ta hititoko.

¹² Ngohi aha ta wedere hagala nia dulada deʼ nia tugu-tugu ikokaramati; ngini aha nia hubaokauaoli hagala o baranga nia giama ma manarama mahirete.

¹³ O Asyera o gikiri o ngo Heka ma tugu-tugu nia bereraka aha Ta ruba, deʼ hagala nia kota ma bebeno o mehele aha Ta wedere.

¹⁴ Ahi gangamo ihebu-hebulu magoronaka Ngohi aha ta balahi o hoana deʼ berera mata-mata manga dorou ihihi ngou-ngounua Ngohino.”