O MIKHA 1 - MA JOU AI BUKU O ABARI MA OA

¹ O Mikha ai ahali o kotaino moi mai teteke ma romanga o Moresyet. Maöraha o Yehuda maberera ya pareta imakinikika ma koano Yotam, o Ahas deʼ o Hizkia, o Mikha wa tarima ma Jou Ai behehongo mangale o Samaria deʼ o Yerusalem.

O dodora mangale o Samaria deʼ o Yerusalem

² Ni ihene, hei o höana deʼ o berera ma ago-agomo! Ni ö hohininga, hei o dunia ingodumu manyawa! Ma Jou Duru wo ko Kurutil̄e woboa hokä o hakihi wini lawani ngini mata-mata! Ni ihene Unanga wo temo-temo ai Tau itebi-tebinino o horogaka.

³ Unanga wo uti ai ngï i Tebi-tebinoka deʼ wa uku deʼ woma dagi ol̄oku ma tubu-ma tubu mal̄okuoka o l̄oku o duniaka.

⁴ Hagala o l̄oku i wedere Ai hoata matimioka hokä o lilin o uku magoronaka itoka-tokara; o tonaka itopaha iwohama o wai-wai ika, hokä o akere o doporono mal̄okuoka ihahuru daukuku.

⁵ Mata-mata gënanga aha idadi karana o Israel manyawa yo baradoha deʼ i ma lawani ma Jou Madutuika. O nagona yo diai o hababu o Israel yo baradoha? Koigoungua o Samaria manga kota matiti mahirete? O nagona yodiai o hababu o Yehuda yahuba o gomanga? Koigoungua o Yerusalem mahirete?

⁶ Genanga ma hababu ma Jou wotemo, ”Ngohi aha tohidadi o Samaria ma gilianga ma doporono o tönaka ma lua-luasoka, deʼ o nyawa yo datomo o angguru ma utu mangï. O kota gënanga ma gilianga aha Ta umo o wai ma goronauku, deʼ hagala ma hohol̄e aha Ta kilianga.

⁷ Hagala ma dulada deʼ ma ija-ijaoka aha ya wedere, deʼ moi-moi o baranga yahi dö doa-doaka o ngongohekaika yomomanarama o gomanga ma tauoka aha yatuhuku, ikali hagala ma gomanga yabinaha. Hagala o baranga gënanga ganga ma hasili ma puji o gikiri iboburereika. O öraha nënanga mata-mata gënanga aha ya toraka hagala manga haturu mangale o sukur ma huhuba toönanga manga giki-gikirika.”

⁸ Karana gënanga ngohi, o Mikha, ahi hininga ihuha deʼ totaiana. Ngohi aha tomä dagi tomapakeangua deʼ tomasandalua mangale tohi dumutu hokokia ahi hihininga mahuha. Ngohi tolau hokä o kaho o honganika deʼ tolau hokä o totaleo o unta.

⁹ Hababu o Samaria ma nabo-nabo yakunua ya togumu, deʼ o Yehuda aha yatapal̄u o bodito kaima tero. O hangihara yadonoka o Yerusalemika, ahi hoana manga berera madutu mangorana ma amo-amoko.

O haturü ngadeke imahiädono o Yerusalemoka

¹⁰ Uha nia hingahu to ngone nanga haturu-haturuika o Gatoka mangale to ngone nanga bodito; uha nia mal̄aika önanga inï make ngini ni ari. Hei o Bet-Le-Afra manyawa, nimalulu o kafo ma goronaka hokä ma nonako nia nganonu i toaka!

¹¹ Ngini o Safir manyawa, nima goraka o tabuangika nima pakeangua deʼ nia mao i ni mal̄eke! Hagala o Zaanan manyawa ya moroinua yo hupu toönanga manga kotaino. O Bet-Haezel manyawa manga böaka ihi dumutu nginiika dokengoka koiwaoli o hö hohongo.

¹² O bodito ma Jouino ma hiadonoka o Yerusalem manga ngorana ma amo-amoko ma himangoka! Karana gënanga, koidadiua o Marot ma nyawa yö nganono o roriwo.

¹³ Ngini o Lakhis manyawa, nihi pake o kuda o kereta ihi poparangika! Ngini nimä duru hagala o baradoha yadodiai o Israeloka hiädono idadi hababu o Yerusalem i baradoha.

¹⁴ Öraha nënanga, hei o Yehuda manyawa tingini nia kota o Moresyet-Gat aha ihihanga. O Israeloka manga kokoano aha yamakeokauaoli o roriwo o Akhzib ma kotaino.

¹⁵ Hei o Maresya manyawa, ma Jou aha winï hilapahi ngini o haturuika yomau yautumu nia kota. O Israeloka manga tutuda-tutuda yokokuaha aha ima ngiunu hagala o aruku magoronaka o Adulamoka.

¹⁶ Hei o Yehuda manyawa, nia tobiki nia tadauru hokä manonako nia hininga mahuha mangale nia ngoha-ngohaka ngini nia hö hohininga. Nia kori nia haeke hiädono ipalala hokä o totaleo i ol̄o-ol̄omo o maiyeti, hababu nia ngoha-ngohaka aha yä toraka o tabuangika.