O MAZMUR 98 - MA JOU AI BUKU O ABARI MA OA

Ma Jou Madutu wakokuaha o dunia

¹ O Mazmur. Nihi nyanyi o nyanyi malugo mahungi mangale ma Jou, karana hagala Ai manarama ihöhera-heranga! De Ai kuaha deʼ Ai kuata mahirete Unanga wamakeoka o utumu.

² Ma Jou wohi ngangahu Ai utumu; Unanga wohinyata Ai adili hagala o hoana deo bereraika.

³ Unanga wöhininga Ai dora deʼ Ai satia o Israelika, Ai umati. Mata-mata o hoana deo berera o dunia yamode-modekika yamakeoka ai utumu, tongone nanga Jou Madutu.

⁴ Niulili deʼ nihagaga mangale ma Jou, hei o dunia yamode-modekika! Niwi higiriri ma Jou de o nyanyi deʼ niulili nimorene.

⁵ Nihi nyanyi o higiriri mangale ma Jou, de nikuti o kecapi.

⁶ Nia wuwu o trompet deʼ o guguli, niulili mangale ma Jou, tongone nanga Koano.

⁷ Niruruhu hei o ngöto deʼ madol̄a mata-mata o dunia deʼ mata-mata yogogogere.

⁸ Mal̄aikala hagala o ngairi ipopoka, deʼ hagala o doporono imä uli-ulili ma Jou Ai himangoka.

⁹ Hababu Unanga woboa mangale wohi juruhakimi o dunia; hagala o hoana deo berera aha wahi juruhakimi dema adili deʼ itiai.