O MAZMUR 97 - MA JOU AI BUKU O ABARI MA OA

Ma Jou Madutu wokokuaha womomulia

¹ Ma Jou gënanga o Koano! Kokiani o dunia imorene deʼ onu-nuhu imagarago.

² Unanga iwi kilolitino o lobi deʼ o huhutu, o adili deʼ o tita gënanga Ai popareta mahohol̄e.

³ O uku itagi ihora Ai himangoka, yäuku o haturu Ai gogilolitino.

⁴ Ai leletongo yatararono o dunia, o dunia yamake dei hahara.

⁵ Hagala ol̄oku iuihi hokä o lilin ma Jou Ai himangoka, Ai himangoka ma Jou, wakokuaha o dunia yamode-modekika.

⁶ O dihanga ihi ngangahu Ai adili, deʼ mata-mata o hoana deo berera yamake Ai mulia.

⁷ Mata-mata o nyawa yahö huba-huba o gomanga aha yahi mal̄eke, ihi amo-amoko o bara-baranga iföfaidaua; mata-mata o gikiri aha yatilabukuku ma Jou Ai himangoka.

⁸ O Sion yogogogere deʼ o Yehuda ma kota-kota yosanangi maöraha yoihene ma Jou Ai putuhu.

⁹ Hababu Ngona, ya Jou, nakokuaha o dunia yamode-modekika; Ngona nomulia noholoi de hagala o gikiri.

¹⁰ Hei ngini niwï hohininga ma Jou, nio dohata o dorou! Hababu ma Jou wögoana Ai umati manga ngango, Unanga wahi bebasi önanga o nyawa yososatiaua manga kuahaino.

¹¹ Odararono iboaka mangale o nyawa manga hininga itebi-tebini deʼ o morene mangale o nyawa manga hininga i riko-rikoto.

¹² Nimorene, hei hagala o nyawa nia hininga itebi-tebini karana okianaga ma Jou wadodiaioka, deʼ nisyukur ma Jou Madutuika wotö tebi-tebini.