O MAZMUR 94 - MA JOU AI BUKU O ABARI MA OA

Ma Jou Madutu wahi juru hakimi o nyawa mata-mata

¹ Ya Jou Madutu, Ngona ganga ma Jou nabö bala-balahi, nohimatoko Ani balahi ya Jou.

² Nomomiki de noma okoino, ya o dunia ingodumu mahakimi, nahukumu o nyawa manga hininga ikökurutil̄e imamoteke de toönanga manga manarama.

³ Ya Jou, hiädono muruonoka o nyawa madorou yomorene? Hiädono muruonoka ya Jou?

⁴ Onanga ihihupu o demo-demo ipoputurungu, deʼ ima hiedenge toönanga manga dorou.

⁵ Onanga yätiki Ani umati ya Jou, deʼ yäwede-wederuku Ani ngongiriki manyawa.

⁶ Onanga yätoma o bobobao deʼ o ngohaka o gohihi, deʼ o nyawa o dagi-dagino yogogogere o bereraka nënanga.

⁷ Onanga yato, ”Ma Jou kowä makeua, o Yakub ai Jou Madutu watötailakoua.”

⁸ Hei ahi hoana de ahi berera, uha nia bodo hoko gënanga, nimädotoko niapake niakali!

⁹ Ma Jou Madutu wododiai o ngauku, boteka Unanga kowo ihenua? Unanga wododiai o lako boteka Unanga kowä makeua?

¹⁰ Unanga wädoto-dotoko hagala o hoana deo berera, boteka Unanga kowä hukumua? Unanga wodadi o nyawa mata-mata manga guru boteka Unanga okiaua wanako?

¹¹ Ma Jou wödumunu o nyawa manga dibanga, Unanga wohiöriki mata-mata duru kaparahaja.

¹² Youtumu o nyawa Nadö doto-dotoko, ya Jou, o nyawa Nädoto-dotoko hagala Ani tita.

¹³ Ngona nihi rïdi ünanga o bodito mawangeoka, hiädono yohaiti o baiti layätagoko o nyawa madorou.

¹⁴ Hababu ma Jou aha kowä mal̄aikaua Ai umati; Unanga aha kowä mal̄aikaua Tounanga Ai puhaka.

¹⁵ Done o tita ima oko itotiail̄e o juru hakimoka, mata-mata o nyawa manga hininga iriko-rikoto aha ihigoungu.

¹⁶ O naguna wohï riwo ngohi o nyawa yososatiaua manga himangoka? O naguna wohihiboa ngohi tälawani o nyawa yododiai o dorou?

¹⁷ Nako ma Jou wohï riwoua ngohi, ngohi ngade-ngadeke toma tagali o nyawa yohone-honenge manga duniaika.

¹⁸ Maöraha ngohi toma pikiri ngohi aha ihi otaka, Ani dora, Jou, yadiai ngohi tobitumu toma okoil̄e.

¹⁹ Nako ahi hininga kai hawa-hawanika deʼ iruae, Ngona nohi l̄aru deʼ ngohi tomorene.

²⁰ Ngona nima teke rimoiua deo hakimi madorou yatä tatoro o dorou imoteke o tita.

²¹ Onanga imateke fakati yälawani o nyawa manga hininga i riko-rikoto, deʼ yähukumu o nyawa yahowo-howonua.

²² Mä ma Jou ganga ahi roriwo, ma Jou Madutu idadi ahi gogoana.

²³ Unanga wähukumu o nyawa madorou imatero de manga dorou, deʼ toönanga manga uru watamunu karana manga dorou. Ma Jou tongone nanga Jou Madutu aha watamunu toönanga manga uru.