O MAZMUR 90 - MA JOU AI BUKU O ABARI MA OA

O BUKU MAIATOKA: MAZMUR 90–106 Ma Jou Madutu, o nyawa manga ngingiunu mangi

¹ O Musa ma Jou Madutu Ai gilaongo, ai niniata. Ya Jou, Ngona ganga tongomi mia ngingiunu mangï ingohaka dei danongo.

² Hagala o l̄oku Nohidadiuwahi, o tonaka deʼ o dunia Nadiaiuwahi, Ngona ganga ma Jou Madutu nokokakali, koiwa madodihiraka de koiwa mabobaha.

³ Ngona nähuloko o nyawa imakilioro manga ahalika, yodadi o kuhuhunu hokä madodihirakali.

⁴ Ngonaika o taongo o ribuhu moi hokä o wange moi, kanugono mawange ipaha-pahaka; hokä o hidoku moi yogoa-goana imateke tagali maöraha o hutu-hutu.

⁵ Ngona nomi l̄ahini ngomi; ngomi hokä minanere, hokä o momo itori-toril̄e;

⁶ o ngoru-ngorumino ena iwango deʼ ima hohe, mä imaai maöraha oböbimaoa.

⁷ Ngomi imï todokana mangale Ani dohata, deʼ mibinaha mata-mataka mangale Ani muruka.

⁸ Ngona nakelengauku tongomi mia howono Ani himangoka, tongomi mia baradoha i iu-iunu Ngona kanapulono.

⁹ Tongomi mia ngango itipoko karana Ani dohata, hagala tongomi mia taongo ihi bobaha hokä hohowomaha.

¹⁰ Tongomi mia ngango maöraha duga-duga o taongo mori tumidi, nako ngomi mikuata, o taongo mori tufange. Mä duga-duga kao huha deo hangihara ngomi mia make; o ngango madodipoko de iböto, ngomiö mamihihanga.

¹¹ O naguna wakunu wanako Ani muruka mabuturungu, ekola itotomo wamao Ani dohata mahasili?

¹² Tanu ngomi mimamao mangale mamodipoko wowango nënanga hupaya ngomi midadi o nyawa yososawaro.

¹³ Ya Jou, hiädono muruonoka Ngona nongamo? Noma kilioro deʼ nadora Ani gilaongo.

¹⁴ Nohiholoi Ani dora ngomino o ngorumini ihigetongo, hupaya ngomi mimorene deʼ minyanyi tongomi mia wowango magurutu.

¹⁵ Nomi hidöaka ngomino o utumu imatero-tero de mia tago-tagongo o huha ngomi mia tago-tagongo hagala o taongo ihöhangihara magoronaka.

¹⁶ Nohidumutu Ani gao-gao ngomino Ani gilaongo, deʼ Ani kuaha ihöhailoa mia ngohaka de mia danongika.

¹⁷ Ya Jou tongomi mia Jou Madutu, nomihibarakati ngomi, hupaya hagala tongomi mia manarama ihasili.